Praciah prykvieła da kultavaj «Hulni tronaŭ» akazaŭsia zusim nie takim, jakim jon ujaŭlaŭsia paśla kancoŭki pieršaha siezona. Razabralisia, u čym padmanuli hledačoŭ i kali vyjdzie novaja historyja ŭ śviecie Viesterosa.
Aściarožna, jość spojlery!
Sieryjał ad HBO raspaviadaje pra Taniec Cmokaŭ — dynastyčny i hramadzianski kanflikt u Siami karaleŭstvach, jaki razhareŭsia paśla śmierci Vizerysa I Tarharyjena, kali jahonaja pieršarodnaja dačka i zakonnaja spadčyńnica Rejnira Tarharyjen (rolu vykanała Ema D'Arsi), padtrymanaja partyjaj «čornych», i jahony syn ad druhoha šlubu, Ejhan Tarharyjen (Tom Hlin-Karni), padtrymany partyjaj «zialonych», adnačasova zajavili svaje pravy na Žalezny tron.
Pieršy siezon, jaki vyjšaŭ dva hady tamu, mieŭ hrandyjozny pośpiech siarod hledačoŭ, jakija zasumavali pa Viesterosie paśla zaviaršeńnia «Hulni tronaŭ» u 2019 hodzie. Jahony pośpiech tłumačyŭsia nie tolki šyrokaj bazaj fanataŭ, ale sapraŭdy vydatnaj pracaj usich adkaznych za vychad sieryjała śpiecyjalistaŭ. Dyjałohi piersanažaŭ, siužetnyja akcenty i hulnia akcioraŭ byli na vysokim uzroŭni, choć kamuści jon i moh padacca zanadta kamiernym.
Cmoki zamiest usiaho
Adrazu paśla premjery pieršaha siezona z pasady šouraniera sieryjała pajšoŭ Mihiel Sapočnik, jaki byŭ aburany tym, što HBO nie padtrymlivaje kumaŭstvo i nie žadaje najmać jahonuju žonku Aleksis Rabien na pazicyju supradziusara. Šouranieram druhoha siezona zastaŭsia jahony mienš daśviedčany kaleha Rajan Kondał.
Druhi siezon, jaki składajecca z 8 sieryj, raspačaŭsia 16 červienia i zaviaršyŭsia 5 žniŭnia, pakinuŭšy supiarečlivyja ŭražańni.
Kondał abiacaŭ, što druhi siezon budzie bolš vidoviščnym i dynamičnym. Trejlery da novaha siezona byli nasyčany kadrami bajoŭ, pahoń, hroznych fłatylij i palotaŭ na cmokach, dajučy zrazumieć, što kanflikt budzie sapraŭdy maštabnym i epičnym.
Ale ŭsio akazałasia zusim nie tak. Za ŭvieś siezon nam pakazali tolki adnu bitvu pry Hračynym Prytułku — nie vielmi maštabnuju, ale adrazu z tryma cmokami ŭ niebie i trahičnymi nastupstvami.
Na hetym ź bitvami ŭsio. Jość łakalnyja kanflikty i sutyčki, jakija nam nie pakazvajuć, ale jakija raskryvajuć vobrazy hierojaŭ sieryjała. Uvieś siezon litaralna jak toj animavany miem, dzie hruzavik na poŭnaj skoraści mčycca na słup, jaho pakazvajuć z roznych bakoŭ, voś-voś budzie epičnaje sutyknieńnie, ale jaho tak i nie adbyvajecca.
Za raściahnutaść siužeta paprakali i pieršy siezon. Ale tam u 10 sieryj źmiaścili 20 hadoŭ žyćcia dynastyi Tarharyjenaŭ, a ŭ druhim na 8 sieryj raściahnuli litaralna tydni, maksimum miesiacy, u jakija amal ničoha nie adbyvajecca.
«Čornaja» karaleva Rejnira na Cmokavym kamiani cełymi dniami zasiadaje ŭ radzie, členy jakoj mocna razdražniajuć i samu karalevu, i hledačoŭ, jejny muž-kansort Dejman palacieŭ u praklaty napaŭzrujnavany Charenchoł źbirać vojska dla vajny.
