Staralisia, ale nie vyjšła. Stylist raskazała, čamu vobrazy siaścior Hruździevych uvojduć u anały biełaruskaj mody
Śpiecyjalistka pa imidžy Kaciaryna Hardziejeva raźbiraje ŭbory śpiavačak i tłumačyć, čamu chajp — heta nie zaŭsiody dobra.
Estetyka i styl na biełaruskaj estradzie — daŭniaja i vostraja prablema. Ale kali dzivakavatyja vobrazy śpiavačak «staroha ešałona» źviazanyja ź ich ujaŭleńniem ab hustach svaich słuchačoŭ, to padkreślena durnavatyja vobrazy inšych źviazanyja sa sprobaj pryciahnuć uvahu.
Chajp na vyhladzie — pracoŭnaja stratehija. Reč u tym, što naša pamiać — składanaja sistema. Štodnia jana apracoŭvaje tysiačy bajtaŭ danych i sartuje toje, što treba pakinuć, ad taho, pra što možna zabycca. Lahčej za ŭsio ŭ joj zamacoŭvajecca infarmacyja, afarbavanaja mocnymi emocyjami: zachapleńniem, ździŭleńniem, hnievam, abureńniem, razdražnieńniem ci złościu. Ubačyŭšy kantent, jaki vyklikaŭ u nas chacia b adno z hetych pačućciaŭ, my naŭrad ci chutka jaho zabudziemsia, bo miechanizmy zapaminańnia ŭ hetym vypadku buduć pracavać na reflektornym uzroŭni.
Takim čynam, kali my bačym u miedyja ci sacyjalnych sietkach asobu z prykmietnym imidžam, my mižvoli vydzialajem jaje z natoŭpu i pačynajem za joj sačyć. Tak jarkija vobrazy dapamahajuć publičnym piersonam uvarvacca ŭ miedyjaasiarodździe i zamacavacca ŭ pamiaci aŭdytoryi.
Kali hulnia ŭ chajp vartaja śviečak
Chajp u pabudovie publičnaha imidžu vykarystoŭvajuć nie tolki pop-zorki i błohiery, ale i palityki. Naprykład, mer Tbilisi Kachabier Kaładze ad kiroŭnaj partyi Hruzii nabiraje dadatkovyja bały da rejtynha dziakujučy svajmu niefarmalnamu stylu.
Užyvajučy hety instrumient, nabiraŭ bały i inšy małady palityk — Habryel Boryč, prezident Čyli ad levych sił. Jon ustupiŭ u prezidenckuju honku ŭ 35 hadoŭ i budavaŭ pieradvybarnuju kampaniju, padkreślivajučy svaju maładość i enierhičnaść. Stratehii adpaviadała jaho i śmiełaje, i prostaje adzieńnie.
U hetych vypadkach chajpavy imidž zhulaŭ na ruku hierojam, bo jon byŭ pabudavany nie tolki na jarkim adzieńni. Za hetymi palitykami stajać realnyja spravy i doŭhaja praca na šlachu da palityčnych viaršyń. Chajpavać dziela chajpu, čakajučy pośpiechaŭ i słavy, nie majučy pry tym realnaha bekhraŭndu, — niebiaśpiečna. Vierniemsia na biełaruski estradny alimp i raźbiaromsia, čamu ž niebiaśpiečna.
Kali drenny hust — heta prosta drenny hust
Kali niama realnych dasiahnieńniaŭ, a ŭvahi vielmi chočacca, vialikaja spakusa pačać dabivacca jaje luboj canoj. Adnak, pravakujučy aŭdytoryju sprečnymi ŭborami i atrymlivajučy achopy ŭ sacyjalnych sietkach praź niehatyŭ, treba zadumvacca pra kančatkovy efiekt. Vynik takoha nieabačlivaha staŭleńnia da chajpu dobra bačny na prykładzie siaścior Hruździevych.
Za 30 hadoŭ na scenie siostram tak i nie ŭdałosia stać papularnymi śpiavačkami. Hruździevy zapisali niekalki piesień, jakimi biełaruskija radyjostancyi zatykali dzirki ŭ efirnym časie, źniali niekalki klipaŭ i nadoŭha adyšli ŭ niabyt. Druhoje žyćcio pryjšło da dueta ŭ žniŭni 2020 hoda, kali śpiavački apublikavali post u padtrymku Alaksandra Łukašenki. Ich zaŭvažyli praŭładnyja ŚMI i pačali zaprašać na šmatlikija intervju i tok-šou. Ale zornaja hadzina praciahvałasia niadoŭha: niaŭmieńnie trymać siabie na publicy i sačyć za movaj ścierła ich i z anhažavanych miedyja.
Viarnucca ŭ abojmu damy sprabavali praź dziŭnyja parnyja ŭbory, fatahrafii jakich jany vykładvali ŭ instahram. Vykarystoŭvali taksama i prykmietnyja kolery, i dziŭnyja miksy: naprykład, dapaŭniali kamplekty nieaktualnymi krasoŭkami na płatformie. Ale hulnia ź niestandartnymi vobrazami nie prynosiła plonu.
Uspłyć u miedyjaparadku im dapamoh čarhovy skandał. Vystupajučy na kancercie ŭ dziciačym łahiery, Hruździevy pažadali «zdochnuć» prezidentam ZŠA i Ukrainy, a taksama vykazali pierakananaść, što taho ž čakajuć i ŭsie ŭkrainskija dzieci.
Pasaž zavirusiŭsia, i siostry znoŭ atrymali hłytok uvahi. Zrešty, na prarasijskim kantencie jany sprabavali chajpavać daŭno. Tak, na śviatočnym kancercie, pryśviečanym 23 lutaha i 105-hodździu Uzbrojenych sił Respubliki Biełaruś, jany źjavilisia va ŭborach, jakija simvalizujuć «rodnasnuju» suviaź Biełarusi i Rasii.
Tady fota taksama raźlacielisia pa pablikach — praŭładnych i niedziaržaŭnych.
Adnak drenny hust choć i zabiaśpiečyŭ siostram padvyšanuju ŭvahu, ale ŭ doŭhaterminovaj pierśpiektyvie nie hulaje im na ruku. Padładžvacca pad chajp niebiaśpiečna: publika budzie čakać ad hierojaŭ novych vychadak i ŭsio bolš niezvyčajnych łukaŭ. A kali akramia skandałaŭ i drenna padabranaha adzieńnia prapanavać niama čaho, tamu, chto chajpuje, davodzicca iści na pavadku ŭ aŭdytoryi i ŭvieś čas pavyšać hradus drennaha hustu. Jak vynik — nieŭzabavie ŭ pamiaci hramadskaści čałaviek pačynaje ŭstojliva asacyjavacca vyklučna z manieraj apranacca.
Tamu adno sapraŭdnaje dasiahnieńnie siostram Hruździevym usio ž možna zaličyć. Kali niekali budzie napisanaja encykłapiedyja sučasnaj biełaruskaj mody, jany ŭvojduć tudy jak rekardsmienki pa kolkaści sprečnych łukaŭ.
Čytajcie taksama:
«Šanel» i Apple Watch za $17 000. Što nosiać biełaruskija čynoŭnicy VIDEA
Kašuli na humcy i štany navyrast. Novy dres-kod Łukašenki moža nas mnohamu navučyć
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary