Raniej Śledčy kamitet nazvaŭ biełarusaŭ, u dačynieńni da jakich pačniecca śpiecyjalnaja vytvorčaść. U śpis trapiła piać čałaviek z Čornaj knihi Biełarusi i kaardynatary Fondu spartovaj salidarnaści. Čamu mienavita jany? Jakaja łohika zavočnych sudoŭ? «Naša Niva» sabrała niekalki mierkavańniaŭ.
ČKB — inicyjatyva, jakaja vykładała danyja siłavikoŭ i čynoŭnikaŭ, datyčnych da hvałtu i biezzakońnia. Biełaruski fond spartovaj salidarnaści dapamahaŭ represavanym atletam i źviartaŭsia da mižnarodnych spartovych struktur z zaklikam nie pravodzić u Biełarusi čempijanaty. Možna skazać, pazbaviŭ režym jaho lubimaj cacki — sportu.
Pradstaŭnik pa zakonnaści i pravaparadku Abjadnanaha pierachodnaha kabinieta Alaksandr Azaraŭ miarkuje, što heta źviazana z tym, što siłaviki prosta skončyli hetyja spravy i ciapier nakiravali takim čynam ich u sud.
«Nie pačali z BYPOL ci Cichanoŭskaj, tamu što heta dziejnaść razhladajecca imi ŭ jakaści praciahłaha złačynstva. Jano nibyta ździajśniajecca pa hety čas. Na prykładzie Łukašenki heta dobra vidać — jon zachapiŭ uładu, jon jaje ŭtrymlivaje, — miarkuje Azaraŭ. — Kali jamu ŭ budučyni budzie stavicca heta ŭ vinu, to čas učynieńnia hetaha złačynstva budzie, naprykład, z momantu zachopu i pa momant, kali ŭładu ŭ jaho adabrali. Tak i jany razhladajuć nas. Kanfiskacyja nieruchomaści — heta prosta dadatkovaja reč. U kaho jana jość — mohuć zabrać pa rašeńni suda», — kaža Alaksandr Azaraŭ.
Pavieł Łatuška, kiraŭnik NAU i pradstaŭnik pa tranzicie ŭłady Kabinieta, ličyć, što ŭ cełym pracedura zavočnych sudoŭ pryniata vyklučna z metaj akazańnia cisku na aktyvistaŭ demakratyčnaha ruchu.
«Heta jak pieršy krok, druhi — kanfiskacyja majomaści.
Čamu heta pačałosia ŭ adnosinach da tych ludziej, jakija składali Čornuju knihu Biełarusi? Prosta pomsta HUBAZiKa. Jany vielmi bajacca deananimizacyi svaich piersonaŭ, bo razumiejuć, što kryminalny pieraśled moža ažyciaŭlacca na praciahu ŭsiaho ich žyćcia. Złačynstvy, źviazanyja z hvałtam, nie majuć terminaŭ daŭniny.
Pačali ź ludziej z Čornaj knihi, bo razumiejuć, što ŭ adnosinach da ahulnaviadomych asobaŭ u demakratyčna-palityčnym ruchu Biełarusi heta atrymaje bolš šyroki mižnarodny rezanans», — razvažaje Łatuška.
«Asabista ja hatovy da adkrytaha sudovaha raźbiralnictva z vykarystańniem internetu, mesendžaraŭ. Hatovy ŭdzielničać», — kaža jon.
Suzasnavalnik fondu «Bajsoł» Andrej Stryžak ličyć, što pa astatnich bujnych arhanizacyjach rychtujucca bolš razhalinavanyja kryminalnyja spravy — «dzie buduć sprabavać zavieści suviazi pamiž strukturami, uklučać šmat fihurantaŭ».
«Kali pahladzieć, kaho vyłučyli ŭ hetym sensie z Čornaj knihi, to tam niašmat ludziej. Jany nie vielmi rubilisia za zbor niejkich dokazaŭ. Heta pieršaja maja dumka.
Pa-druhoje, mahčyma, što hetaja struktura była abranaja pieršaj dla patencyjnaha kryminalnaha pracesu, bo ČKB źjaŭlałasia niepasrednaj pahrozaj dla siłavikoŭ. Moža być, dla ich važna mienavita ich asudzić pieršymi, kab pakazać svaim paplečnikam, što jany niby abaronienyja.
Bujnyja struktury jany pakinuć na kaniec, kab pakazać, jakaja razhalinavanaja sietka była».
Kanfiskacyja majomaści, na dumku Stryžaka, — prosta adna z metaŭ, nieasnoŭnaja.
«Jany mohuć łupanuć sudy pa vypadkovych ludziach paśla ČKB, kab praciahvać praceduru zastrašvańnia. Łohika pry pazbaŭleńni hramadzianstva taksama ŭ hety bok», — razvažaje Andrej Stryžak.
Čytajcie taksama:
Łukašenka ŭzakoniŭ zavočnyja sudy pa kryminalnych spravach
Śledčy kamitet nazvaŭ biełarusaŭ, ź jakich pačnucca zavočnyja sudy
«Kazaŭ, što ŭ jaho maci ŭ zakładnikach i my ničoha nie razumiejem». Byłaja redaktarka ČKB pra situacyju z ahientam u kamandzie
Sudziać hiendyrektara BiełAZa. Pahražaje da 15 hadoŭ9
Kamientary
nie nibyta, a tak i jość. nie napracavałasia jašče ciocieńka... chaj jašče troški papracuje)
Realnaj dziejnaści - Zero.
Realnaha pryciahnieńnia złačyncaŭ da adkaznaści - Zero.
Uvieś płan Cichanoŭskaj - znajści svajo miesca pad soncam, realnaj mety źmieny ŭłady i nacyjanalizacyi jany nie majuć, jak i nie stavili raniej