Na inšym baku «zialonyja» trymajuć abaronu Karaleŭskaj havani i sklikajuć vojski svaich prychilnikaŭ. Syny Alisenty, «zialony» karol Ejhan II i jahony adnavoki brat Ejmand, čyja pycha i pryviała da adkrytaha procistajańnia, napoŭnicu prajaŭlajuć svoj paskudny charaktar, a sir Krystan Kol navodzić strach u Karaleŭskich ziemlach, kab vasały nie pierabiehli na bok Rejniry.
Hetaja marudlivaść siužeta, zdajecca, stała adnoj z hałoŭnych pryčyn razdražnieńnia hledačoŭ, jakija čakali zusim inšaha rytmu. Ale varta skazać, što pieršyja siezony aryhinalnaj «Hulni tronaŭ» taksama składalisia pieravažna ź biaskoncych razmoŭ, skandałaŭ, intryh i rasśledavańniaŭ, jakija nie vielmi dobra kančalisia dla cikaŭnych. Prosta heta ŭsio padzabyłasia pad uražańniem ad dynamičnych finalnych epizodaŭ «Hulni tronaŭ».
U «Domie Cmoka» prablema chutčej nie ŭ marudlivaści, a ŭ nieabaviazkovych scenach. Scenarysty i režysiory byccam byli zahnanyja ŭ pastku — napoŭnić niečym 8 sieryj «dziŭnaj vajny», nievialiki pramiežak času pamiž jaje farmalnym pačatkam i realnymi bajavymi dziejańniami. Spraŭlajucca pa-roznamu: niekatoryja sieryi sapraŭdy pravalnyja, chočacca zaleźci ŭ telefon i pahartać stužku navin. Ale inšyja hladziacca z poŭnym zachapleńniem.
Niechta z kinakrytykaŭ nazyvaje vialikuju kolkaść cmokaŭ ledź nie adzinaj pieravahaj novaha siezona sieryjała. Cmokaŭ tut sapraŭdy vielmi šmat, jany raznastajnyja pa vyhladzie i pa charaktary, vakoł ich jak «supierzbroi» i simvała boskaj ułady Tarharyjenaŭ krucicca značnaja častka siužeta. Ale zusim nie za cmokaŭ my lubim historyi pra Viesteros.
Niahledziačy na ŭsie niedachopy, heta ŭsio jašče vielmi talenavitaja karcina z cudoŭnym vizualnym radam i niepaŭtornaj atmaśfieraj. Kali pryhledzicca da siezona bolš uvažliva, to možna zaŭvažyć, što jon zakranaje vielmi sučasnyja prablemy.
Mužčyny suprać žančyn
Taniec Cmokaŭ, hramadzianskaja vajna, jakaja pačynałasia jak kanflikt dźviuch «partyj» adnoj dynastyi ŭ baraćbie za ŭładu, u novym siezonie raskryvajecca zusim pa-inšamu.
Ale nasamreč kanflikt palahaje pamiž ahresiŭnym śvietam mužčyn, jaki žadaje kryvi paśla doŭhaha miru i hatovy pahruzić Viesteros u kryvavy chaos, i žančynami, z-za jakich byccam by ŭsia historyja i pačałasia, ale jakija nasamreč nie chočuć vajny, a chočuć źbierahčy svaich blizkich i ŭ žachu ad taho, što robiać mužčyny. Heta šturchaje ich da dziŭnych dziejańniaŭ.
U pieršym siezonie pakazali składanyja stasunki pamiž Rejniraj i Alisientaj, kolišnimi siabroŭkami, jakich pasvaryli dynastyčnyja hulni pry dvary, ale kožnaja ź jakich zachoŭvaje nadzieju na mudraść ci miłasernaść inšaj.
Da mocnych žančyn ź sieryjała naležyć i Rejnis, jakaja zaniała bok «čornych» i mieła šaniec adnym krykam «drakarys» źniščyć usiu siamju Alisienty, to-bok partyju «zialonych», ale nie zrabiła hetaha — jana sama straciła ŭ ahni syna i nie mahła pastupić tak z čužymi dziećmi, tym bolš svaimi blizkimi svajakami. Ciapier ža, baroniačy siamju Rejniry na svajoj Čyrvonaj karalevie, Rejnis hinie ŭ bai z tymi, kaho zusim niadaŭna paškadavała. Mužčynski śviet nie daruje santymientaŭ i miakkaciełaści.
