«Ałkahol buduć pić niešmatlikija dehienieraty, dyj toje ŭpotaj». Što pisali pra 2025 hod sto hadoŭ tamu?

Stahodździe tamu šerah myślaroŭ, navukoŭcaŭ i piśmieńnikaŭ pasprabavali zazirnuć u budučyniu dy pradkazać, jak budzie vyhladać žyćcio ŭ 2025-m. Amierykanski partał USA Today i polski Onet.pl sabrali pa niekalki cikavych pradkazańniaŭ. Davajcie pahladzim, jak ludzi kaliści ŭjaŭlali čas, u jakim my z vami ciapier žyviom.

«U 2025 hodzie ŭžo nie budzie nivodnaj pryvabnaj dziaŭčyny»

U 1925 hodzie amierykanski psichołah Albiert E. Viham (Albert E. Wiggam), vystupajučy ŭ Bruklinie, śćviardžaŭ, što mienš pryvabnyja i mienš razumnyja ludzi zavodziać bolš dziaciej, čym tyja, kaho pryroda adaryła pryhažościu i rozumam.

Na hetaj padstavie Viham mierkavaŭ, što praz sto hadoŭ u ZŠA mocna ŭpadzie ahulny ŭzrovień pryhažości. Jon papiaredžvaŭ, što kali «praces dehradacyi» budzie praciahvacca, to, mahčyma, u 2025 hodzie ŭžo nie znojdziecca nivodnaj pryvabnaj dziaŭčyny.

Ludzi buduć dažyvać da 150 hadoŭ

Ser Ronald Ros (Ronald Ross) — brytanski lekar i łaŭreat Nobieleŭskaj premii 1902 hoda za daśledavańni malaryi — taksama vykazvaŭsia nakont taho, čaho varta čakać u 2025-m.

Pavodle Rosa, navuka rušyć tak daloka napierad, što ludzi zmohuć dažyvać da 150 hadoŭ.

Ros padkreślivaŭ, što vialikuju rolu adyhraje pieramoha nad mikraarhanizmami (mikrobami i bakteryjami), jakija vyklikajuć bolšaść zachvorvańniaŭ. Kali čałaviectva navučyłasia b całkam praduchilać pahrozu infiekcyj, to ništo nie pieraškodzić ludziam žyć značna daŭžej, mahčyma, navat nablizicca da bieśśmiarotnaści.

Na płaniecie buduć tolki try zvyšdziaržavy

Anhlijski piśmieńnik H. Dž. Uełs (H.G. Wells), aŭtar «Mašyny času», «Vajny śvietaŭ» i «Niabačnaha čałavieka», padzialiŭsia svaim bačańniem dziaržaŭnaha ładu ŭ budučyni. Pavodle jaho mierkavańnia, nacyjanalnyja intaresy asobnych dziaržaŭ źniknuć na karyść hłabalnaha padziełu śvietu na try vializnyja hieapalityčnyja błoki.

U pryvatnaści, jon prahnazavaŭ, što da 2025 hoda sfarmujucca try hłabalnyja kanfiederacyi. Heta buduć Złučanyja Štaty Amieryki, Złučanyja Štaty Jeŭropy i Kitaj.

Hetyja dumki, vidavočna, adlustroŭvali nastroi paśla Pieršaj suśvietnaj vajny, kali idei pra stvareńnie niejkaha sajuza dziaržaŭ u Jeŭropie ŭžo prysutničali (choć da realnych intehracyjnych prajektaŭ, nakštałt Jeŭrapiejskaha Sajuza, jašče było daloka).

Śmierć stanie «jak zachad sonca»

Jašče dalej pajšoŭ irłandski fizik i chimik E. E. Furńje d'Albie (E.E. Fournier d'Albe). Jon napisaŭ cełuju knihu «Quo Vadimus? Niekatoryja pohlady na budučyniu» (1925), dzie abmalavaŭ utopiju, u jakoj apynucca ludzi praz stahodździe. Voś asnoŭnyja jaho tezisy:

Adziny ŭrad i ahulnaja mova. Śviet, pavodle jaho, da 2025 hoda abjadnajecca pad adzinym kiravańniem i piarojdzie da adzinaj movy (ci, prynamsi, budzie mieć adzin srodak znosin, zrazumieły ŭsim). Taksama jon dapuskaŭ, što na płaniecie zachavajucca roznyja rasy i niejkija «sajuznyja nacyi», — ale svabodnyja handal i padarožžy zbliziać ludziej i pazbaviać pieraškodaŭ.

Pieramoha miedycyny nad chvarobami i bolem. Furńje d'Albie prahnazavaŭ, što charaktar staraści kardynalna źmienicca: ludzi buduć žyć vielmi doŭha biez chvarob, a śmierć stanie spakojnaj i biazbolnaj, «jak zachad sonca». Chvaroby buduć pieramožanyja amal całkam, a lubyja traŭmy — lohka vylečvacca.

