Kab Minsk chutka nie zadychnuŭsia. Pa jakich cenach pradajuć novyja kvatery ŭ haradach-spadarožnikach
Učora padčas pracoŭnaha vizitu ŭ Babrujsk Łukašenka zajaviŭ, što treba raściahvać ludziej pa ŭsioj krainie, a nie ściahvać ich u stalicu. Vyrašyli pahladzieć, pa jakich cenach pradajuć kvatery ŭ novabudoŭlach u haradach-spadarožnikach Minska i inšych nasielenych punktach niedaloka ad MKAD.
Smalavičy
U Smalavičach pradajuć adrazu niekalki novych kvater biez ramontu na vulicy 40 hod Pieramohi, 59. Cana za mietr — ad 650$. Hety horad-spadarožnik znachodzicca prykładna ŭ 30 km ad MKAD. U im pražyvaje kala 20 tysiač čałaviek.
Dvuchpakajovyja kvatery biez adździełki z ahulnaj płoščaj 63 m² u hetych piacipaviarchovikach prapanujucca pa cenach ad 39 900 da 43 000 dalaraŭ.
Adnapakajoŭki płoščaj 42,5 m² vystaŭleny za 33 000 dalaraŭ, što składaje kala 775$ za «kvadrat» biez ramontu.
Łahojsk
Hety horad-spadarožnik z nasielnictvam kala 15 tysiač čałaviek taksama znachodzicca ŭ 30 kiłamietrach ad stalicy. Z hatovych kvater biez adździełki tut možna nabyć dvuchpakajoŭku sa svabodnaj płaniroŭkaj i ahulnaj płoščaj 57,6 m² pa canie 39 900 dalaraŭ (693 dalary za «kvadrat»).
Na sto dalaraŭ daražej pradajecca jašče adna kvatera sa svabodnaj płaniroŭkaj biez čystavoj adździełki. Za pamiaškańnie ahulnaj płoščaj 51,5 m² prosiać roŭna 40 000 dalaraŭ (777$ za mietr).
Dziaržynsk
U Dziaržynsku, jaki taksama ličycca spadarožnikam stalicy, pražyvaje kala 30 tysiač čałaviek. Adlehłaść ad MKAD — kala 30 km.
Za 41 990$ tut pradajuć dvuchpakajoŭku ahulnaj płoščaj 56,5 m². Heta kala 743$ za mietr kvadratny.
Fanipal
Ad Fanipala da stalicy — mienš za 20 kiłamietraŭ, u hetym haradku z nasielnictvam kala 17 tysiač čałaviek pradajuć adrazu niekalki kvater u domie, jaki budujecca.
Cana za mietr — 850-1138$. Adnapakajoŭka z ahulnaj płoščaj u 20 m² abydziecca prykładna ŭ 22 000 dalaraŭ.
Za dvuchpakajovuju kvateru pamieram 65,4 m² biez adździełki daviadziecca vykłaści 55 600 dalaraŭ.
U toj ža čas za adnapakajoŭku płoščaj 37 m² u zdadzienym domie biez čystavoj adździełki prosiać 40 000 dalaraŭ. Heta kala 1080 dalaraŭ za «kvadrat».
Aproč haradoŭ-spadarožnikaŭ, my vyvučyli prapanovy i ŭ inšych prystaličnych nasielenych punktach.
Astrašycki
U Astrašyckim, što ŭ 13 km ad MKAD, pradajuć trochpakajovuju kvateru ŭ domie 2021 hoda pabudovy za 66 900 dalaraŭ, ci pa 799$ za «kvadrat».
Navasielle
U ahraharadku Navasielle, što ŭ 14 km ad MKAD, možna kupić kvatery ŭ novabudoŭli pa canie kala 1050 dalaraŭ za mietr.
46 800 dalaraŭ prosiać za dvuchpakajoŭku z ahulnaj płoščaj 44,4 m². Unutry kvatery hołyja ścieny, zvonku —dobraŭparadkavanaja prylehłaja terytoryja z zonami dla adpačynku, a taksama ź dziciačymi i spartyŭnymi placoŭkami.
Mačuliščy
U haradskim pasiołku Mačuliščy (taksama 14 km ad MKAD) pradajuć kvateru płoščaj 43,5 m² sa svabodnaj płaniroŭkaj. Cana pytańnia 41 900 dalaraŭ, ci kala 960$ za mietr.
Kvatera taksama biez adździełki, a panaramnyja vokny vychodziać u dvor z zonaj dla adpačynku, dziaciačaj i spartyŭnaj placoŭkami.
Čytajcie taksama:
Ad 29 tysiač dalaraŭ. Jak vyhladajuć i kolki kaštujuć samyja tannyja kvatery Minska
Miesca dla rełaksu i adpačynku». Jakija dačy pa canie da 15 000$ pradajuć niepadalok ad Minska
«Aznačeńnie Biełarusi jak vypalenaj ziamli mnie nie padabajecca». Manałoh biełarusa, jaki niadaŭna źjechaŭ z krainy11
Kamientary