Hetaje supraćpastaŭleńnie trochi spraščaje mužčynskija vobrazy ŭ sieryjale, pieratvarajučy charyzmatyčnych i nieadnaznačnych piersanažaŭ u karykaturnych durniaŭ i złačyncaŭ. Vajna pamiž partyjami akazvajecca vajnoj usich suprać usich.
Brat idzie na brata. U siezonie jość emacyjny epizod, u jakim sutykajucca bliźniaty-rycary Eryk i Aryk, jakija zaniali roznyja baki kanfliktu. U bratazabojčaj bojcy hinuć abodva — hety simvaličny vobraz byccam pradkazvaje vynik hramadzianskaj vajny pamiž Tarharyjenami.
Z «zialonaj» rady vyvodziać karalevu-maci Alisientu, jakaja nie choča pieramohi ŭ vajnie canoj biaskoncych achviar. Za jaje nie zastupajucca ni paluboŭnik sir Krysten Kol, ni majstar nad šaptunami Łarys Stronh, čyje devijacyi jana zadavalniała svaimi nožkami. Ni seksualnaja suviaź, ni maciarynskaja nie źjaŭlajucca važnymi dla mužčyn u sieryjale, jany lohka zdradžvajuć im dziela ŭłasnych «pacanskich» spraŭ — pomsty, vajny i ŭłady.
Karaleŭskaja rada «čornych» niedvuchsensoŭna namiakaje Rejniry, što jana ŭsiaho tolki žančyna, prapanujučy abo słuchacca ich, abo davierycca svajmu mužu Dejmanu, jaki sam prahnie sieści na Žalezny tron. Nieabdumanyja dziejańni Dejmana pryvodziać da žudasnaj raspravy nad niavinnym dzicionkam Chelejny, siastry i žonki Ejhana II.
Dejman, čyje dziejańni Rejnira asudžaje, źlataje ŭ Charenchoł źbirać vojski, ale paśla ciažkaj razmovy sama karaleva ŭžo nie ŭpeŭniena dla kaho — dla jaje, ci dla siabie. Adkaz na hetaje pytańnie jana atrymlivaje tolki ŭ apošniaj sieryi siezona.
Rejnira znachodzić praktyčnuju i maralnuju padtrymku ŭ asobie špijonki Misaryi, jakaja stała saboj, kali prajšła praz hvałt baćki. Ź joj u karalevy zaviazvajucca ramantyčnyja adnosiny ŭ adsutnaść muža. U Alisienty ž nie zastajecca anijakaj padtrymki i jana addajecca eskapizmu, uciokam ad siabie i vajny.
Darečy mienavita Alisienta akazvajecca samym hłybokim piersanažam u hetym siezonie, zdolnym pryznavać svaje pamyłki i straści, daravać inšym, razumieć kaštoŭnaść žyćcia, prymać samyja niaprostyja rašeńni ŭ svaim žyćci i pry hetym zastavacca čałaviečnaj.
Hulnia Alivii Kuk byccam ciahnie ŭvieś siezon na svaich plačach.
U hetym kryvavym šale asabliva ŭražvajuć pieramovy Rejniry i Alisienty. Spačatku adna prabirajecca ŭ samaje łohava voraha, kab z voka na voka parazmaŭlać z byłoj siabroŭkaj. A ŭ samym kancy siezona, kali kanflikt, zdavałasia b, nijak užo spynić niemahčyma, adbyvajecca jašče bolš nievierahodnaja lustranaja scena — Alisienta źjaŭlajecca ŭ zamku Rejniry. Jana prosta choča žyć i kab žyli jaje dzieci, nijakaja ŭłada joj nie patrebna. I ŭ dźviuch karaleŭ navat atrymacca na zusim niaprostych umovach, ale damovicca pra zakančeńnie vajny.
Zdajecca, užo zaraz vidavočna, što mužčyny nie daduć im vykanać zadumanaje, ale pabačym u nastupnym siezonie.
Nie bohi
Jość u sieryjale i vostry sacyjalny kanflikt. Dynastyčny razład prymušaje Tarharyjenaŭ źviarnuć uvahu na prosty narod, abaroncami jakich jany siabie nazyvajuć, ale na patreby jakich vysakamierna nikoli asabliva nie źviartali ŭvahi.
