Va Ukrainie za niezakonnaje pierasiačeńnie miažy zatrymali i vydvaryli dvuch bratoŭ-biełarusaŭ
Dvuch bratoŭ, biespracoŭnych hramadzian Biełarusi, zatrymali ŭviečary 11 kastryčnika minułaha hoda ŭ vioscy Dzianisavičy Kijeŭskaj vobłaści. Zatrymanyja kazali, što źbirali hryby. Pra incydent stała viadoma z apublikavanaha 13 studzienia sudovaha rašeńnia, paviedamiła «Radyjo Svaboda».
Hetaja vioska znachodzicca ŭ čarnobylskaj zonie Ukrainy i z 1999 hoda źniataja z uliku, bo ŭ 1993 hodzie jaje žycharoŭ kančatkova pierasialili ŭ inšy rajon Kijeŭskaj vobłaści.
Dzianisavičy znachodziacca ŭ Kijeŭskaj vobłaści, za try kiłamietry ad biełaruskaj miažy i za 35 kiłamietraŭ ad bližejšaj pamiežnaj zastavy.
U svaim tłumačeńni padčas zatrymańnia braty zajavili, što vypadkova trapili na terytoryju Ukrainy, bo «jany chadzili ŭ les dla zboru hryboŭ u rajon nasielenaha punkta Alaksandraŭka» (znachodzicca ŭ Naraŭlanskim rajonie Homielskaj vobłaści. — RS).
Sudździa krytyčna pastaviŭsia da hetaha tłumačeńnia, bo Alaksandraŭka znachodzicca ŭ inšy bok ad miesca, dzie bratoŭ znajšli ŭkrainskija pamiežniki. U vyniku ich prymusova vydvaryli, pastavili zabaronu na piać hadoŭ naviedvać Ukrainu i ŭ ich adsutnaść asudzili na maksimalny štraf, praduhledžany Kodeksam Ukrainy ab administracyjnych pravaparušeńniach, — pa 13600 hryŭniaŭ kožnamu (pryblizna 340 dalaraŭ u ekvivalencie). Dadatkova biełarusy pavinny zapłacić jašče 605 hryŭniaŭ sudovaha zboru.
U dakumiencie nie ŭdakładniajecca miesca žycharstva biełarusaŭ. Viadoma, što adzin ź ich atrymlivaŭ pašpart u Mazyrskim rajonie, a druhi — u Naraŭlanskim rajonie Homielskaj vobłaści.
Paśla rasijskaha vajennaha ŭvarvańnia ź biełaruskaj terytoryi ŭ lutym 2022 hoda Ukraina zakryła ŭsie punkty propusku na miažy ź Biełaruśsiu. Ciapier na biełaruska-ŭkrainskaj miažy pracuje tolki adzin punkt propusku «Makrany — Damanava», jaki vykonvaje funkcyi humanitarnaha kalidora — praź jaho mohuć prajści pieššu tolki hramadzianie Ukrainy, jakija viartajucca z rasijskaj akupacyi.
Jak ciapier vyhladaje palitźniavoleny Ihar Łosik FOTA16
Kamientary