Zakryćcio restarana Falcone u Minsku moža być źviazana z rasśledavańniem polskich žurnalistaŭ
Uviečary 8 studzienia na polskim telekanale TVN24 u prahramie «Czarno na białym» vyjšła rasśledavańnie, hałoŭnym fihurantam jakoha staŭ upłyvovy polski biznesmen Vitold Karčeŭski. Kampanija Karčeŭskaha vałodała prestyžnym restaranam Falcone u Minsku, jaki tydzień tamu abjaviŭ pra zakryćcio, piša REFORM.news.
Hanarovy prezident Savieta Handlova-pramysłovaj pałaty ŭ Biełastoku, staršynia praŭleńnia Padlaskaha ekanamičnaha forumu Vitold Karčeŭski — daŭni biźnies-partnior Alaksandra Zinhmana. U Polščy Karčeŭski pradaje zapčastki dla traktaroŭ MTZ.
Zinhman uvachodzić u najbližejšaje asiarodździe Viktara Šejmana, adnaho z samych upłyvovych ludziej Biełarusi i bližejšaha paplečnika Alaksandra Łukašenki.
U 2021 hodzie ŭ intervju TUT.by Zinhman pryznavaŭsia, što restaranam Falcone vałodaje polskaja kampanija «Kantraktus» Karčeŭskaha, a kiruje im jaho žonka Lizavieta.
Polskija žurnalisty vyśvietlili, što Zinhman i sam byŭ pracaŭładkavany ŭ restaranie. Śviedki śćviardžajuć, što Zinhman nie tolki byŭ farmalna pracaŭładkavany, ale i prymaŭ rašeńni pa kiravańni.
Miarkujučy pa filmie, pakazanym na TVN24, polskija žurnalisty jašče na pačatku vosieni dali zrazumieć Karčeŭskamu, što cikaviacca jahonymi suviaziami ź biełaruskim režymam. Tamu łahična mierkavać, što biznesmien śviadoma zakryŭ biznes u Biełarusi.
U paviedamleńni samoha restarana jość namiok na toje, što nieŭzabavie jon zapracuje pad novaj šyldaj.
Ale nie tolki historyju z restaranam raskazali na TVN24. U rasśledavańni śćviardžajecca, što Karčeŭski, niahledziačy na padazreńni ŭ karupcyi, maje ciesnyja adnosiny ź viadučymi polskimi palitykami i čynoŭnikami z roznych partyj. Tak, hledačam pakazali kadry sustrečy kiraŭnika kamiteta polskaha Siejma pa zamiežnych spravach Paŭła Kovala ź Vitoldam Karčeŭskim.
Žurnalisty vykazali zdahadku, što Karčeŭski moh abmiarkoŭvać z Kovalem polski kredyt Kienii na zakupku sielhastechniki. Mienavita ŭ karumpavańni kienijskich uładaŭ padazravali Karčeŭskaha ŭ minułym.
Jość i inšaja tema, jakaja turbuje žurnalistaŭ — Ukraina. Koval źjaŭlajecca ŭpaŭnavažanym urada Polščy pa adnaŭleńni Ukrainy. Blizkaść da jaho čałavieka, źviazanaha ź biełaruskim režymam, moža pahražać biaśpiecy nie tolki Polščy, ale i Ukrainy.
U tym ža intervju 2021 hoda Zinhman pryznavaŭsia, što mienavita Karčeŭski padkazaŭ jamu ideju dla biznesu ŭ Afrycy:
— Uvieś hety čas ja sprabavaŭ zrazumieć, jak možna źviazać Biełaruś i Afryku. I ŭ adzin momant pryjšła ideja, što hetym suviaznym źvianom moža stać sielskaja haspadarka. Da hetaha mianie, možna skazać, padšturchnuŭ polski biznesoviec Vitold Karčeŭski, ź jakim u mianie byli dobryja adnosiny. Sprava ŭ tym, što jahonaja firma «Kantraktus» atrymała pośpiech u halinie sielskaj haspadarki ŭ Biełarusi. Jany byli aficyjnymi dylerami techniki John Deere, Kverneland u Biełarusi, brali ŭdzieł u madernizacyi biełaruskich miasakambinataŭ i hetak dalej. Ja bačyŭ, što ŭ jaho heta atrymoŭvajecca, tamu padumaŭ, čamu ŭ mianie nie atrymajecca prasoŭvać biełaruskuju techniku ŭ Afrycy.
U 2023-m kienijskija ŚMI napisali pra zahadkavuju ździełku ź Biełaruśsiu na 320 młn dołaraŭ. Nibyta našaja kraina vydzialaje Kienii kredyt na hetuju sumu na kuplu biełaruskaj techniki. Paviedamlałasia, što ździełku płanujuć zaklučyć da vosieni 2024 hoda i supravadžaje jaje Alaksandr Zinhman. Schiema vielmi padobnaja da polskaha varyjantu. Tady bienieficyjaram staŭ Karčeŭski. Na hety raz suma ŭ try razy bolšaja.
U Kieniju ŭ śniežni 2023 hoda prylataŭ Łukašenka. Jon pravioŭ u krainie niekalki hadzin i paśpieŭ sustrecca z prezidentam Kienii Uiljamam Ruto.
Kamientary
Heta pačućcie humara ci znoŭ u antisimitiźmi abvinavaciat )))