Vajna patrabuje vialikich vydatkaŭ, jakija lahuć ciažkim jarmom na plečy viesteroscaŭ. Usio miasa ŭ Karaleŭskaj havani idzie cmokam, jakija baroniać horad ad napadu «čornych», što trymajuć błakadu partovaha horada. Takaja palityka bje pa pazicyjach «zialonych» u horadzie i pahražaje vylicca ŭ bunt. Narodnaja simpatyja na baku Rejniry, jakaja, jak kažuć prastaludziny, prylacić i vyzvalić ich ad hoładu.
Kab pieraciahnuć čerń na svoj bok, pa horadzie pravoziać hałavu Čyrvonaj karalevy, cmoka zabitaj u bai Rejnis. Ale efiekt ad hetaj demanstracyi akazvajecca kudy bolš hłybokim.
Taraharyjeny, zmahajučysia adzin suprać adnaho, vykryvajuć strašnuju tajamnicu — cmoki nijakija nie bahi, jak ličyli mnohija, a istoty z kryvi i płoci, niachaj i vielmi hroznyja.
Rejnira taksama źviartajecca da prostych ludziej ź niaprostym pachodžańniem. Bastardy, narodžanyja ad Tarharyjenaŭ, musiać stać vieršnikami dla šerahu cmokaŭ, jakija dahetul žyvuć na Cmokavym kamieni biez haspadara. Akazvajecca, što pakul Rejnira dbaje pra svaich dziaciej, u tym liku narodžanych ad niezakonnaj suviazi, mužčyny jaje domu ščodra raźlivali svajo siemia ŭ bardelach.
Čym adroźnivajecca jejny syn i spadčyńnik Džejkierys, bastard ad łorda Stronha, ad bastardaŭ inšych Tarharyjenaŭ? Čamu jamu dastaniecca ŭsio, a im ničoha? Adkazy na hetyja pytańni, vidavočna, złujuć Džejkierysa.
Niachaj mnohija pryzvanyja bastardy hinuć u ahni cmoka, ale troje ź ich, Chju Mołat, Ulf Bieły i Adamam z Chała, bastard Korlisa Viełaryjona, sadziacca na cmokaŭ Viermitora, Siarebrakryłuju i Marskoha Tumana. Takoha bluźnierstva nie vytrymlivajuć navat dahladčyki cmokaŭ, admaŭlajučysia ŭdzielničać u avantury Rejniry.
Rejnira razumieje, što razburaje jašče adzin słup, na jakim staić Dom Cmoka — vieru, što cmoka moža asiadłać tolki člen vybranaj dynastyi, a nie luby prastaludzin. Ale vybaru ŭ jaje niama, joj žyćciova nieabchodnyja cmoki, kab atrymać pieravahu ŭ vajnie.
Ulf Bieły adrazu stanovicca nachabnym, biastaktna i hruba pavodziačy siabie za stałom z karalevaj. Jon cudoŭna razumieje, što jon joj patrebny kudy bolš, čym jana jamu. Rejnira heta taksama ŭśviedamlaje i strymlivaje siabie i haračnaść syna.
Tarharyjeny z abodvuch łahieraŭ adkryli skryniu Pandory.
I tče, zabyŭšysia, ruka…
Jašče adnoj pryjemnaj niečakanaściu druhoha siezona «Doma Cmoka» stała novaja zastaŭka. U pieršym siezonie heta byŭ makiet Staroj Valiryi, na terasach i ścienach jakoj pierasiakalisia strumieńčyki kryvi, a sa skryžavańniaŭ vyciakali novyja, utvarajučy simvaličnaje hienieałahičnaje dreva Tarharyjenaŭ, jakija dapuskali blizkarodnasnyja suviazi.
U druhim siezonie joj na źmienu pryjšła zastaŭka ŭ vyhladzie habielena, jaki tčecca sam saboju. Na pałatnie z kalarovych nitak vymaloŭvajucca siužety hibieli Valiryi i zavajavańnia Viesterosa dynastyjaj Tarharyjenaŭ, jakaja vyžyła tolki tamu, što pavieryła ŭ praroctva. Źjaŭlajucca i znajomyja siužety Tanca Cmokaŭ, a ŭ zastaŭkach nastupnych sieryj paśla važnych padziej sami saboj vyšyvajucca aktualnyja malunki.
