«Ryełtary choram kažuć, što narod pakul u stupary». Što adbyvajecca na rynku nieruchomaści
Masavy adtok nasielnictva ź Biełarusi, niestabilnaja situacyja na valutnym rynku… Što na hetym fonie adbyvajecca ŭ halinie nieruchomaści? «Naša Niva» apisvaje asnoŭnyja tendencyi.
Častka ździełak sarvałasia
Sakavik ciažka nazvać pakazalnym u płanie statystyki, pakolki pieravažnaja častka ździełak, aformlenych u minułym miesiacy, była zapłanavanaja jašče da pačatku vajny. Adnak navat za hety pieryjad kolkaść prodažaŭ prykmietna skaraciłasia, častka ździełak sarvałasia.
«Za minuły miesiac u stalicy było ździejśniena ŭsiaho kala 850-900 ździełak, kali dla sakavika charakternym źjaŭlajecca 1150. Anałahičnaja tendencyja nazirajecca pa ŭsioj krainie.
Z pačatkam vajny častku druhasnaha žylla źniali z prodažu, adtok skłaŭ kala 10-15% ad ahulnaj kolkaści prapanoŭ. U asnoŭnym heta byli tyja pradaŭcy, chto, chutčej, prosta pryceńvaŭsia, čym byŭ hatovy da realnych dziejańniaŭ. U toj ža čas kolkaść novych prapanoŭ vyrasła na 20 pracentaŭ. Ludzi zachacieli pasprabavać pazbavicca ad tak zvanaha dadatkovaha žylla. Pałova z tych, chto praciahnuŭ prodaž, pajšli pa šlachu źnižeńnia pieršapačatkovaj cany», — adznačaje adzin z ekśpiertaŭ pa nieruchomaści.
Nieruchomaść praciahnie tańnieć
Ryełtary kanstatujuć, što pa stanie na pačatak krasavika narod znachodzicca ŭ stupary. Cikavaść da nieruchomaści nizkaja. Śpiecyjalisty vykazvajuć zdahadki, što, niahledziačy na ŭžo prykmietnaje skaračeńnie kolkaści ździełak u sakaviku, krasavickija pakazčyki buduć jašče bolš ścipłymi. Biahučaja situacyja ŭžo paśpieła adbicca na cenach.
«U stalicy druhasnaja nieruchomaść u realnych ździełkach u siarednim patańnieła na dziesiać pracentaŭ u paraŭnańni z pačatkam lutaha hetaha hoda. Kazać pra toje, što ceny pierastanuć źnižacca, nie prychodzicca. Ciapier my nazirajem surjozny adtok nasielnictva ź Biełarusi. Ludzi źjazdžajuć, ale ŭ bolšaści svajoj adrazu ad nieruchomaści nie pazbaŭlajucca. Tamu hety praces budzie zaciažnym.
U toj ža čas źmieny, źviazanyja sa spahnańniem kamunalnych płaciažoŭ z asob, jakija bolš za 30 dzion znachodziacca pa-za miežami Biełarusi, mohuć u peŭnaj miery farsiravać padziei. Heta moža padšturchnuć ludziej chutčej vystavić žyllo na prodaž albo pasprabavać zdać jaho ŭ arendu. Pavieličeńnie kolkaści prapanoŭ pry nizkim popycie pryviadzie da jašče bolšaha źnižeńnia stavak arendy», — ličyć analityk rynku.
Cana arendy kvater źnižajecca. U pieršuju čarhu z-za kursavych vahańniaŭ. Ludzi sprabujuć źnizić canu ŭ valucie albo ŭstalavać jaje ŭ rublach.
U niekatorych ŽK cana źniziłasia na 15-25 %
Rynak novaj nieruchomaści ŭvohule apynuŭsia ŭ katastrafičnaj situacyi.
«Samy surjozny ŭdar naniesła skaračeńnie kolkaści partniorskich prahram ad bankaŭ. Pa hetaj schiemie raniej nabyvałasia kala 30% novaj nieruchomaści. Akramia taho, u patencyjnych pakupnikoŭ niama ŭpeŭnienaści ŭ tym, što budzie z cenami na ramont i abstalavańnie na momant zdačy abjekta. Taksama isnujuć peŭnyja aściarohi nakont taho, ci zmohuć zabudoŭščyki ŭkłaścisia ŭ termin. Usio heta niehatyŭna adbivajecca na prodažach.
Pa šerahu padobnych pryčyn rynak druhasnaha žylla akazvajecca ŭ krychu bolš vyhadnym stanoviščy. Ty adrazu bačyš, što kuplaješ, jość mahčymaść praličyć vydatki na ramont.
Zabudoŭščyki pa-roznamu reahujuć na toje, što adbyvajecca. Adny, kab pryciahnuć klijentaŭ, ustaloŭvajuć svoj kurs u valucie, jaki nižejšy za toj, što možna ŭbačyć u abmieńniku, inšyja prosta źnižajuć canu ŭ valucie. My ŭžo nazirajem, što ŭ niekatorych ŽK cana kvadrata źniziłasia na 15-25 pracentaŭ u paraŭnańni z pačatkam lutaha».
Častka zabudoŭščykaŭ pakul nie prymała nijakich mier pa źnižeńni cany. Heta tłumačycca tym, što na biahučy momant arhanizacyja nie maje patreby ŭ srodkach i moža sabie dazvolić zaniać čakalnuju pazicyju. Abviaščajučy akcyi i rasprodažy, zabudoŭščyki imknucca znachodzić bałans, jaki dazvolić nie razzłavać inšych dolščykaŭ, jakija płacili bolš.
Novyja biznes-centry pustujuć
Niaprostaja situacyja i z kredytavańniem. Ciapierašnija staŭki niejmavierna vysokija. Kab atrymać kredyt na kuplu nieruchomaści, nieabchodna mieć taki aficyjny dachod, pry jakim hety kredyt faktyčna nie spatrebicca.
Masavaja rełakacyja ajcišnikaŭ i składanaja ekanamičnaja situacyja ŭ cełym niehatyŭna adbivajucca na rynku kamiercyjnaj nieruchomaści.
«Novyja biznes-centry pustujuć. IT-kampanii źjazdžajuć, pakidajučy niezadziejničanymi vielizarnyja płoščy. Drobny biznes zhortvajecca. Kolkaść pamiaškańniaŭ pad arendu tolki pavialičvajecca. Arendadaŭcy vymušanyja źnižać staŭki, a tyja, chto hetaha svoječasova nie zrobić, ryzykuje zastacca biez arandataraŭ», — ličyć ekśpiert.
Čytajcie jašče:
«Naša Niva» adnaŭlaje zbor danataŭ — padtrymać prosta
Jak biełarusy pierasiakajuć naziemnuju miažu paśla admieny abmiežavańniaŭ
«Aznačeńnie Biełarusi jak vypalenaj ziamli mnie nie padabajecca». Manałoh biełarusa, jaki niadaŭna źjechaŭ z krainy13
Kamientary