Biełaruski paradoks. Navat šalony popyt na budaŭničyja materyjały nie dapamoh cemientnym zavodam vyjści na prybytkovaść?
Na partale pravo.by źjaviłasia pastanova Saŭmina, zhodna ź jakoj, sioleta pracenty pa kredytach cemientnych zavodaŭ buduć płacić ź biudžetu. U śpis patrapili try zavody: «Krasnasielskbudmateryjały», jaki vinien $36,5 miljona, «Biełaruski cemientny zavod» z sumaj asnoŭnaha doŭhu ŭ $70 miljonaŭ i «Kryčaŭcemientašyfier», doŭh jakoha roŭny $141 miljonu.
Niahledziačy na toje, što u svoj čas na madernizacyju hetych zavodaŭ nakiravali jak minimum miljard dołaraŭ, takija pastanovy ab «padtrymcy», «rasterminoŭkach», «restrukturyzacyjach» i padobnym užo stali tradycyjnymi.
Ale miarkujučy pa tym, što zavodam znoŭ akazvajecca dapamoha, jany, imavierna, tak i nie stali prybytkovymi. I heta niahledziačy na šalony rost cen na budmateryjały i tanny haz.
Pra takuju źjavu «Našaj Nivie» kaža ekanamist BEROC Dźmitryj Kruk.
«U 2019 užo było rašeńnie, jakoje možna kvalifikavać jak sprobu «kančatkovaha vyrašeńnia pytańnia». Daŭhi pierad biudžetam, jakija ŭźnikli ŭ vyniku taho, što dziaržava pahašała za hetyja zavody płaciažy pa kredytach u 2015-2019 hadach (na sumu kala $550 młn.), byli pierasunutyja na 2029-2049 hady, biez upłaty pracentaŭ. Faktyčna — śpisanyja.
Mierkavałasia, što paśla takoha aktu dabračynnaści i adpaviednaha źniaćcia kredytnaj nahruzki, novaja dapamoha im nie spatrebicca, i jany zmohuć vyjści chacia b na nievialički ŭzrovień pazityŭnaj rentabielnaści. U 2020-m hetaha nie zdaryłasia, što možna było zvalić na situacyju z karanavirusam.
Za 2021 hod u publičnym dostupie infarmacyi pa ich finansavym stanie pakul niama.
Ale, kali dziaržava znoŭ biarecca za toje, kab ilhaciravać ich płaciažy pa kredytach, to, chutčej za ŭsie, jany zastalisia stratnymi i pa vynikach 2021 hoda.
I heta niahledziačy na supierspryjalnuju źniešniuju kanjunkturu ŭ 2021 hodzie i vializnuju deltu ŭ canie na haz u paraŭnańni z rynkavym uzroŭniem (u hetaj halinie vialikaja vaha vydatkaŭ na enierhanośbity, to-bok nizkaja cana na haz — vielmi istotnaja pieravaha).
Jak kažuć, lepšaj kanjunktury dla vas užo, chutčej za ŭsio, nie budzie.
Kali paśla ŭlivańnia kala USD 1 młrd, śpisańnia bolšaj častki hetaha doŭhu, rasterminovak, pry praźmierna spryjalnaj kanjunktury, treba i dalej ilhaciravać pracenty pa kredytach, to heta poŭnaje fijaska…
A cemientnaja halina stanovicca ŭsie bolš jaskravym simvałam niekampietentnaści i marnavańnia dziaržaŭnych hrošaj», — kaža Kruk.
Kamientary