Pryčynaj katastrofy na čyhuncy ŭ Indyi moh stać zboj sihnału. Modzi abiacaje pakarać vinavatych
Vyratavalnyja raboty na miescy sutyknieńnia troch ciahnikoŭ u Indyi zaviaršylisia — z-pad abłomkaŭ dastali ŭsich acalełych paciarpiełych. Zahinuła 275 čałaviek, paciarpieła minimum 2200 čałaviek.
Premjer-ministr krainy Narendra Modzi zajaviŭ, što vinavatyja ŭ čyhunačnaj katastrofie na ŭschodzie Indyi buduć «stroha pakaranyja», piša Bi-bi-si.
Vyratavalnyja raboty na miescy sutyknieńnia troch ciahnikoŭ u Indyi zaviaršylisia — z-pad abłomkaŭ dastali ŭsich acalełych paciarpiełych.
Jak minimum 275 čałaviek zahinuli, kali ŭ piatnicu pasažyrski ciahnik sutyknuŭsia z tavarnym ciahnikom, syšoŭ z rejek i ŭrezaŭsia ŭ inšy pasažyrski ciahnik, jaki ruchaŭsia ŭ procilehłym kirunku ŭ štacie Adyša na ŭschodzie krainy.
Raniej ułady kazali pra 288 zahinułych, ale paźniej źmienšyli ličbu: vyśvietliłasia, što pry padliku kolkaści achviar niekatoryja cieły paličyli dvojčy.
Ciažka paranienych dastaŭlajuć u najbujniejšuju balnicu štata Adyša, jakaja znachodzicca prykładna za try hadziny jazdy ad miesca avaryi. Ciapier tudy pryvieźli kala 2200 paciarpiełych, i ich kolkaść praciahvaje raści.
Premjer-ministr krainy Narendra Modzi naviedaŭ miesca zdareńnia. Jon taksama sustreŭsia z achviarami katastrofy ŭ balnicy i paabiacaŭ, što jaho ŭrad zrobić usio mahčymaje dla ich lačeńnia.
Da hetaha času da kanca nie jasna, što stała pryčynaj sutyknieńnia ciahnikoŭ, niaščaście nazyvajuć samaj strašnaj čyhunačnaj katastrofaj u Indyi ŭ hetym stahodździ.
Pavodle papiarednich danych, avaryja adbyłasia ŭ vyniku zboju sihnału, paviedamiŭ kiraŭnik Paŭdniova-Uschodniaj čyhunki K. Anand.
Taksama niajasna, jak ekspres apynuŭsia na adnym puci z tavarnym ciahnikom.
Niekalki vahonaŭ Coromandel Express apynulisia na procilehłym puci. Druhi ciahnik Howrah Superfast Express, jaki ruchaŭsia ŭ procilehłym kirunku ź Jesvantpura ŭ Chaŭru, sutyknuŭsia z vahonami, jakija sychodzili z rejek.
«Coromandel Express pavinien byŭ iści pa hałoŭnaj linii, ale zamiest hetaha byŭ dadzieny sihnał na pietlavuju liniju, i ciahnik urezaŭsia ŭ tavarniak, užo pryparkavany tam, — skazaŭ Anand. — Jaho vahony ŭpali na rejki z abodvuch bakoŭ, što taksama pryviało da sychodu z rejek ekspresa Howrah Superfast», — skazaŭ jon.
Jak raspavioŭ miascovym ŚMI nienazvany supracoŭnik čyhunki, papiaredniaje rasśledavańnie pakazała, što Coromandel Express syšoŭ z hałoŭnaj linii i zajechaŭ na inšyja rejki pietlavoha puci — bakavoha puci, jaki vykarystoŭvajecca dla stajanki ciahnikoŭ — i na chutkaści da 130 km/h urezaŭsia ŭ tavarniak.
Mašynisty dvuch pasažyrskich ciahnikoŭ atrymali ranieńni, ale vyžyli ŭ katastrofie.
Kamientary