Калі вашы адносіны ператварыліся ў руціну, калі, знаходзячыся побач, кожны з вас займаецца сваёй справай а на выходныя мае асобныя планы, то тады паспрабуйце правіла «2-2-2». Яно дапаможа ўмацаваць адносіны і надасць ім былую цеплыню.
Калі вы даўно адчуваеце, што згубілі сувязь адно з адным, жывяце разам хутчэй як суседзі, у вас усё менш сумесных заняткаў па-за хатнімі абавязкамі і доглядам за дзецьмі, то псіхолагі рэкамендуюць выкарыстаць правіла «2-2-2».
Гэтае правіла на платформе Reddit у 2015 годзе прапанаваў адзін з карыстальнікаў. Па яго словах, яно дапамагае яму заставацца на адной хвалі са сваёй другой палавінкай доўгія гады. З таго часу дзеянне гэтага правіла праверыла на сабе шмат людзей і яно набыло шырокую вядомасць і папулярнасць. Расказваем яго сутнасць.
Крок 1: спатканне кожныя два тыдні
Першая двойка прадугледжвае сумеснае правядзенне часу ў нейкім месцы па-за домам. Гэта можа быць абед ці вячэра ў кавярні, паход у кіно, тэатр, на выставу, наведанне канцэрту любімага выканаўцы ці пікнік за горадам.
На такой сустрэчы не павінна быць пабочных асобаў, а таксама дзяцей. Аднясіцеся да яе як да сапраўднага спаткання, згадайце, якія пачуцці вас напаўнялі напярэдадні такой падзеі ў той час, калі вы толькі пазнаёміліся.
Такая сустрэча павінна быць добра прадумана і спланавана. Забраніруйце загадзя столік у рэстаране ці набудзьце білеты. І няхай гэта будзе прыемным сюрпрызам для аднаго з вас.
Крок 2: паездка на выходныя кожныя два месяцы
Другая двойка азначае сумесны выезд на выходныя кожныя два месяцы. Ужо абмеркаванне месца паездкі і яе дэталяў дадасць новых фарбаў у вашыя адносіны. Падчас абмеркавання прыслухоўвайцеся адзін да аднаго, ідзіце на кампраміс, улічвайце перавагі адзін аднаго.
Такія выходныя дазволяць забыцца пра штодзённую руціну. Паспрабуйце выключыць тэлефоны і атрымаць асалоду ад знаходжання побач адно з адным. Гуляючы па незнаёмых вуліцах новага горада ці даўно вядомымі сцежкамі ў ваколіцах роднай вёскі, дзяліцеся з партнёрам сваімі думкамі, поглядамі і пачуццямі.
Вы можаце ўключыць у сваю праграму наведанне лазні ці забаўляльнага цэнтру, паход у лес па грыбы, рамантычную вячэру ў аграсядзібе. Магчымасці бясконцыя. Галоўнае, каб вам гэта падыходзіла абаім. Не бойцеся спрабаваць нешта новае — новыя віды актыўнасці, новыя месцы. Магчыма, гэта прыдасць новы стымул вашым адносінам.
Крок 3: сумесны адпачынак кожныя два гады
Трэцяя двойка азначае тыднёвы сумесны адпачынак кожныя два гады. І гэта ні ў якім разе не азначае паездку да бацькоў ці родзічаў аднаго з партнёраў! У такой паездцы вы павінны быць толькі ўдвух.
За два гады можна накапіць грошай, каб зрабіць такі адпачынак асаблівым. А планаванне яго стане адной з важных тэмаў для вашых размоваў.
Як і ў выпадку з выходнымі, такі адпачынак залежыць толькі ад вашых пераваг. Вы можаце правесці яго ў Беларусі ці за мяжой, зняць домік на азёрах ці адправіцца пакараць горы. Гэта можа быць пяцізоркавы гатэль на курорце ці маленькая кватэрка ў старажытным горадзе. Галоўнае, каб ваш тыднёвы адпачынак прынёс вам больш станоўчых эмоцый, а па вяртанні дахаты вы адчувалі сябе больш блізкімі, чым да паездкі.
Спадзяемся, што выкарыстанне правіла «2-2-2» дапаможа вам рэгулярна ўдзяляць адно аднаму час, «перазагрузіць» адносіны, надасць ім навізны і рамантызму. Нават калі вашыя адносіны няпростыя, выкананне нескладаных рэкамендацый гэтага правіла згладзіць няроўнасці і зробіць адносіны больш гарманічнымі.
Чытайце яшчэ:
Дзевяць ідэй для захапляльных ці карысных выхадных. Як правесці адпачынак, не губляючы шмат грошай
Каб вандроўка не ператварылася ў сваркі: як паводзіць сябе, калі падарожнічаеш у кампаніі
Каментары
Но ни слова о том, куда деть детей.