«Infarmacyju pra mianie źlivaŭ chtości z apazicyi». Aktyvist Aksionaŭ, jakim manipulavała KDB, pajechaŭ na zarobki ŭ Kanadu
U kancy 2023 hoda šmat havaryli i kazali pra aktyvista BCHD Aleha Aksionava, jaki staŭ udzielnikam kadebisckaj śpiecapieracyi. Čekisty praciahły čas im manipulavali pad vyhladam pradstaŭnikoŭ Jeŭrasajuza. Kali praŭda ŭskryłasia, Aksionaŭ pieražyŭ emacyjna niaprosty čas i straciŭ častku paplečnikaŭ. Ciapier jon na zarobkach u Kanadzie. A čekist, jaki kiravaŭ apieracyjaj, pajšoŭ na pavyšeńnie.
«U majoj situacyi hublacca i kidacca ŭ paniku sensu niama»
Z toj historyi minuła 4 miesiacy. Spačatku Aleh Aksionaŭ byŭ pad miedyjnaj uvahaj. Jaho vypytvali, jak jon moh trapić u takuju situacyju. Zatym aktyvist prapaŭ. Jaho sacyjalnyja sietki zmoŭkli. Kudy Aksionaŭ padzieŭsia, nie viedali navat bližejšyja paplečniki.
Adšukany aktyvist kaža, što i raniej nie byŭ asabliva publičnaj asobaj. Paśla historyi z čekistami achvoty kamunikavać z presaju ŭ jaho zusim niama.
Pa słovach Aksionava, jon vyjechaŭ u Kanadu, bo źjaviłasia mahčymaść padzarabić. Tam aficyjnaja praca pa kantrakcie, a paśla płanuje viarnucca ŭ Polšču, dzie pierabyvaŭ u vymušanaj emihracyi z 2022 hoda.
Aktyvist kaža, što na pačatku niepryjemnaj dla jaho historyi jamu emacyjna było niaprosta. Śpis kantaktaŭ źmienšyŭsia. Była nieabchodnaja padtrymka. Ale ciapier varožaha asiarodździa vakoł jaho niama.
«Niehatyŭny nalot ad mianie adlacieŭ. Sapraŭdnyja siabry zastalisia pobač. Jany ŭsio zrazumieli. Siarod tych, chto pierastaŭ vychodzić na suviaź, važnych dla mianie ludziej nie było», — havoryć Aksionaŭ.
Na pytańnie, čamu pahadziŭsia na «aŭdytarstva» adkazvaje, što ŭ prapanovie ŭhledzieŭ «mahčymaść pradstavić Jeŭrasajuzu novyja i sapraŭdy karysnyja zhurtavańni biełarusaŭ u zamiežžy».
Aksionaŭ zaŭvažaje, što ŭ jaho situacyi hublacca i kidacca ŭ paniku sensu niama. Treba rabić pracu nad pamyłkami: što prapuściŭ, dzie prakałoŭsia, jak pajšoŭ na kantakt. Usio heta zroblena. I na siońnia jon praciahvaje pracu.
«Pakryŭdzić čałavieka niedavieram — samaje brydkaje»
Aleh Aksionaŭ kaža, što kali vyrvaŭsia ŭ volny śviet ź Biełarusi, apanavanaj hvałtam, pilnaść prytupiłasia. Na radzimie davodzicca praličvać napierad kroki, kab nie trapić pad pieraśled. Pradumvaješ, što, dzie i jak skazać. U demakratyčnaj krainie zdajecca, što nikoha nie cikaviš, ale heta nie tak.
«Jość pobač ludzi, jakija pracujuć na śpiecsłužby režymu i robiać heta davoli plonna», — pierakanany jon.
Aktyvist raić tym, chto staronicca publičnaści, dziejničać cichutka, bo dobryja spravy, pavodle jaho, patrabujuć cišyni.
Ciapier Aksionaŭ kamunikuje tolki ź ludźmi, u jakich pierakanany.
Ale ad svajho asnoŭnaha žyćciovaha praviła — što daviarać čałavieku treba da taho momantu, pakul jon nie dakaža, što nie varty taho, — admaŭlacca nie źbirajecca.
«Pakryŭdzić čałavieka niedavieram — samaje, na moj pohlad, brydkaje», — ličyć Aksionaŭ.
«Da mianie razvodzili i paśla mianie buduć, bo jany pracujuć»
Aleh Aksionaŭ pryznaje, što kadebisty jaho raźviali, ale ličyć, što ad hetaha nichto nie paciarpieŭ. Sakretnaj infarmacyi jon im nie pieradavaŭ, a taja, što źjaviłasia ŭ ich, była ŭ publičnym dostupie.
Jon zaŭvažaje, što tolki na finišy historyi stała zrazumieła, što jon kamunikavaŭ z sumnieŭnymi asobami.
Adrazu ž usio było abstaŭlena tak, što ŭ jaho nie zjaviłasia ni kaliva sumnievu pra manipulavańnie. Usio było vielmi dobra adpracavana, ličyć aktyvist.
Jon pierakanany, što ab im praciahły čas źbirali infarmacyju, jakuju źlivaŭ chtości z apazicyjnaha asiarodździa.
«Jany vałodali źviestkami ab majoj dziejnaści za apošnija paŭhoda. Spasyłalisia ŭ hutarcy na sapraŭdnyja akaličnaści. Čałaviek, jaki nazvaŭsia pradstaŭnikom Jeŭrasajuza, byŭ infarmavanym čałaviekam», — adznačaje Aksionaŭ.
