«Nikoli nie budzie, što z terytoryi Biełarusi niejkija vojski atakujuć Kijeŭ. Ni-ko-li!» Pryvodzim zajavy Łukašenki pra vajnu z Ukrainaj
Zrabili padborku jaho vykazvańniaŭ z 2020 hoda.
5 žniŭnia 2020 hoda
Adna z samych viadomych zajaŭ była zroblena ŭ intervju ŭkrainskamu žurnalistu Dźmitryju Hardonu napiaredadni vybaraŭ.
«U nas jość danyja, što rasijanie razhornuć padraździaleńni ŭ ramkach sajuznych abaviazalnictvaŭ i mohuć nanieści ŭdar z poŭnačy pa Kijevie, — padčas intervju Łukašenka zhadvaŭ razmovu z Alaksandram Turčynavym (u 2014 hodzie v.a. prezidenta Ukrainy). — Jon mnie kaža: «Vy ž razumiejecie, što my nie vystaim». Ja kažu: «Saša, nikoli nie budzie, što z terytoryi Biełarusi niejkija vojski atakujuć Kijeŭ. Ni-ko-li!»
Tady jon nazvaŭ podłaściu taki varyjant raźvićcia padziej.
29 listapada 2021 hoda
Naprykancy minułaha hoda pra ŭkrainskuju pamiežnuju apieracyju «Paleśsie» jon vykazvaŭsia bolš vajaŭniča:
«Jašče raz chaču padkreślić: my nie brazhajem zbrojaj. My razumiejem, što takoje vajna. My mnohija pieražyli niahody paślavajennych hadoŭ, kali hołyja, raspranutyja ź ziamlanak nie mahli vyleźci.
Ciapier bolš-mienš žyviom prymalna, my nie chočam nijakich vojnaŭ. Kali chto-niebudź choča z nami razmaŭlać jak ź mirnymi ludźmi — kali łaska, ź siońniašniaha dnia.
My hatovyja razmaŭlać. Ale kali chtości da nas ź miačom pryjdzie abo sa strelbaj, u nas jość čym adkazać».
28 studzienia 2022 hoda
Sioleta častata zhadvańnia vajny ŭ pramovach Łukašenki pavialičyłasia. Padčas pasłańnia narodu jon zajaviŭ nastupnaje:
«Dyk budzie vajna ci nie? Jana budzie. Ale tolki ŭ dvuch vypadkach. Kali suprać Biełarusi budzie praviedzienaja pramaja ahresija. Kali suprać našaj Biełarusi budzie raźviazanaja haračaja vajna.
My ŭsie jak adzin, i navat tyja, chto nie choča, ustanuć na abaronu našaj ziamli i našaj ajčyny. Stahodździami naš narod zmahaŭsia za svaju ziamlu, za niezaležnaść i suvierenitet. My atrymali, my damahlisia hetaj niezaležnaści. I siońnia momant, kali treba hetuju niezaležnaść abaranić.
I druhi momant, kali być vajnie, i Biełaruś budzie ŭ joj udzielničać — kali na našaha sajuźnika, Rasijskuju Fiederacyju, ažyćciaviać niepasredny napad, i takaja ž ahresija budzie ździejśnienaja suprać terytoryi RF. Asnova tamu — našy sajuznyja damoŭlenaści».
«Chaču adkazać kalektyŭnamu Zachadu. U ich hetaje pytańnie vielmi važnaje: ci buduć vojski na terytoryi Biełarusi? Kali na našu krainu budzie ździejśnienaja ahresija, tut buduć sotni tysiač rasijskich vojskaŭ, jakija z sotniami tysiač biełarusaŭ buduć baranić hetuju śviatuju ziamlu».
3 lutaha 2022
Łukašenka znoŭ zhadaŭ vajnu i Ukrainu na sustrečy ź ministram abarony Rasii Siarhiejem Šajhu, abmiarkoŭvajučy vučeńni «Sajuznaja rašučaść — 2022»:
«Siońnia ŭ nas, na žal, adkryvajecca paŭdniovy front, paŭdniovy nakirunak. My vymušanyja ŭmacoŭvać miažu z Ukrainaj. Tamu vučeńni dapamohuć vyznačyć samyja bolevyja kropki na hetym nakirunku dla taho, kab bieź lišnich vydatkaŭ stvaryć abaronu na našych paŭdniovych rubiažach. A heta taksama važna i dla Rasijskaj Fiederacyi.
Tamu razmovy pra vajnu, nie vajnu i hetak dalej… Palezuć — atrymajuć. Voś i ŭsia vajna. Nam čužoha nie treba. Daj boh svajo asvoić — ad Bresta da Uładzivastoka».
4 lutaha 2022 hoda
U intervju rasijskamu prapahandystu Uładzimiru Sałaŭjovu na pytańnie, ci vieryć jon u pačatak vialikaj vajny (spačatku va Ukrainie, potym u Jeŭropie) Łukašenka adkazaŭ admoŭna:
«ADKB što pakazała… pakul jany tam razhornucca i pierašluć niejkija vojski, my ŭžo budziem stajać kala Ła-Manša. [ … ] Jany razumiejuć, što bieśpierśpiektyŭna z nami vajavać, pierš za ŭsio z Rasijaj».
U hetaj ža razmovie jon znoŭ vykazaŭsia pra vajnu z paŭdniovym susiedam: «Ukraina nikoli nie budzie z nami vajavać. Hetaja vajna praciahniecca nu maksimum try-čatyry dni. Tam nie budzie kamu suprać nas vajavać! [ … ] Jak tolki ledź-ledź zapachła, Vałodzia Zialenski adrazu truchnuŭ: «Chłopcy, chłopcy».
10 lutaha 2022 hoda
Čarhovaja zajava ab tym, što vajny nie budzie, była zroblenaja ŭ kadravy dzień:
«Prosta pierakanany, što nijakaj haračaj vajny nie budzie. Užo zanadta my pryvykli da kamfortu, a z zony kamfortu vyleźci i pačać vajavać… […] Ja nie dumaju, što kali zvarjaciełyja niejkija nacyki va Ukrainie nie zładziać pravakacyju… My nie padyšli, i vajavać nie budziem».
14 lutaha 2022 hoda
Niekalki tydniaŭ tamu Łukašenka sustrakaŭsia z byłym Staršynioj Viarchoŭnaj Rady Ukrainy Alaksandram Marozam. Padčas jaje jon vykarystaŭ inšyja vyrazy:
«Ja dakładna viedaju, što treba siońnia tut Zachadu. Treba raźviazać kanflikt. Jany ž, vy viedajecie, umiejuć čužymi rukami… A jašče lepš pavajavać čužymi rukami, čužymi ludźmi. Dy chaj hinuć tam — ukraincy, ruskija, biełarusy. Heta daloka. Ciapier hvałt: a, vajna, vajna … Pasłuchajcie, nu kali b płanavali niejkuju vajnu suprać Ukrainy, zusim pa-inšamu b pavodzili siabie ŚMI. [ … ] Jak tolki ścichajuć na imhnieńnie hetyja kryki pra vajnu va Ukrainie, z Amieryki znoŭ idzie sihnał, i hetaja isteryja pačynaje padahravacca.
A hetaja brachnia z nahody taho, što voś tut Łukašenka hatovy napaści na Ukrainu… Słuchajcie, mnie heta nikoli nie treba było, nie treba i ciapier».
18 lutaha 2022 hoda
Apošniaje abviaržeńnie było zroblenaje ŭ Maskvie, na bryfinhu z Pucinym:
«Nichto nie choča vajny i kanfliktaŭ. Nam heta nie treba. Ni rasijanam, ni biełarusam».
Siastra Kaleśnikavaj prapanavała ŭ Bruseli try kroki, jakija treba zrabić dla vyzvaleńnia palitviaźniaŭ27
Kamientary