Minuły hod pabiŭ tempieraturny rekord i staŭ samym ciopłym za ŭsiu historyju mieteanazirańniaŭ na terytoryi Biełarusi. Siaredniehadavaja tempieratura skłała 9,5 hradusa pry normie ŭ 7,2.
Pra heta paviedamili śpiecyjalisty Biełhidramieta padčas pres-kanfierencyi, pryśviečanaj analizu pahodnych umoŭ za 2024 hod, piša Onliner.by.
Jak raspaviała načalnica adździeła vyvučeńnia źmien klimatu słužby mietearałahičnaha i klimatyčnaha manitorynhu Biełhidramieta Volha Bakłanava, da 2015 hoda takija vysokija siaredniehadavyja tempieratury ŭ Biełarusi nie fiksavalisia. Papiarednim rekardsmienam byŭ 2020 hod ź siaredniehadavoj tempieraturaj 9,1 hradusa.
U 2024 hodzie anamalna ciopłymi byli 11 miesiacaŭ, za vyklučeńniem studzienia. Mienavita ŭ studzieni, 8-ha čysła, na stancyi Jezieryšča była zafiksavana samaja nizkaja tempieratura za hod — minus 28,7 hradusa.
Samy vysoki pakazčyk tempieratury byŭ zafiksavany 13 lipienia na stancyi Žytkavičy: tady pavietra prahrełasia da plus 37,9 hradusa.
Leta minułaha hoda stała druhim samym ciopłym za ŭvieś pieryjad nazirańniaŭ. Byli navat zafiksavanyja trapičnyja nočy, kali minimalnaja tempieratura za noč nie apuskałasia nižej za +20 hradusaŭ.
— Samym unikalnym miesiacam hoda staŭ vierasień, jaki akazaŭsia samym ciopłym vieraśniem za ŭvieś pieryjad nazirańniaŭ. Siaredniaja tempieratura pavietra pa Biełarusi za pieršy vosieński miesiac była blizkaj da letnich tempieratur i skłała 17,5 hradusa, što vyšej za klimatyčnuju normu na 4,8 hradusa. Maksimalnyja tempieratury pavietra na bolšaj častcy krainy dasiahali 27 hradusaŭ, a na poŭdni i paŭdniovym uschodzie — 28, 30 i bolš. U hety pieryjad byli zafiksavany samyja praciahłyja za hod chvali ciapła pa ŭsioj krainie, ich praciahłaść dachodziła da 27 dzion, — adznačyła Volha Bakłanava.
Što tyčycca apadkaŭ, to histaryčnyja maksimumy byli abnoŭleny ŭ krasaviku: tady vypała 218% apadkaŭ adnosna normy. A voś maj, naadvarot, byŭ vielmi suchim — usiaho 40% ad normy.
Samy mocny viecier za hod dasiahnuŭ chutkaści 29 mietraŭ u siekundu. Takija pakazčyki byli zafiksavany dvojčy: 14 lipienia ŭ Homieli i 18 lipienia ŭ Kaściukovičach.
Što datyčycca zimy, to ŭžo zaraz jana patencyjna pretenduje na zvańnie adnoj z samych ciopłych. Siaredniaja tempieratura śniežnia pieravysiła normu na 2,8 hradusa.
Na bolšaj častcy Biełarusi jašče nie nastupiła klimatyčnaja zima — pieryjad sa siaredniasutačnaj tempieraturaj 0 hradusaŭ i nižej. Naprykład, u 2021 hodzie klimatyčnaja zima ŭ Biełarusi tak i nie nastupiła.
Pavodle prahnozu Paŭnočna-jeŭrazijskaha klimatyčnaha centra, jaki nosić kansultacyjny charaktar, hetaja zima ŭ Biełarusi budzie ciaplejšaj za zvyčajnuju ź vierahodnaściu 60—75%. A pieravyšeńnie normy apadkaŭ moža dasiahać ad 30 da 75%.
Akaŭnt Kabančuka ŭzłamali — ale ci biełaruskija śpiecsłužby?4
Kamientary