Słužba achovy prezidenta Paŭdniovaj Karei nie dazvoliła jaho aryštavać
Śledčyja sprabujuć vykanać ordar na aryšt Jun Sok Jola. Jany prarvalisia praź dźvie linii ačapleńnia ŭ rezidencyi prezidenta, ale kiraŭnik Słužby biaśpieki admoviŭsia supracoŭničać ź imi.
Śledčyja, jakija prybyli ŭ rezidencyju paŭdniovakarejskaha prezidenta dla vykanańnia ordara na aryšt časova adchilenaha Jun Sok Jola, zdoleli prarvacca praź dźvie linii ačapleńnia i sutyknulisia z adździełam biaśpieki, paviedamiŭ pradstaŭnik śpiecyjalnaj śledčaj hrupy palicyi Yonhap.
Pravaachoŭniki pradjavili ordary na aryšt i pieratrus kiraŭniku Słužby nacyjanalnaj biaśpieki Pak Čon Čžunu i paprasili jaho ab supracoŭnictvie, ale jon zajaviŭ, što pieratrus nie dazvoleny z-za «zakona ab biaśpiecy i zony biaśpieki».
Niahledziačy na abvieščany ŭ siaredzinie śniežnia impičmient, Jun Sok Jol da zaviaršeńnia razhladu spravy Kanstytucyjnym sudom ličycca časova adchilenym i znachodzicca pad achovaj słužby achovy prezidenta. Śledčyja ŭvajšli na terytoryju rezidencyi ŭ 8:02 pa miascovym časie (2:02 pa Minsku), paśla čaho adbylisia sutyknieńni z raźmieščanymi na terytoryi rezidencyi vajskoŭcami.
Advakaty Jun Sok Jola nazvali sprobu vykanać ordar na aryšt niezakonnaj i paabiacali źviarnucca ŭ sud.
U vyniku śledčyja paśla šmathadzinnaha supraćstajańnia z achovaj adchilenaha ad ułady prezidenta admovilisia ad namieru aryštavać jaho.
«Aryšt, pa našaj acency, niemahčymy z-za ŭpartaha procidziejańnia. My turbujemsia za našu kamandu na miescy [ … ] my znachodzim staŭleńnie abvinavačanaha [ … ] dastojnym hłybokaha škadavańnia», — zajavili pradstaŭniki Biuro rasśledavańniaŭ karupcyi Paŭdniovaj Karei.
Kamientary