Ці адчуваюць беларусы рост даходаў, пра які сведчыць статыстыка? Пагутарылі з прадстаўнікамі розных прафесій
Згодна з афіцыйнымі звесткамі, рэальныя даходы насельніцтва за першае паўгоддзе 2024 года выраслі амаль на 10%. Пра рост даходаў кажуць і незалежныя эканамісты. «Наша Ніва» распытала беларусаў, якія працуюць у розных сферах, ці адчуваюць яны перамены на сабе.
Газавік
Офісны супрацоўнік з абласнога цэнтра, які працуе ў аблгазе, кажа, што не адчувае рост заробкаў.
«Стаўка сапраўды расце, але паралельна з гэтым скарачаюцца іншыя сумы выплат, таму выніковая лічба не змяняецца. Проста адбываецца пэўная гульня лічбаў. Зарплаты нібыта павысілі, а па факце мала што змянілася», — кажа мужчына, які атрымлівае 1400 рублёў на рукі.
Па яго словах, калі ўлічыць усе дадатковыя выплаты цягам года, то сярэдняя зарплата складае каля 1600 рублёў на рукі.
«Таму з улікам усіх дадатковых выплат, прысвечаных да пэўных дат, якія практыкуюць на дзяржаўных прадпрыемствах і 13-ю зарплату, выходзяць тыя самыя «па пяцьсот».
Суразмоўца адзначае, што хоць у рублях зарплата расце, у валютным вымярэнні — скарачаецца.
«Калі параўноўваць з 2020 годам, то мая сённяшняя зарплата ў валюце нават крыху меншая, чым тады. Таму казаць пра тое, што я магу дазволіць сабе больш, дакладна не выпадае», — прызнаецца супрацоўнік аблгазу.
Менеджар
Менеджар па продажах, які працуе ў кампаніі, якая займаецца аптовым гандлем аўтазапчасткамі, кажа, што ў параўнанні з леташнімі заробкамі ягоная зарплата вырасла прыблізна на 10%.
«Па адчуваннях цэны выраслі прыкметна больш», — кажа ён.
Па словах суразмоўцы, раней ён асабліва не звяртаў увагу на цэны, калі хадзіў у прадуктовую краму.
«Недзе бліжэй да канца мінулага года пачаў глядзець на цэннікі. Бачу, што амаль усе прадукты пастаянна даражэюць.
Зарплата таксама расце, але цяпер я магу дазволіць усё ж крыху менш, чым было раней», — прызнаецца мужчына, якія ўжо амаль 7 гадоў працуе на гэтай пасадзе.
Кур'ер
Суразмоўца, які працуе ў буйной кампаніі кур'ерам на ўласным аўто, прызнаецца, што за апошні год ягоны заробак сапраўды павялічыўся.
«На месяц разам з выплатамі за амартызацыю аўто выходзіць каля 2400-2500 рублёў на рукі. Плюс за кошт пэўных плюшак штомесяц выходзіць яшчэ каля 200 рублёў. Год назад агульная сума чыстымі была рублёў на 400 менш», — прызнаецца мужчына.
Ілюстрацыйны здымак. Фота: «Наша Ніва»
Па яго словах, цяпер сапраўды можна дазволіць сабе крыху больш, чым было год таму:
«Нельга казаць, што гэтыя 400 рублёў моцна палепшылі ўзровень жыцця — зарплата падрасла, але і цэны не стаяць на месцы».
Рост зарплаты мужчына звязвае з тым, што ў параўнанні з мінулым годам у кампаніі павялічыліся аб'ёмы продажаў, што ў выніку і паўплывала на павелічэнне зарплаты.
Доктарка
Вузкая спецыялістка, якая працуе на поўную стаўку ў паліклініцы, цяпер атрымлівае каля 2100 рублёў на рукі. Год таму было каля 1800 рублёў.
«Зарплаты ў медыкаў паціху растуць. За год, атрымліваецца, прыблізна на 20% вырасла. Магчыма, гэта нават крыху больш, чым выраслі цэны, але не магу сказаць пра тое, што цяпер я магу сабе дазволіць адчувальна больш. Але горш дакладна не стала», — прызнаецца доктарка.
Таксама медык звяртае ўвагу, што сённяшні ўзровень заробкаў для яе не пікавы.
«У часы кавіду каля году ў нас былі сапраўды даволі годныя даплаты. Таму калі параўноўваць з часамі пандэміі, то цяпер я зарабляю горш, бо тады былі месяцы, калі атрымлівала каля $1000 на рукі ў эквіваленце».
Выкладчык
Выкладчык адной з буйных дзяржаўных ВНУ адзначае, што стаўка за гадзіну вырасла літаральна на капейкі.
«Калі летась было 5 рублёў з капейкамі, то цяпер — 6. Агулам атрымліваецца, што намінальная зарплата вырасла на 10-15%. Але ў некаторых ВНУ змянілася сістэма налічэнняў, таму можа атрымлівацца так, што каб мець тыя самыя грошы, што былі летась, фактычна трэба адпрацаваць працэнтаў на 20 болей», — тлумачыць выкладчык.
Па ягоных словах, ніякага рэальнага паляпшэння не адчуваецца. Заробкі ў выкладчыкаў, як былі нізкімі, такімі і застаюцца. Каб за месяц атрымлівалася зарабіць больш-менш прыстойную суму, многія выкладчыкі дадаткова падпрацоўваюць у якасці самазанятых. Яны займаюцца рэпетытарствам, напісаннем работ для студэнтаў на замову, выкладаюць анлайн-курсы (напрыклад, выкладчыкі замежных моваў).
Афіцыйныя лічбы
Згодна з апошнімі афіцыйнымі данымі (за ліпень 2024 года), сярэдняя зарплата ў Беларусі складае 2355 рублёў бруднымі ці 2025 рублёў на рукі. Гэта +115,4% у параўнанні з ліпенем 2023 года. Згодна з афіцыйнай статыстыкай, рэальныя даходы (з папраўкай на інфляцыю), за гэты перыяд выраслі на 9,9%.
Каментары