BPC hatovaja pryniać prarasijskich manachaŭ z Kijeva-Piačerskaj łaŭry ŭ siabie, kali ich adtul vysielać 

Biełaruskaja pravasłaŭnaja carkva padchapiła rasijski prapahandyscki naratyŭ i pabudavała svaju zajavu na im. Pavodle BPC, «ukrainskija ŭłady praciahvajuć vierałomnyja zamachi na vialikuju śviatyniu ŭsich pravasłaŭnych viernikaŭ, nie pakidajučy biazbožnych sprobaŭ spustošyć kałysku pravasłaŭnaj viery ŭschodniesłavianskich narodaŭ», i heta, maŭlaŭ, niahledziačy na pratesty šmatlikich viernikaŭ i asudžeńnie mižnarodnaj supolnaści. 

Ijerarchija BPC biaduje, što nibyta isnuje vialikaja niebiaśpieka, što kaštoŭnaści mohuć być paškodžanyja ci zhublenyja pry hetym mierkavanym transpartavańni albo, što jašče strašniej, apynucca ŭ muziejach ci pryvatnych kalekcyjach.

Chvaluje Biełaruski ekzarchat RPC los nie tolki rečaŭ, ale i ludziej: «Parušeńniem zakanadaŭstva, demanstratyŭnym aktam pahardy da ahulnačałaviečych kaštoŭnaściaŭ i pravoŭ viernikaŭ źjaŭlajecca čarhovaje pradpisańnie Ministerstva kultury Ukrainy nasielnikam Kijeva-Piačerskaj łaŭry pakinuć terytoryju manastyra, a taksama vysokaja imaviernaść vyhnańnia manachaŭ z łaŭry».

U vypadku, kali takoje adbudziecca, u Biełarusi ŭžo hatovyja pryniać hetych manachaŭ na svajoj terytoryi.

Aktyŭnaja faza kanfliktu vakoł Kijeva-Piačerskaj łaŭry ciahniecca z sakavika hetaha hoda. Ukrainskaja pravasłaŭnaja carkva Maskoŭskaha patryjarchatu šmat hadoŭ biazvypłatna zajmała pamiaškańnie Kijeva-Piačerskaj łaŭry, na Piačerskich pahorkach raźmiaščaŭsia jaje mužčynski manastyr. Apošniaja damova adnosna hetaha była zaklučanaja padčas prezidenctva Viktara Janukoviča 19 lipienia 2013 hoda.

Adnak u pačatku sakavika Ministerstva kultury Ukrainy paviedamiła, što damova na biezapłatnaje karystańnie UPC Kijeva-Piačerskaj łaŭraj anulujecca z 29 sakavika 2023 hoda i heta tyčycca ŭsich pamiaškańniaŭ, jakija UPC u łaŭry aranduje.

Z toj pryčyny, što Kijeva-Piačerskaja łaŭra — ułasnaść ukrainskaj dziaržavy, to vysialeńnie adtul UPC robicca na padstavie vysnoŭ mižviedamasnaj pracoŭnaj hrupy, jakaja padčas svajoj pracy vyjaviła parušeńnie manastyrom umoŭ damovy pa vykarystańni dziaržaŭnaj majomaści.

UPC MP, u svaju čarhu, zajaŭlaje, što jurydyčnych padstaŭ dla takich krokaŭ niama i vysialeńnie mužčynskaha manastyra z Kijeva-Piačerskaj łaŭry — prosta «kapryz čynoŭnikaŭ ź Minkulta». Namieśnik Kijeva-Piačerskaj łaŭry mitrapalit Pavieł z pačatku krasavika znachodzicca pad chatnim aryštam, suprać jaho zaviedzienyja kryminalnyja spravy pa padazreńniach u raspalvańni mižrelihijnaj varožaści, apraŭdańni i admaŭleńni ŭzbrojenaj ahresii Rasii suprać Ukrainy.

• 1
• 0
• 1
• 5
• 0
• 1
• 8
• 0