Da čaho moža pryvieści zakryćcio jašče dvuch punktaŭ propusku na miažy ź Litvoj
Kamisija pa nacyjanalnaj biaśpiecy Litvy ŭ aŭtorak prapanavała spynić pracu dvuch z čatyroch punktaŭ propusku na miažy ź Biełaruśsiu i pryniać inšyja abmiežavańni, kab skaracić patok biełarusaŭ. Ideju padtrymała MUS Litvy, ale kančatkovaje rašeńnie budzie za ŭradam. «Naša Niva» tłumačyć, jak hetaje zakryćcio adabjecca na biełarusach.
Letaś byli tolki «kvietački»
Da zakryćcia dvuch punktaŭ propusku ŭ žniŭni 2023 hoda na biełaruska-litoŭskaj miažy funkcyjanavali šeść aŭtadarožnych pierachodaŭ.
Kali ŭrad Litvy prymie prapanovu Kamisii pa nacyjanalnaj biaśpiecy spynić pracu punktaŭ propusku «Rajharad» («Pryvałka») i «Łavaryški» («Katłoŭka»), zastaniecca tolki dva KPP: «Šalčaninkaj» («Bieniakoni») i «Miedniki» («Kamienny Łoh»).
I kali letaś litoŭski bok spyniŭ pracu dvuch niaznačnych punktaŭ propusku, to zakryćcio «Pryvałki» i «Katłoŭki» stanie adčuvalnym udaram pa pasažyrskich i hruzavych pieravozkach.
Prapusknaja zdolnaść ciapier zakrytych «Vidzaŭ» (ź litoŭskaha boku «Ćvierač») składała 144 lehkavyja aŭto ŭ sutki i 96 hruzavikoŭ na vyjezd i tolki 30 na ŭjezd u Biełaruś. Pryčym praz «Vidzy» moh jechać tolki parožny hruzavy transpart.
Druhi zakryty letaś punkt propusku «Łoša» (ź litoŭskaha boku «Šumsk») byŭ pryznačany tolki dla ruchu lehkavoha transpartu i mieŭ prapusknuju zdolnaść 250 mašyn u sutki.
U sumie letaś prapusknaja zdolnaść skaraciłasia na 394 lehkaviki i 30-96 parožnych hruzavikoŭ u sutki. To-bok ich zakryćcio amal nie zakranuła śfieru hruzapieravozak.
U vypadku z «Pryvałkaj» i «Katłoŭkaj» situacyja vyhladaje pa-inšamu. Prapusknaja zdolnaść «Pryvałki» składaje 250 lehkavych i 230 hruzavych aŭto. «Katłoŭki» — 320 lehkavych i 250 hruzavych aŭto ŭ sutki.
Praŭda, varta adznačyć, što ŭžo davoli praciahły čas praz hetyja punkty zvyčajna prajazdžaje našmat mienš transpartu, čym praduhledžana normaj, asabliva ŭ vypadku z hruzavym transpartam.
Hrodna pieraŭtvorycca ŭ horad-tupik
Zakryćcio «Pryvałki» bolš za ŭsio zakranie žycharoŭ Hrodna. Abłasny centr, jaki znachodzicca ŭ niepasrednaj blizkaści da Polščy i Litvy, pieraŭtvorycca ŭ tupik.
Adlehłaść ad Hrodna da Biełastoka — 80 kiłamietraŭ. Tak było, pakul funkcyjanavaŭ punkt «Bruzhi» («Kuźnica»), jaki polski bok zakryŭ u adkaz na ataku mihrantami jašče vosieńniu 2021 hoda. Kali ŭ adkaz na prysud Andžeju Pačobutu paźniej zakryli «Babroŭniki», adlehłaść pamiž haradami ŭzrasła da 240 kiłamietraŭ.
Ciapier samy karotki šlach z Hrodna da Biełastoka pralahaje praz punkt «Pryvałka» («Rajharad»). Kali i jaho zakryjuć, to šlach z Hrodna da Biełastoka budzie składać 422 km, kali jechać praz «Brest», i 475 km, kali praz «Bieniakoni».
Zakranie ŭsich
Ale ad zakryćcia jašče dvuch punktaŭ propusku pacierpiać nie tolki žychary Hrodna.
Čerhi z hruzavikoŭ na miežach Biełarusi i ES majuć piermanientny charaktar. Naprykład, pa stanie na 8 lutaha vyjezdu ź Biełarusi ŭ ES čakali amal 1000 vielikahruzaŭ, 800 ź ich — na miažy ź Litvoj.
Zakryćcio jašče dvuch punktaŭ propusku niepaźbiežna pryviadzie da pavieličeńnia čerhaŭ. Heta adabjecca na časie dastaŭki tavaraŭ, što ŭ svaju čarhu paŭpłyvaje na rost taryfaŭ na pieravozku. U vyniku dadatkovyja vydatki na łahistyku lahuć na plečy kančatkovych pakupnikoŭ.
Stanie jašče składaniej dabiracca tym biełarusam, jakija pracujuć u krainach ES. Asabliva mocna heta zakranie dalnabojščykaŭ, jakija paśla kožnaj kadencyi jeduć na adpačynak damoŭ. A heta dziasiatki tysiač ludziej. U litoŭskich transpartnych kampanijach bolšaść kiroŭcaŭ hruzavikoŭ — zamiežniki. Na pieršym miescy iduć mienavita hramadzianie Biełarusi.
Pasažyrskija pieravozčyki buduć vymušanyja pavysić ceny na svaje pasłuhi, jak heta ŭžo nie raz adbyvałasia paśla taho, jak susiednija krainy ES zakryvali punkty propusku. Tak, naprykład, da zakryćcia «Babroŭnikaŭ» bilet Hrodna-Biełastok kaštavaŭ 60 rubloŭ, paśla cana vyrasła da 100.
Zakryćcio punktaŭ propusku — nie adzinaje abmiežavańnie
Aproč zakryćcia dvuch punktaŭ propusku, litoŭskaja Kamisija pa nacyjanalnaj biaśpiecy prapanuje pastupova skaračać rehularnyja pasažyrskija aŭtobusnyja pieravozki ŭ Biełaruś.
Kamisija taksama prapanavała abmiežavać pasadku i vysadku pasažyraŭ na pamiežnym punkcie čyhunki «Kiana» (i ŭ Kibartaj), kab vyrašyć prablemu, jakaja źjaŭlajecca, kali asoby, jakija jeduć tranzitnymi ciahnikami ŭ Kalininhrad, vysadžvajucca ŭ Litvie. U Kianie vychodziać abo sadziacca kala 13 tysiač čałaviek u hod.
Litoŭski bok śćviardžaje, što vyšejzhadanyja inicyjatyvy nakiravanyja na vyrašeńnie prablem nacyjanalnaj biaśpieki, kantrabandy i parušeńnia mižnarodnych sankcyj.
«Naša Niva» — bastyjon biełaruščyny
PADTRYMAĆČytajcie taksama:
Kiraŭnik MUS Litvy padtrymała zakryćcio dvuch punktaŭ na miažy ź Biełaruśsiu: Nacyjanalnaja biaśpieka — pryjarytet №1
«Zakryvajučysia ad biełarusaŭ, Zachad mižvoli šturchaje ich da Rasii»
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary