Hvałt i prymus da BDSM. Niła Hiejmana abvinavacili ŭ seksualnych złačynstvach

U 2024 hodzie piać žančyn abvinavacili jaho ŭ seksualizavanym hvałcie. Žurnalisty Vulture pahavaryli z čatyrma z hetych žančyn, a taksama z kalehami Hiejmana i znajomymi jaho siamji, kab raskryć padrabiaznaści spravy.

Hiejman ros u siamji paśladoŭnikaŭ carkvy sajentałohii, jakaja viadomaja žorstkimi mietadami ŭnutranaj dyscypliny. Jaho baćka byŭ aficyjnym pradstaŭnikom carkvy ŭ Vialikabrytanii, i ŭ dziacinstvie Nił sutykaŭsia z nasillem, što adlustravałasia ŭ jaho tvorčaści.

U svaim ramanie «Akijan u kancy darohi» jon apisvaje epizody, natchnionyja ŭłasnymi pieražyvańniami.

Asnoŭnaja častka rasśledavańnia Vulture pryśviečana historyjam piaci žančyn, jakija raskazali pra svaje adnosiny ź piśmieńnikam. Siarod abvinavačańniaŭ — prymus da seksualnych praktyk biez zhody, vykarystańnie ŭłady i finansavyja pahadnieńni, jakija zmušali žančyn maŭčać.

Historyja Kiendry Staut

18-hadovaja Kiendra Staut paznajomiłasia z Hiejmanam u 2003 hodzie ŭ Fłarydzie. Praz try hady Hiejman paklikaŭ dziaŭčynu na spatkańnie, paśla čaho pasprabavaŭ zaniacca ź joj seksam. Kali Kiendra paskardziłasia na bol, jon paprasiŭ nazyvać jaho «haspadarom» i zajaviŭ, što choča źbić jaje ramniom.

Pa słovach Staut, jana nie cikaviłasia BDSM, a Hiejman nie pytaŭsia, ci choča jana pasprabavać takuju ​​praktyku.

Niahledziačy na ​​hety dośvied, ich suviaź praciahnułasia: u 2007 hodzie Hiejman i Staut razam adpravilisia na adpačynak. U apošni dzień u dziaŭčyny vyjavilisia simptomy infiekcyi mačavych šlachoŭ — takija mocnyja, što jana nie mahła siadzieć.

Jana papiaredziła Hiejmana, što jany mohuć zaniacca seksam, ale biez praniknieńnia, tamu što joj baluča. Pavodle jaje słoŭ, «heta było ćviordaje «nie», ale Hiejman jaho praihnaravaŭ.

U kastryčniku 2024 hoda Kiendra źviarnułasia ŭ palicyju, abvinavaciŭšy jaho ŭ zhvałtavańni.

Historyja Skarlet Paŭłovič

Skarlet paznajomiłasia ź Niłam Hiejmanam zimoj 2022 hoda. Da hetaha jana bolš za paŭtara hoda mieła znosiny z Amandaj Pałmier, žonkaj Hiejmana.

Amanda časam zaprašała Paŭłovič na svaje viečarynki i prasiła pasiadzieć z synam u jakaści niani. U lutym 2022-ha Paŭłovič pavinna była pravieści ź dziciem ceły vychodny — i nie tolki ŭ domie Pałmier, ale i ŭ domie Hiejmana.

Muž i žonka znachodzilisia ŭ pracesie razvodu, ale pasialilisia ŭ susiednich damach na novaziełandskim vostravie Uaichieku, kab razam vychoŭvać syna.

Hiejman pryniaŭ Paŭłovič, pakazaŭ joj dom, a potym prapanavaŭ pryniać vannu ŭ jaho sadzie. Paŭłovič u vyniku pahadziłasia: dzicia ŭ hety momant było ŭ siabroŭ, a Hiejman skazaŭ, što jaho čakajuć spravy.

Adnak nieŭzabavie paśla taho, jak žančyna sieła ŭ vannu, piśmieńnik pryjšoŭ da jaje i prymusiŭ jaje da seksualnaha kantaktu — niahledziačy na ​​słovy Paŭłovič ab tym, što jana leśbijanka i što ŭ 15-hadovym uzroście ź jaje ździekavaŭsia 45-hadovy mužčyna.

Pa słovach žančyny, Hiejman prasiŭ nazyvać jaho haspadarom, a ŭ kancy zajaviŭ: «Amanda skazała, što ja nie zmahu ciabie zajmieć. U staryja dobryja časy my b abodva ciabie tr**nuli».

Paŭłovič hadzinu płakała pad dušam. Ale ničoha nie skazała Pałmier, a na nastupny dzień pahadziłasia na jaje prapanovu niejki čas pažyć na Uaichiek i dahledzieć za dziciem. U jaje byli na toj čas finansavyja ciažkaści.

Nastupnyja tydni Paŭłovič žyła napieramienku to ŭ domie Pałmier, to ŭ domie Hiejmana.

Pavodle jaje słoŭ, piśmieńnik prymušaŭ žančynu da hrubaha i źnievažalnaha seksu, biŭ jaje ramniom. Časam, pa słovach Paŭłovič, jana hublała prytomnaść ad bolu, a adnojčy Hiejman zaniaŭsia ź joj seksam, kali ŭ pakoi byŭ jaho syn.

Prykładna praź miesiac Hiejman źjechaŭ u Šatłandyju, i Paŭłovič raspaviała Pałmier, što ŭ ich byŭ seks. Jana skazała, što ŭ jaje «nie było vybaru», ale nie zhadała samyja žorstkija padrabiaznaści i nie nazvała heta hvałtam (tamu što ŭ toj momant tak nie ličyła).

Pałmier nie ździviłasia: «Z takimi apaviadańniami da mianie ŭžo prychodzili 14 žančyn», — skazała jana. Ale słovy ab tym, što Hiejman zajmaŭsia z Paŭłovič seksam pry dziciaci, jaje, vidać, šakiravali.

Pałmier paabiacała pakłapacicca pra Paŭłovič; jana źniała joj žyllo, zaprašała ŭ hości i akazvała maralnuju padtrymku.

Nił Hiejman kateharyčna admaŭlaje hetaje, jak i inšyja abvinavačańni, śćviardžajučy, što ŭsie adnosiny adbyvalisia pa ŭzajemnaj zhodzie. 

Niekalki prajektaŭ z udziełam piśmieńnika ŭžo byli admienieny, ale jaho karjera nie paciarpieła istotna. Prynamsi pakul što.

• 0
• 0
• 0
• 2
• 0
• 0
• 0
• 0