Biełarus pabiŭ rekord Toma Kruza: jon skoknuŭ z parašutam ź nievierahodnaj vyšyni
Ekstremał Juryj Kocur ustalavaŭ suśvietny rekord u skačku pa niebiaśpiečnaj technicy HALO.
Biełarus Juryj Kocur skoknuŭ z parašutam z vyšyni 7620 mietraŭ. Heta aficyjna najvialikšaja vyšynia skačka pa technicy HALO u historyi.
Papiaredni rekord u hetaj katehoryi naležaŭ zornamu halivudskamu akcioru Tomu Kruzu, piša «Anłajnier».
Skačok byŭ ździejśnieny ŭ Danii, u adzinaj u Jeŭropie śpiecyjalnaj parašutnaj zonie, jakaja dazvalaje spartsmienam pracavać z takoj ekstremalnaj vyšynioj. Sama technika HALO praduhledžvaje, što parašutyst pakidaje samalot na maksimalna vysokim punkcie, a raskryvaje kupał jak maha nižej. Pieršapačatkova taki styl vykarystoŭvali vajskoŭcy, ale paźniej jaho palubili i ekstremały ŭ cyvilnym.
Juryj raspaviadaje, što ŭ takich skačkach šmat niuansaŭ, ad jakich litaralna zaležyć žyćcio parašutysta.
«Tempieratura na takoj vyšyni — minus 25 hradusaŭ, kisłarodu nie chapaje — patrebnyja śpiecyjalny kaścium i kisłarodnaja maska. Plus da mianie byŭ padklučany aparat, jaki kantralavaŭ stan majho arhanizma prykładna dvaccać razoŭ u siekundu padčas skačku. Kali b adbyłasia razhiermietyzacyja šlema i ja straciŭ prytomnaść, parašut adkryła b aŭtamatyka. Ale ŭsio prajšło dobra. Tajmier pakazaŭ 1 chvilinu 45 siekund volnaha padzieńnia», — raspavioŭ Kocur.
Parašutnym sportam Juryj zajmajecca z 2003 hoda, i ahulnaja kolkaść jaho skačkoŭ užo pieravysiła paŭtysiačy. Ale samym niebiaśpiečnym byŭ mienavita apošni, rekordny. Dasiahnieńnie Juryja było aficyjna paćvierdžana ekśpiertami Mižnarodnaj knihi rekordaŭ INTERRECORD. Pra toje, što jon pabje rekord mienavita Toma Kruza, Juryj daviedaŭsia ŭ apošni momant.
«Najs tu chev», jak kažuć, ale heta nie było pryncypovym momantam. Chacia ciapier maja žonka moža hanarycca tym, što ja kruciejšy za Toma — heta pryjemna hučyć», — žartuje spartsmien.
Bić parašutnyja rekordy Juryj nastrojeny i dalej. Pavodle jaho słoŭ, u sporcie jašče šmat katehoryj, u jakich možna pastavić rekordy.
«Było b sapraŭdy kruta, viadoma, zajści na terytoryju taho ž Baumhartniera, jaki skakaŭ sa strataśfiery. Ale pakul što Tom Kruz — taksama niadrenna!» — raspaviadaje rekardsmien.
Prakopjeŭ krytykuje prapanovu kapitulavać: Kali ŭ nas nie ŭźnikła partyja jastrabaŭ, to nie treba rabić partyju abłudnych hałuboŭ3
Kamientary
Mo čas užo raskryć naš spradviečny BČB parašut?