Aktyvist zapeŭnivaje, što čekisty vyrašyli skarystać jaho ŭ svajoj hulni, kab adyhracca za parazu. Maŭlaŭ, kali siłaviki pryjšli pa Aksionava, jamu ŭdałosia vyjechać ź Biełarusi. Takim čynam, ličyć aktyvist, jon ich ašukaŭ.
«Mahčyma, što kadebistam nie spadabałasia, čym ja zajmaŭsia na emihracyi, tamu vyrašyli skampramietavać mianie», — dadaje Aksionaŭ. «Jany byli zacikaŭlenyja, kab maje kantakty z polskimi palitykami byli spynienyja. Svajho jany amal što damahlisia», — adznačaje jon.
Pry hetym Aksionaŭ zapeŭnivaje, što na siońnia nijakich pretenzijaŭ z boku polskich, a taksama struktur ź inšych krain da jaho niama. Jon, kaža, što tam pracujuć daśviedčanyja ludzi i jany ŭsio zrazumieli.
«Da mianie razvodzili i paśla mianie buduć razvodzić. Jany ž taksama pracujuć», — kaža aktyvist.
Jon kaža, što kantakty čekistaŭ, ź jakimi kamunikavaŭ, źnikli nieŭzabavie paśla sieminaru pa biaśpiecy. Byčak ža atrymaŭ pavyšeńnie.
«Kožny maje prava na pamyłku»
Aleh Aksionaŭ ličyć, što historyja ź im była razdźmutaja presaj, a jaho zrabili vinavatym za raniejšyja prakoły apazicyi. Naprykład, incydent sa źlivam źviestak z Čornaj knihi byŭ spuščany na tarmazach. Na dumku aktyvista, žurnalisty byli zacikaŭlenyja ŭ tym, kab pryviazać jaho historyju da situacyi, jakaja raniej adbyłasia z Volhaj Kavalkovaj.
Aksionaŭ spasyłajecca na svajo intervju «Biełsatu», dzie jaho padpisali «siabram Kaardynacyjnaj rady». A jaho ŭ ciapierašnim składzie niama. Jon kaža, što źviarnuŭ uvahu viadučaha na niedakładnaść, ale pierad im i hledačami, uviedzienymi ŭ zman, «Biełsat» nie vybačaŭsia.
«Heta śviedčyć pra toje, što kožny maje prava na pamyłku», — robić vysnovu Aksionaŭ.
Aktyvist nazyvaje svajoj dušeŭnaj patrebaj «ubačyć volnuju i niezaležnuju Biełaruś, być aporaj dla maci, hadavać unukaŭ». Jon choča pracavać nad stvareńniem krainy dla hodnaha žyćcia, dzie nie budzie miesca hvałtu, a chryścijanskija pryncypy buduć u asnovie zakanadaŭstva».
***
U čym była sutnaść apieracyi KDB?
Aleh Aksionaŭ naviedvaŭ roznyja apazicyjnyja mierapryjemstvy i asiarodki, a potym dasyłaŭ zdabytuju infarmacyju kurataru.
Sprava była abstaŭlena tak, što Aksionaŭ vykonvaŭ rolu aŭdytara. Jamu daručyli manitoryć raschodavańnie hrantaŭ na padtrymku biełaruskaj apazicyi.
Praŭda ŭskryłasia ŭ listapadzie 2023 hoda na sieminary pa biaśpiecy, dzie pierad udzielnikami ŭ pramym efiry vystupiŭ nie čakany pradstaŭnik Jeŭrasajuza, a zahrymiravany prapahandyst Ihar Tur i supracoŭnik KDB Kanstancin Byčak. Udzielniki mierapryjemstva jaho źjaŭleńnie na ekranie ŭspryniali spačatku žartam.
Paźniej pa biełaruskim telebačańni vyjšaŭ prapahandyscki film z apoviedam, jak čekisty manipulavali palitemihrantam.
Ničoha pryncypovaha novaha ŭ stužcy skazana nie było, ale śpiecsłužbisty mahčyma zavałodali imionami ŭdzielnikaŭ mierapryjemstvaŭ, na jakich byvaŭ Aksionaŭ. Jon paćvierdziŭ, što za svaje spravazdačy atrymlivaŭ hanarary.
***
59-hadovy Aleh Aksionaŭ — aficer zapasu z Mahilova, pa svajoj armiejskaj śpiecyjalnaści — viertalotčyk. Da Biełaruskaj chryścijanskaj demakratyi jon dałučyŭsia ŭ 2010 hodzie. U 2013-m staŭ mahiloŭskim kaardynataram partyi, jakuju łukašenkaŭcy ŭparta nie chacieli rehistravać. Biełaruś Aksionaŭ pakinuŭ u lutym 2022 hoda, vyjechaŭ u Polšču. Na čužynie jon pracavaŭ achoŭnikam i hruzčykam.
«Naša Niva» — bastyjon biełaruščyny
PADTRYMAĆHladzicie taksama:
Za miažu jeździŭ usiaho try razy. Što viadoma pra samaha publičnaha śpikiera KDB
Na TB pakazali dopyt «dyviersantaŭ» i namiaknuli, što ich metaj była pravakacyja ŭ Rasii
U KDB raskazali, dzie rychtujuć dobraachvotnikaŭ dla vyzvaleńnia Biełarusi
Łukašenka choča, kab kiraŭniki rajvykankamaŭ pryznačali i dyrektaraŭ pryvatnych struktur16
Kamientary