«Być najlepšym». Vyjšaŭ kranalny film-bijahrafija pra Robi Uiljamsa — z małpaj u hałoŭnaj roli
Dumajecie, miuzikłami vas nie ździviš? Nie śpiašajciesia rabić vysnovy, pakul nie pabačycie ŭ kino jarkuju premjeru Better Man — u Biełarusi hetuju stužku pakazvajuć pad nazvaj «Być najlepšym: historyja Robi Uiljamsa».
Siońnia vychodzić stolki muzyčnych bajopikaŭ, što ŭ hetaj raznastajnaści ŭsio ciažej znajści niešta vybitnaje. Hladzicie sami: za apošnija hady my pabačyli filmy pra Fredzi Mierkjury, Ełtana Džona, Emi Uajnchaŭs i navat, darujcie, pra rasijski pop-duet «Ruki ŭvierch».
Dla filma pra žyćcio Robi Uiljamsa, brytanskaj pop-lehiendy, vybrali inšy rakurs. Režysior stužki Majkł Hrejsi — jon ža źniaŭ za siem hadoŭ da taho «Najvialikšaha šoŭmiena» — prydumaŭ pakazać u roli Uiljamsa nie čałavieka-akciora, a… małpu. Kaža, na heta jaho natchnili raspoviedy samoha Uiljamsa — Robi prykłaŭ ruku da stvareńnia stužki i pierazapisaŭ dla jaje svaje pieśni. Śpiavak dzialiŭsia z režysioram, što jon bačyć siabie padobnym da małpy na scenie.
I ciapier, kali film vyjšaŭ, možna kazać, što ryzykoŭnaja ideja spracavała. Rejtynhi ŭ stužki, darečy, dobryja: naprykład, na resursie Rotten Tomatoes film nabraŭ 90%, na płatformie IMDb — 7,7 bała z 10.
Hetaje vielmi brytanskaje kino raspačynajecca ŭ horadzie Stok-an-Trent, dzie ŭ 1974-m naradziŭsia Uiljams. Chłapčuk, tady jašče Robiert, pad upłyvam baćki pačaŭ słuchać džaz i śvinh — naprykład, Ełu Ficdžerald i Dzina Marcina. Ale bolš za ŭsio, miarkujučy pa stužcy, na jaho paŭpłyvaŭ Frenk Sinatra. Hrejsi pakaža nam pryhožuju scenu, jak małpa-Robi razam z baćkam śpiavaje hienijalny sinatraŭski trek My Way. Hetaja pieśnia pra čałavieka, jaki prajšoŭ žyćcio tak, jak sam žadaŭ, svaim šlacham, potym jašče raz prahučyć u filmie, i momant budzie taki kranalny, što rychtujcie nasavyja chustački.
A jašče baćka raskazvaŭ Robi pra heta — unutranuju jakaść, jakaja moža zrabić ciabie zorkaj, skažam, nie horš za Sinatru: maŭlaŭ, abo ty z hetym naradžaješsia, abo ty — nichto. Mabyć, z taho času chłopčyk pačaŭ baraćbu z hetym nikim, ź pierśpiektyvaj zastacca prostym čałaviekam, ad jakoj jon źbiahaŭ jak moh.
Pra hetuju baraćbu Uiljams ščyra raskazvaje ŭ svaim bajopiku. Jon zhadvaje, jak u padletkavym uzroście trapiŭ u muzyčny hurt Take That — siońnia heta lehiendarny brytanski bojz-bend, — i jak praź niesucišnaje žadańnie pratestu syšoŭ adtul.
Ale było nie tolki heta: słava, abažańnie i ŭsiedazvolenaść zvalilisia na Robi, kali jon jašče nie moh dać im rady. Junak šukaŭ paratunku ŭ ałkaholi, narkotykach i antydepresantach, časam jon nie kantralavaŭ siabie navat na scenie. A kali i kantralavaŭ, to chavaŭ za sceničnym nachabstvam vialiki bol i strach ad taho, što, mahčyma, jon usio ž taki nie zdoleŭ źbiehčy ad taho nikoha, kim tak bajaŭsia zrabicca.
Taja małpa, jakuju my bačym u kadry zamiest Robi, stvoranaja z dapamohaj składanaj kampjutarnaj hrafiki. Tam jość i «ŭniosak» akciora Džona Devisa, jaki staŭ asnovaj ličbavaha piersanaža-małpy i adyhraŭ amal va ŭsich scenach ź joj, a jość i rysy ŭłasna Robi — kali dakładniej, u małpy jaho vočy.
Jak ni dziva, ale heta akazałasia pravilnym rašeńniem. Z małpaj u kadry chutka zvykaješsia, a potym razumieješ: kali b na jaje miescy byŭ čałaviek, jon by adciahvaŭ na siabie lišniuju ŭvahu. Zrazumieła, možna było b znajści akciora, bolš-mienš padobnaha da Robi, padvučyć jaho rysam śpievaka, jaho maniery pavodzinaŭ. Ale kali hetaha niama, na pieršy płan vychodzić sama kranalnaja historyja.
Tady ŭśviedamlaješ, što ŭ niečym heta nie prosta historyja Robi Uiljamsa, na jaho miescy moh akazacca chto zaŭhodna. My ŭsie časam robim dziŭnyja i durnyja rečy, zdradžvajem tym, chto nas lubić, hublajem svaich ludziej, niečaha vielmi baimsia i šukajem ad hetaha paratunku tam, dzie nie treba. Dla Uiljamsa takim paratunkam, jak jamu zdavałasia, budzie słava, ale słava nie zrabiła jaho ščaślivym — akazałasia, što dla hetaha treba niešta bolšaje.
Ale, jak vy pabačycie ŭ kancy, Better Man — heta ŭsio ž taki film pra nadzieju. Uiljams ščyra zhadvaje niaŭdałyja adnosiny sa śpiavačkaj Nikol Epłtan i ŭłasnymi svajakami, raskazvaje pra ciažkaści ź mientalnym zdaroŭjem, adnak demanstruje, što ŭsio heta možna pieramahčy. Kab pakazać unutranych demanaŭ, ź jakimi zmahaŭsia Robi, u stužku navat dadali trochi scen u styli fentezi.
A jašče, viadoma, Better Man — film pra dobruju muzyku. Hrejsi nie bambardziruje nas muzyčnymi numarami, jak heta časam robiać u miuzikłach, ale hałoŭnyja treki Uiljamsa ŭsio ž prahučać, i dadatkam budzie vidoviščnaja chareahrafija. Hladzicie sami:
Better Man časam nazyvajuć «małpinym» bajopikam, ale, kali pryhledziecca, hałoŭnaje ŭ im — nie heta. U jaho stvaralnikaŭ atrymaŭsia film, dzie ŭ tym, jak raskazanaja historyja, vyrazna čuvać samoha Robi Uiljamsa. Pradziusar Haj Čembiers kazaŭ jamu ŭ filmie, što pieśni atrymlivajucca kaštoŭnymi, tolki kali jany kaštujuć niečaha tabie samomu. I vyhladaje, što takaja ščyraść u filmie šmat kaštavała samomu śpievaku. Mahčyma, tamu i atrymałasia tak kranalna?
«Naša Niva» — bastyjon biełaruščyny
PADTRYMAĆ
Kamientary