Stała viadoma, kolki zarabili na prodažy BiełAZaŭ pasiaredniki z kołaŭ małodšych Łukašenkaŭ — heta sotni miljonaŭ dalaraŭ na hod
«Naša Niva» detalova apisvała vyhody schiemy, pa jakoj siabry kirujučaj siamji zabirajuć sabie prybytki pramysłovaha hihanta. Na prykładzie adnoj kampanii-dystrybjutara my pakazali, što zavod niedaličvajecca bolš za pałovu dadadzienaj vartaści svajoj pradukcyi. Ciapier ža, dziakujučy Biełpołu, staŭ viadomy poŭny śpis kampanij-padzielnikaŭ, i my možam prykładna vyličyć, kolki ž socień miljonaŭ dalaraŭ na hod idzie nieviadoma kudy i nieviadoma kamu.
U červieni my vypuścili detalovy tekst pra toje, jak biznesmieny z koła starejšych synoŭ Łukašenkaŭ atrymlivajuć vializnyja prybytki na prodažach pradukcyi BiełAZa.
Čytajcie: «My adna siamja». Dylery BiełAZa, źviazanyja z synami Łukašenki, zarablajuć, jak sam BiełAZ
Architektura pastavak zładžana tak, što ekskluziŭnyja dylery pry pastaŭkach u Rasiju pakidajuć na sabie bolš za pałovu ŭsiaho ekspartnaha prybytku. Zavodu, jaki niasie ŭsie vytvorčyja i kredytnyja ryzyki, dastajecca mienš.
My raźličvali našy tablicy na prykładzie kampanii «Aŭtatechinmaš», pra jakuju dakładna było viadoma, što jana adzin z dylleraŭ BiełAZ.
Jaje zasnavalniki Juryj Chomič i Ihar Padhorny.
Voś taja tablica raźlikaŭ udziełu ŭ prybytku ad realizacyi pradukcyi BiełAZa za hady, pa jakich była spravazdačnaść pa ŭsich kampanijach z handlovaha łancužka (z 2021-ha statystyka zavoda zasakrečana).
| 2018 | 2019 | 2020 | |
| Sabiekošt (pry canie adzinki pradukcyi 100 rubloŭ) | 47,61 rub | 50 rub | 46,9 rub |
| Prybytak (pry canie adzinki pradukcyi 100 rubloŭ) | 52,39 rub | 50 rub | 53,1 rub |
| Prybytak dylera «Aŭtatechinmaš» | 25,9 rub (49,4% ad prybytku) | 26 rub (52% ad prybytku) | 28,3 rub (53,2% ad prybytku) |
| Prybytak dystrybjutara «HD BiełAZ» | 5,1 rub (9,7% ad prybytku) | 4,7 rub (9,4% ad prybytku) | 5 rub (9,4% ad prybytku) |
| Prybytak vytvorcy BiełAZ | 21,39 rub (40,8% ad prybytku) | 19,3 rub (38,6% ad prybytku) | 19,8 rub (37,2% ad prybytku) |
Jakaja novaja važnaja infarmacyja źjaviłasia ciapier, što my viarnulisia da hetaj temy? Na momant pieršaj publikacyi poŭny śpis dylleraŭ, jakija adoranyja pravam dystrybucyi pradukcyi BiełAZ u Rasii, byŭ nieviadomy.
Raniej žurnalisty viedali tolki pra «Aŭtatechinmaš» i «B-24». Pra suviaź zasnavalnikaŭ apošniaj ź Dźmitryjem Łukašenkam vyčarpalna raskazvaŭ Biełaruski rasśledavalnicki centr.
Pra inšych dystrybjutaraŭ infarmacyi ŭ publičnym dostupie nie było, i ab maštabie pryvatyzavanych prybytkaŭ my mahli tolki vyłučać teoryi, hruntujučysia na siarednich ličbach pa dźviuch viadomych kampanijach.
Ciapier ža Biełpoł pieradaŭ «Našaj Nivie» dakumient, ź jakoha stanoviacca viadomy ŭsie ŭdzielniki schiemy.