Novyja materyjały i adzieńnie. Jon mierkavaŭ, što źjaviacca tkaniny, jakija abjadnajuć ciapło futra, miakkaść šoŭku i tryvałaść ilnu. Dziakujučy lohkaści hetych tkanin ludzi zmohuć nasić u nievialikaj valizcy «paŭdziasiatka» harnituraŭ, a pamianiać adzieńnie budzie taksama prosta, jak źniać płašč.

Cikava pahladzieć i na mierkavańni, jakija tyčylisia papiarednich hadoŭ, što my ŭžo majem za saboj. Jak piša Onet.pl, u lutym 1922 hoda ŭ polskaj haziecie Ilustrowany Kurier Codzienny źjaviŭsia artykuł pad nazvaj «Jak budzie vyhladać śviet u 2022 hodzie?». Aŭtar adznačaŭ, što adzin amierykanski žurnalist zadaŭ heta pytańnie roznym ludziam, jakija pracavali ŭ samych roznych halinach dziejnaści, i pryvioŭ ich adkazy.

«Kiniematahrafičny ekran», na jakim budzie ŭsio publikavacca

Režysior i pijanier kiniematahrafii David Hryfit (David Griffith) u 1922 hodzie mierkavaŭ, što praz sto hadoŭ knih i haziet u drukavanym vyhladzie ŭžo nie budzie. Usio publikavacca budzie na «kiniematahrafičnym ekranie». I adukacyja taksama budzie adbyvacca pry dapamozie ekrana. Pavodle jaho słoŭ, źjaviacca «škoły-kino» i «biblijateki-kino».

Siońnia, kali my majem dośvied dystancyjnaj pracy i navučańnia praź internet, možna skazać, što pradkazańnie Hryfita akazałasia davoli blizkim da praŭdy.

Pracoŭny dzień — dźvie hadziny

Inžynier Uołter Połakaŭ (Walter Polakow) śćviardžaŭ, što praz sto hadoŭ nie zastaniecca nafty i vuhalu, ale navukoŭcy znojduć sposab vykarystoŭvać enierhietyku soniečnych pramianioŭ. Jak u vadu hladzieŭ.

Mienš trapnym akazaŭsia prahnoz nakont praciahłaści pracoŭnaha dnia, choć sam napramak dumak byŭ słušnym. Połakaŭ ličyŭ, što dziakujučy techničnamu prahresu pracoŭny dzień źmienšycca ŭsiaho da dźviuch hadzin.

Za sto hadoŭ da jaho vykazvańnia praciahłaść sutačnaj pracy składała šasnaccać hadzin, a na momant jahonych słoŭ — vosiem. Vidać, inžynier zychodziŭ z taho, što trend praciahniecca ŭ tym samym tempie.

Što budzie sa Štatami, spažyvańniem ałkaholu i pravami žančyn

Žurnalist Hienry Mienkłen (Henry Mencklen) vykazaŭ ź siońniašniaha punktu hledžańnia zusim niatrapnaje mierkavańnie, zajaviŭšy, što praz sto hadoŭ ZŠA stanuć anhlijskaj kałonijaj.

A voś dyrektar Amierykanskaj antyałkaholnaj lihi zrabiŭ vielmi aptymistyčny prahnoz, byccam u 2022 hodzie ałkahol źniknie ź Ziamli naohuł. Tolki niešmatlikija «dehienieraty» buduć užyvać jaho ŭpotaj, a čałaviectva stanie ličyć śpirtnoje atrutaj.

U artykule, jaki pierakazvaje Onet.pl, nie abminuli i temu žančyn dy ich miesca ŭ hramadstvie praz sto hadoŭ. Dziajački žanočych arhanizacyj Marharet Senhier (Margaret Sanger) i Mery Chej (Mary Hay) vykazalisia nakont taho, što čakaje žančyn u budučyni.

Marharet Senhier ličyła, što repraduktyŭny kantrol stanie častkaj adukacyi žančyn, što pryviadzie da bolšaha intelektualnaha raźvićcia i ščaścia ŭ šlubie. Jana mierkavała, što «miadovy miesiac» u šlubie zmoža ciahnucca niekalki hadoŭ, pakul šlubnyja pary nie vyrašać mieć dziaciej. A čas bieź dziaciej jany vykarystajuć, kab dobra paznać adno adnaho.

Mery Chej dadała, što praz sto hadoŭ žančyna budzie całkam roŭnaj mužčynie va ŭsich aśpiektach. Jana zmoža zajmacca tym, da čaho najbolš zdatnaja. A siamiejnyja abaviazki istotna sprościacca dziakujučy techničnym vynachodnictvam i raŭnapraŭnamu ŭdziełu muža.

Kožnaja z apisanych tut idej adlustroŭvaje nie tolki fantaziju i mary kankretnaha čałavieka z 1922 ci 1925 hoda, ale i duch taho času, kali hranicy mahčymaściaŭ zdavalisia biaźmiežnymi.

• 15
• 0
• 6
• 0
• 0
• 2
• 0
• 0