U hetaj aryhinalnaj zadumki jość suśvietna viadomy pratatyp — tak zvany dyvan z Bajo, jaki byŭ stvorany ŭ XI stahodździ i raspaviadaje pra zavajavańnie Brytanii narmanami.
Dla fanataŭ
Ale najpierš stvaralniki sieryjała «Dom Cmoka» chacieli ščylniej źviazać jaho nie z realnaj historyjaj Brytanii, a z «Hulnioj tronaŭ». Akramia znajomych miaścin i šlachietnych damoŭ u pieršym siezonie źjaviłasia praroctva «Pieśni lodu i ahniu» i toj samy kinžał z valiryjskaj stali, jakim praz stahodździ budzie zabity Karol Nočy.
U druhim siezonie adsyłak stała jašče bolš. Pakazali ŭ tym liku Ścianu, Vinterfeł (i, viadoma, adnaho sa Starkaŭ), pierajnačanaje Arlinaje Hniazdo, Bliźniat.
Niekatoryja adsyłki dosyć zabaŭnyja. Naprykład, Tyłanda Łanistera, jaki ad imia Ejmanda viadzie pieramovy z Tryjarchijaj, kab ź ich dapamohaj prarvać błakadu stalicy, byccam vypadkova nazyvajuć Tajvinam.
Taksama nam paćvierdzili zdahadku, što jajki cmokaŭ, jakija Rejnira adsyłaje za mora razam sa svaimi małodšymi dziećmi — hety mienavita tyja jajki, ź jakich praz stahodździ vyłupiacca cmoki Dejnierys Buranarodžanaj.
Taksama ŭ novym siezonie pieryjadyčna ŭ vidziežach Dejmana, jaki ledź nie źjechaŭ z hłuzdu ŭ tajamničym Charenchole, źjaŭlajucca kamiea piersanažaŭ, jakija zastalisia ŭ pieršym siezonie — maładoj Rejniry, pamierłaha karala Vizierysa I i jahonaj žonki Ejmy, jakija jaho paprakajuć.
Ale najbolš adsyłak źmiaścili ŭ finalnuju vośmuju sieryju, vidać, kab zhładzić rasčaravańnie ad kancoŭki: pakazali i biełych chadakoŭ, i Dejnierys, jakaja viernie ŭ śviet apošnich cmokaŭ, i žorstka praspojleryli siužet nastupnych siezonaŭ «Doma Cmoka».
Kali znoŭ?
Čakać treciaha siezona daviadziecca jašče dva hady. Ale nie paśpieŭ skončycca druhi siezon «Doma Cmoka», jak HBO vykaciŭ pieršy tyzier novaha prajekta pra Viesteros — «Rycar Siami karaleŭstvaŭ», jaki hruntujecca na adnajmiennaj sieryi apovieściej Džordža Marcina.
Hałoŭnymi hierojami minicykła stanuć rycar Dunkan Vysoki i jaho małaletni zbrajanosiec pa mianušcy Eh. Padziei hetaha pryhodnickaha sieryjała buduć razvaročvacca praz 72 hady paśla padziej «Doma Cmoka» i za 100 hadoŭ da «Hulni tronaŭ». Važnuju rolu ŭ siužecie zhulajuć Błekfajry, jakija ŭzychodzić da adnaho z bastardaŭ Tarharyjenaŭ.
«Rycara Siami karaleŭstvaŭ» abiacajuć vypuścić užo ŭ nastupnym 2025 hodzie, tak što bieź lubimaha suśvietu fanaty nie zastanucca nadoŭha.
«Naša Niva» — bastyjon biełaruščyny
PADTRYMAĆHod fantastyčnych sieryjałaŭ: Dom Cmoka, Piarścionki ŭłady, Dziuna
«Cichaje miesca: Dzień pieršy». Pryhody kocika padčas kanca śvietu
«Dedpuł i Rasamacha». Absalutna adbity film, jaki ŭsim spadabajecca
Kaliziej, kroŭ i popieł Viezuvija. Jakim atrymaŭsia novy sieryjał pra Rymskuju impieryju z Entani Chopkinsam
«Hałavałomka 2» — niejmavierny pośpiech ci pasrednaść? Što adbyvajecca sa studyjaj Pixar
«Niepadkupnym» biełaruskim dypłamatam u Małdovie akazaŭsia kadravy supracoŭnik KDB5
Kamientary