Pieradhistoryja ŭ tym, što pry kancy 2023 hoda byŭ zatrymany hienieralny dyrektar BiełAZa Siarhiej Nikifarovič. Kab pasprabavać jaho vyratavać, dylery BiełAZ napisali kalektyŭny list da Dźmitryja Hary, staršyni Śledčaha kamiteta.
Tekst lista ŭjaŭlaje saboj pieralik zasłuh Nikifaroviča (na dumku paručalnikaŭ): dziakujučy kamunikabielnamu Nikifaroviču dystrybjutary «minimalna adčuli nastupstvy trapleńnia pradpryjemstva pad sankcyi». Bolš za toje, Nikifarovič navat aščaśliviŭ «Biełšynu», prapanavaŭšy joj dzialicca prybytkami sa svajoj dystrybjutarskaj sietkaj.
Pry kancy lista dajecca poŭny śpis kampanij-paručalnikaŭ:
1) Hiendyrektar «HD BiełAZ» Lamin A.
2) Hiendyrektar «B-24» Dudziniec D.
3) Zasnavalnik «Aŭtatechinmaš» Chomič Ju.
4) Hiendyrektar «HPFK» Patapaŭ A.
5) Upraŭlajučy «BiełTransŁahistyk» Dziubienka S.
6) Dyrektar «Pramtechsnab» Pimienaŭ Ja.
7) Hiendyrektar «Siervis karjernych mašyn» Utačkin S.
8) Hiendyrektar «Haul Trucks-CA» Makaraŭ K. (Uźbiekistan).
9) Dyrektar «Spatsiervis» Ladnioŭ A.
Z danymi ŭsich dystrybjutaraŭ dalejšyja padliki stali spravaj techniki. Dla ilustracyi my ŭziali tolki 2023 hod.
Zhodna z finansavaj spravazdačaj «HD BiełAZ», praź jaki na rasijski (asnoŭny) rynak idzie pradukcyja zavoda, sabiekošt prodažaŭ «HD BiełAZ» — 82 417 827 000 rasijskich rubloŭ.
Sabiekošt prodažaŭ — heta buchhałtarski termin, jaki abaznačaje, za kolki «HD BiełAZ» zakupiŭ usio, što potym pradaŭ (pastaviŭ dystrybjutaram).
Inšymi słovami, «sabiekošt prodažaŭ» «HD BiełAZ» roŭny vyručcy zavoda BiełAZ.
Pa siarednieŭzvažanym kursie rasijskaha rubla da dalara za 2023 hod (85,24 za $1) vyručka biełaruskaha zavoda skłała kala $967 miljonaŭ. Z raźlikaŭ za papiarednija hady my viedajem, što rentabielnaść zavoda vahałasia kala 30%, i kali ličyć, što ničoha nie źmianiłasia, to vałavy prybytak zavoda budzie kala $290 miljonaŭ.
Vałavy prybytak ničoha nie skaža nam pra čysty prybytak, tamu što my nie viedajem, jakaja častka z hetaj sumy pojdzie na pahašeńnie abaviazkaŭ i praciah dziejnaści. Nam važnaja tolki finalnaja ličba — kala $290 miljonaŭ.
Ciapier davajcie hlaniem dystrybjutaraŭ, jakich my ciapier viedajem pajmienna. Pa tym ža pryncypie ich «sabiekošty prodažaŭ» pavinny być u sumie roŭnyja vyručcy «HD BiełAZ».
| Dystrybjutar | Sabiekošt prodažaŭ za 2023 u rasijskich rublach |
| «B-24» | 35 056 709 000 |
| «Aŭtatechinmaš» | 20 881 575 000 |
| «HPFK» | 11 064 222 000 |
| «BiełTransŁahistyk» | 6 875 112 000 |
| «Pramtechsnab» | 9 264 745 000 |
| «Siervis karjernych mašyn» | 1 524 261 000 |
| «Haul Trucks-CA» Uźbiekistan | Naŭprost nieviadoma, ale praz uskosny padlik ≈3 129 209 000 |
| «Spatsiervis» | 475 002 000 |
| Usiaho | 85 141 626 000 + (≈3 129 209 000) |
| «HD BiełAZ» | Vyručka za 2023 u rasijskich rublach |
| 88 270 835 000 |
Tak i atrymlivajecca — vyručka «HD BiełAZ» supadaje z sabiekoštam prodažaŭ dystrybjutaraŭ. Statystyku ŭźbieckaj kampanii «Haul Trucks-CA» my ličym jak roźnicu pamiž vyručkaj «HD BiełAZ» i sabiekoštam prodažaŭ dystrybjutaraŭ ź viadomymi pakazčykami.
