U Łatvii chočuć abaviazać biełarusaŭ dekłaravać na miažy metu naviedvańnia krainy
Parłamienckaja kamisija pa nacyjanalnaj biaśpiecy padrychtavała i padała ŭ prezidyum Siejma Łatvii papraŭki da Zakona ab imihracyi, jakija vyznačajuć, što hramadzianam krain SND pierad ujezdam u Łatviju nieabchodna budzie padavać infarmacyju pra metu pajezdki, piša Delfi.lv.
Zakonaprajekt vyznačaje, što hramadzianie krain SND pierad ujezdam u Łatviju abaviazanyja buduć padać infarmacyju pra metu pajezdki, čas i miesca znachodžańnia, maršrut, kantaktnuju infarmacyju, zajmanyja pasady, pra toje, ci byli jany kandydatami na vybarach, status słužbovaj asoby i słužbu ŭ roznych viedamstvach.
Za niepadaču hetaj infarmacyi abo padaču chłuślivych źviestak moža być nakładzieny štraf da 400 adzinak (2000 jeŭra). Hety štraf supastaŭny z sankcyjami za inšyja pravaparušeńni anałahičnaha charaktaru. Abaviazak padavać infarmacyju važny dla praduchileńnia pahroz dziaržaŭnaj biaśpieki, tamu jaho nievykanańnie ličycca surjoznym parušeńniem, tłumačać aŭtary zakonaprajekta.
Zakonaprajekt praduhledžvaje vyklučeńni dla asob z dypłamatyčnym imunitetam ci tych, chto ździajśniaje karotkaterminovyja pajezdki dla vykanańnia aficyjnych funkcyj abo zabieśpiačeńnia techničnaj padtrymki. Hetyja asoby nie abaviazanyja davać infarmacyju pierad ujezdam u Łatviju.
Akramia taho, Kamisija pa nacyjanalnaj biaśpiecy raspracavała papraŭki da zakona «Ab dziaržaŭnaj miažy Łatvijskaj Respubliki», zhodna ź jakimi hramadzianam krain SND dazvoł na znachodžańnie ŭ prymiežnaj zonie Łatvii budzie vydavacca tolki sa zhody Słužby dziaržaŭnaj biaśpieki.
Jak adznačajecca ŭ anatacyi da zakonaprajekta, krainy SND (Azierbajdžan, Armienija, Biełaruś, Kazachstan, Kyrhyzstan, Małdova, Rasija, Tadžykistan i Uźbiekistan) ciesna supracoŭničajuć u śfiery biaśpieki, ekanomiki i kultury, i Rasija vykarystoŭvaje hetaje supracoŭnictva dla atrymańnia infarmacyi, jakaja jaje cikavić.
Akaŭnt Kabančuka ŭzłamali — ale ci biełaruskija śpiecsłužby?11
Kamientary