Сваяк Віктара Лукашэнкі займае высокія пасады ў КДБ. Гэта высветлілася, калі забралі будынак дзіцячай паліклінікі
Digital intelligence team падрыхтаваў расследаванне пра тое, як будынак Мінскай паліклінікі прызналі «аварыйным» і бясплатна перадалі КДБ. Пасля таго, як будынак адышоў спецслужбам, грошы на яго рэканструкцыю хутка знайшліся.
«Аварыйная паліклініка»
Каманда Digital intelligence team атрымала звесткі пра тое, што беларусаў выклікаюць на допыты ў будынак былой дзіцячай паліклінікі побач з метро Аўтазаводская ў Мінску. Але што гэта за будынак?
Знаходзіцца ён на вуліцы Сядова, 8 у Мінску. Насупраць — школа, побач — Палац культуры МАЗ і станцыя метро «Аўтазаводская». Раней там быў філіял 10-й дзіцячай паліклінікі. Мясцовыя жыхары расказвалі «Анлайнеру», што там абслугоўваліся сотні дзяцей, а будынак быў заўжды перагружаны.
Напрыканцы 2017 года мясцовыя жыхары даведаліся, што паліклініцы тэрмінова патрэбны капітальны рамонт. Іх засмуціла тое, што ў будынку цэлае лета для чагосьці праходзіў касметычны рамонт. Зрэшты, скаргі і звароты да СМІ нічога не далі. Будынак закрылі, але рэканструкцыю так і не пачалі. Усіх дзяцей перанакіравалі ў галоўны будынак 10-й паліклінікі.
Пераломны 2020-ы
У снежні 2020 года было вырашана, што будынак бярэ сабе КДБ. Будынак і плошчу побач узялі бясплатна з уласнасці Мінздароўя і аддалі КДБ. Планавае заданне, якое прыводзіць Digital intelligence team, пацвярджае гэтую схему.
Падпісаў заданне на праектаванне пад «размяшчэнне аб'екта іншага прызначэння» Аляксандр Гарусаў, які тады быў намеснікам кіраўніка ўпраўлення КДБ. Біяграфія гэтага 50-гадовага чэкіста мае важную таямніцу.
Сям'я Гарусавых
Жонка Гарусава — 50-гадовая Іна. Яны землякі, абое са Шклоўшчыны. Іна Гарусава працуе ў Аператыўна-аналітычным цэнтры пры прэзідэнце Беларусі на пасадзе вядучага спецыяліста. Яна сястра Ліліі Лукашэнка, жонкі Віктара Лукашэнкі.
Іна і Аляксандр, згодна са звесткамі «Альянса расследавальнікаў Беларусі», шмат падарожнічалі разам з сям'ёй Віктара Лукашэнкі і іхнімі сябрамі. Гэта адбывалася з 2008 па 2020 гады.
Напрыклад, у 2011 Гарусавы ездзілі ў Бодрум разам з Міланкай Карыч, жонкай саўладальніка Dana Holdings Багалюба Карыча і адным з кіраўнікоў Dana Holdinds Зелянка Сіліковіцам. У 2016 адпачывалі месяц у Грэцыі разам з Багалюбам Карычам і яго сям'ёй. Таксама ў 2016, 2017 і 2020 гадах Іна з Ліліяй Лукашэнка ды дзецьмі ездзілі ў Катар і ААЭ ў той жа час, калі там быў Аляксандр Лукашэнка.
Усе сумесныя падарожжы Гарусавых з Лукашэнкамі адбываліся на прыватных самалётах.
Таямніцы КДБ
У дакументацыі, якую праект атрымаў ад «Белпола», будынак КДБ паўсюль падпісаны як «аб'ект іншага прызначэння». Агульная плошча будынка — 335,2 квадратнага метра. Разлічаны ён на 21 супрацоўніка КДБ.
Вось, як ён размяшчаецца адносна вуліц Сядова і Шасейнай. Для КДБ стварылі паркоўку на 13 месцаў.
У падвале будынка нічога адметнага: гаспадарчыя пакоі.
На першым паверсе — 8 кабінетаў для 12 супрацоўнікаў. Там жа памяшканне дзяжурнага, вокны якога выходзяць на вуліцу Сядова і школу побач. Таксама ёсць пакой для наведвальнікаў. Ёсць пакой адпачынку і харчавання.
На другім паверсе ёсць яшчэ 7 кабінетаў. Таксама там ёсць два пакоі для адпачынку і душавая. У кожным з такіх пакояў ёсць канапы і можна нават паспаць. Навошта тры пакоі адпачынку на 21 чалавека, незразумела.
Таксама ў будынку не менш за 20 кандыцыянераў, а на першым паверсе ўсталяваная сігналізацыя. Па контуру будынка размешчаныя 25 камер назірання.
Рэканструкцыя будынка скончылася ў чэрвені 2023 года. У будынак, згодна з тэндарамі, укалі 3,6 мільёна рублёў ці каля $1,5 мільёна.
Параўнайце, як будынак выглядаў да і пасля таго, як перайшоў пад крыло КДБ:
Фінансаваўся рамонт, вядома, з дзяржаўных сродкаў — з бюджэту Мінска і ўпраўлення капітальнага будаўніцтва і рамонту Завадскога раёна Мінска.
«Наша Нiва» — бастыён беларушчыны
ПАДТРЫМАЦЬУ 2020-м сын Ганны Канапацкай званіў у міліцыю з даносам на мінчукоў, якія развешвалі стужкі11
Каментары
Вот такие приоритеты у лукашистского режима.