U Asipovičach padčas viačery ŭ dziciačym sadku pamierła dvuchhadovaje dzicia
U dziciačym sadku Asipovičaŭ pamierła dvuchhadovaje dzicia, ale ŭłady pra heta nie paviedamlali. Ciapier Śledčy kamitet pravodzić pravierku nadzvyčajnaha zdareńnia, a vydańniu «Lusterka» ŭdałosia daviedacca padrabiaznaści trahiedyi.
Jak stała viadoma «Lusterku», nadzvyčajnaje zdareńnie adbyłosia ŭ Asipovickim dziciačym sadku № 12. Sa słoŭ krynicy, znajomaj ź situacyjaj, usio zdaryłasia ŭ kancy śniežnia minułaha hoda.
Dzicia znachodziłasia ŭ hrupie, padčas viačery adbyłasia aśfiksija — stan, pry jakim zvužajucca dychalnyja šlachi z-za traplańnia inšarodnaha abjekta, a arhanizm nie atrymlivaje kisłarod.
«Jon jeŭ bliniec i nie zmoh jaho pražavać», — raskazaŭ surazmoŭca. Pavodle jaho słoŭ, siamji nie dazvalajuć havaryć pra trahiedyju publična.
Žurnalistka «Lusterka» patelefanavała ŭ adździeł pa adukacyi Asipovickaha rajvykankama jak zaniepakojenaja žycharka horada. U viedamstvie paćvierdzili infarmacyju pra hibiel dziciaci i paviedamili, što SK pravodzić śledčyja dziejańni.
«Taja infarmacyja, jakaja pavinna być daviedzienaja da hramadskaści, budzie daviedzienaja va ŭstanoŭlenym paradku. Dla mianie heta trahičny vypadak, — adkazała čynoŭnica. — Adździeł adukacyi ŭ toj ža dzień znachodziŭsia na miescy, usie słužby byli prainfarmavanyja nieadkładna. Heta prakuratura Asipovickaha rajona, Śledčy kamitet rajona, rajvykankam i vyšejstajačaja arhanizacyja — Upraŭleńnie pa adukacyi [Mahiloŭskaha abłvykankama]».
Pa słovach supracoŭnicy adździeła pa adukacyi, vychavalniki, jakija ŭ toj dzień byli na źmienie, jak i zahadčyca dziciačaha sadka, praciahvajuć znachodzicca na pracoŭnych miescach. Na čas praviadzieńnia pravierki praz nadzvyčajnaje zdareńnie ich nie adchilali.
«Na jakoj padstavie jany mohuć siońnia nie pracavać? Vy ž ničoha nie viedajecie pra toje, što adbyłosia, — zajaviła jana. — Hetaja ŭstanova pracuje dziesiacihodździami tym składam, što i siońnia, uklučajučy tych ža vychavalnikaŭ. Praź ich ruki prajšli sotni dziaciej. Tam i siońnia 110 dziaciej. Usie žyvyja i zdarovyja.
Ja dziesiacihodździami pracuju ŭ sistemie adukacyi, i heta pieršy taki vypadak, trahičny vypadak. Ciapier vyznačajecca, chto ŭ im vinavaty i ci vinavaty. Kali vyznačać, što jość vina supracoŭnikaŭ, to, viadoma, jany paniasuć pakarańnie. U ciapierašni momant my ličym, što ich viny niama».
Jak adznačyła čynoŭnica, supracoŭniki adździeła adukacyi taksama prysutničali na pachavańni zahinułaha dziciaci.
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»36
Kamientary