Z toj ža adkrytaj spravazdačnaści pa kožnaj kampanii my bačym ich vyručki i vałavyja prybytki.
Inšymi słovami, my ŭžo viedajem, za kolki jany atrymali pradukcyju i kolki na hetym prykładna zarabiŭ BiełAZ. I ciapier možam paraŭnać z tym, kolki zarabili pasiaredniki. Pakazčyki vyručki my apuścim, achvotnyja padličyć rentabielnaść mohuć pahladzieć heta samastojna na rasijskim sajcie finansavaj spravazdačnaści. Pryvodzim tolki ličby vałavaha prybytku.
| Dystrybjutar | Vałavy prybytak za 2023 hod u ras. rublach |
| «B-24» | 8 374 522 000 |
| «Aŭtatechinmaš» | 8 529 904 000 |
| «HPFK» | 5 067 132 000 |
| «BiełTransŁahistyk» | 2 178 409 000 |
| «Pramtechsnab» | 2 757 203 000 |
| «Siervis karjernych mašyn» | 421 861 000 |
| «Haul Trucks-CA» Uźbiekistan | Nieviadoma. Pry rentabielnaści prodažaŭ u 25% ≈782 302 250 |
| «Spatsiervis» | 206 864 000 |
| Usiaho ŭ dalarach | ≈ $ 329 790 000 |
| Zavod BiełAZ | Vałavy prybytak za 2023 hod u dalarach pry rentabielnaści prodažaŭ 30% |
| ≈ $ 290 000 000 |
Pry raźlikach my zrabili dapuščeńni adnosna rentabielnaści prodažaŭ uźbieckaj «Haul Trucks-CA», ekstrapalavaŭšy na jaje siarednija rentabielnaści prodažaŭ inšych dyleraŭ.
Taksama my zrabili dapuščeńnie adnosna rentabielnaści prodažaŭ BIEŁAZ, ekstrapalavaŭšy siaredniuju rentabielnaść zavoda za apošnija hady.
Takim čynam atrymlivajecca, što vałavy prybytak kampanij, jakija ničoha nie vyrablajuć, składaje prykładna tracinu miljarda dalaraŭ u hod i pieravyšaje prybytkovaść samoha zavoda.
Pakul žodzinski zavod u asobnyja hady tracić častku svajho prybytku na vypłaty pa kredytach, zakupku abstalavańnia i madernizacyju srodkaŭ vytvorčaści, pasiaredniki vyvodziać sotni miljonaŭ dalaraŭ u dyvidendy.
Dalejšy los hetych srodkaŭ nieviadomy, ale raniej apytanyja «Našaj Nivaj» deviełapiery i bankiry vykazvajuć zdahadki, što aficyjnyja zasnavalniki kampanij-dystrybjutaraŭ nie źjaŭlajucca realnymi bieniefiecyjarami hetych kvitniejučych biznesaŭ, tamu što nie vidać, kudy ŭkładajecca hety kapitał.
Pryvatyzacyja prybytkaŭ tolki adnaho pramysłovaha hihanta Biełarusi adbyvajecca pad šmathadovuju biaźlitasnuju krytyku pasiarednikaŭ Alaksandram Łukašenkam.
Raniej Biełaruski rasśledavalnicki centr vyčarpalna raskazaŭ pra suviazi zasnavalnikaŭ «B-24» ź siamjoj Dźmitryja Łukašenki.
«Naša Niva» taksama znajšła pierasiačeńni ŭ bijahrafijach zasnavalnikaŭ «Aŭtatechinmaša» z kołami Viktara Łukašenki.
Bijahrafii inšych farmalnych bienieficyjaraŭ kampanij-dystrybjutaraŭ pakul nieviadomyja, raskryć ich — sprava žurnalisckaj supolnaści.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary