Biełaruskaja biznes-łedzi, jakaja žyvie ŭ Litvie, uklučyła navahodni zvarot Łukašenki. I adchapiła ŭ sacsietkach

U Minsku Maksim Charošyn byŭ adnym z ułaśnikaŭ kvietkavaj kramy «Pieršy kvietkavy». Paśla taho, jak u 2020 hodzie jaho mocna źbili siłaviki, jon źjechaŭ u Litvu, dzie taksama adkryŭ kramu kvietak.

Letaś Maksim ź siamjoj znoŭ pierajechaŭ — na partuhalski archipiełah Madejra — z płanami adkryć tam kramu kvietak, a taksama niekalki restaranaŭ.

Pavialičyć

Niadaŭna Charošyn aburyŭsia śviatočnymi storys biełaruskaj biznes-łedzi ŭ Litvie Volhi Pusiankovaj. U svaim instahramie jana apublikavała videa taho, jak sustrakała ź siabrami Novy hod. Na fonie śviatočnaha stała možna zaŭvažyć vialiki televizar, jaki pakazvaŭ navahodni zvarot Łukašenki.

«Upieršyniu sustrakali Novy hod pad słovy sapraŭdnaha Dzieda Maroza», — paznačyła na storys Volha.

Pavialičyć

Maksim, jaki sutyknuŭsia z hvałtam siłavikoŭ Łukašenki, nie zmoh prajści mima i prakamientavaŭ videa ŭ svaim instahramie:

— Ludzi žyvuć u Litvie i hladziać hetaha mudaka. Niama słoŭ. I heta jašče biełarusy. Kolki maich siabroŭ i znajomych vyhnali ź Litvy i niezasłužana pryznali pahrozaj nacyjanalnaj biaśpiecy, pry hetym inšyja biełarusy, jakija žyvuć u Litvie, padtrymlivajuć režym i adčuvajuć siabie spakojna.

Pavialičyć

Volha adkazała Maksimu — jana śćviardžaje, što toj zrabiŭ vysnovy, nie razabraŭšysia ŭ situacyi. Žančyna rastłumačyła ŭ storys, što mieła na ŭvazie Dzieda Maroza-animatara, jakoha kampanija zamoviła dla vinšavańnia dziaciej.

Jana taksama dadała, što videazvarot Łukašenki išoŭ biez huku i byŭ uklučany vyklučna dziela taho, kab nie prapuścić kuranty i pačatak Novaha hoda.

Biznes-łedzi abvinavaciła Charošyna ŭ tym, što jon raskrytykavaŭ jaje dla pijaru. Volha padkreśliła, što ŭ kampanii byli nie tolki biełarusy.

— Naš Novy hod byŭ šmatnacyjanalnym (biełarusy, rasijanie, litoŭcy). I ŭ hetu navahodniuju noč my słuchali tolki vinšavańni zaprošanaha Dzieda Maroza i prezidenta Litvy. Ale nas užo bičavali publična, što zadni fon u nas nie toj. Ludzi, vy sami raspalvajecie nianaviść i złość adno da adnaho. Śviadoma?

U inšym storys žančyna dadała, što soramna joj nie za siabie, a za raspalščykaŭ svarak i nianaviści.

Pavialičyć

U instahramie Volhi Pusiankovaj paznačana, što jana navučaje niejrasietkam i ŭkaraniaje štučny intelekt u biznesy. Žančyna stvaryła ŭ Vilni «Kłub 22», jaki arhanizoŭvaje žanočyja, mužčynskija i siamiejnyja mierapryjemstvy.

Darečy, u 2023 hodzie Volha jak dyrektarka kampanii MB ARGI u intervju litoŭskamu «Ekspres-tydniu» raspaviadała, ź jakimi prablemami sutykajucca biznes-emihranty ź Biełarusi ŭ Litvie.

Tady žančyna padkreślivała, što pracuje i płacić padatki ŭ Litvie z 2016 hoda, maje pastajanny dazvoł na žycharstva. Ale skardziłasia na dyskryminacyju:

— Praź ciapierašniuju palityčnuju situacyi mnohija pačali praduziata stavicca i nie žadajuć z taboj navat razmaŭlać, kali ty imihrant ź Biełarusi. Usie biełarusy ŭžo zavočna vorahi.

Volha taksama abvinavačvała litoŭskija ŚMI ŭ raspalvańni nianaviści da biełarusaŭ i rasijan:

— Raspalvańnie ŭ ŚMI, na telebačańni nianaviści i niapravilna padniesienaja infarmacyja pieratvarajecca ŭ prapahandu suprać biełarusaŭ i rasijan. Razmaŭlajučy sa mnohimi litoŭcami, ja pytaju: «Čamu vy tak dumajecie?». A ŭ adkaz čuju: «U nas tak pa televizary kažuć». Čym ža tady litoŭskaja prapahanda adroźnivajecca ad rasijskaj? Navošta raspalvać nianaviść u ludziej unutry tvajoj ža krainy?

«Naša Niva» źviartałasia da Volhi z prapanovaj prakamientavać kanfliktnuju situacyju. Taja pahadziłasia adkazać tolki pry ŭmovie asabistaj sustrečy. Pa pryčynach biaśpieki žurnalisty «Našaj Nivy» nie mohuć pahadzicca na taki varyjant. Kali Volha zachoča adkazać na našyja pytańni inšym sposabam, my apublikujem jaje adkazy dasłoŭna.

• 1
• 4
• 2
• 69
• 1
• 1
• 14
• 0