MAZ dla «Łaskavaha maja». Jak u Minsku stvaryli i stracili ŭnikalny hruzavik
Stała viadoma pra śmierć Juryja Šatunova, samaha viadomaha z salistaŭ niekali kultavaha savieckaha hurta «Łaskavy maj». Mała chto viedaje, ale da jaho ŭsienarodnaj papularnaści spryčynilisia kanstruktary Minskaha aŭtamabilnaha zavoda, stvaryŭšy dla muzykantaŭ adzinuju ŭ svaim rodzie mašynu, jakaja była im i domam na kołach, i scenaj.
Usio pačałosia sa znajomstva ŭ 1990 hodzie ŭ ciahniku na Minsk 27-hadovaha kiraŭnika «Łaskavaha maja» Andreja Razina z 62-hadovym hienieralnym kanstruktaram MAZa Michaiłam Vysockim. Niahledziačy na roźnicu va ŭzroście, pamiž imi zaviazalisia vielmi ciopłyja stasunki: muzykant pačaŭ nazyvać kanstruktara tatam, a jahonuju žonku — mamaj.
Pieršym vynikam siabroŭstva stała stvareńnie ŭsiaho za try miesiacy na Minskim aŭtazavodzie ŭnikalnaha hruzavika, jaki atrymaŭ nazvu «Šasi 0000001».
Žurnalist Juryj Uładaŭski apisvaŭ asablivaści kanstrukcyi hetaha aŭtamabila nastupnym čynam: za asnovu byŭ uziaty 3-vosny MAZ-6303, na jaki ŭstalavali śpiecyjalny kuzaŭ, jaki składaŭsia ź dźviuch častak.
Pieršaja była žyłoj: tam byli vosiem spalnych miescaŭ, kuchnia, bijatualet i ŭsio nieabchodnaje dla žyćcia padčas hastrolaŭ. A ŭ druhoj častcy možna było raźmiaścić da 8 ton kancertnaj aparatury.
Razynkaj była scena, jakaja ŭstaloŭvałasia na śpiecyjalnym karkasie na dachu hruzavika i mahła vytrymać da niekalki ton nahruzki. Za hady pracy «Łaskavy maj» daŭ bolš za 800 kancertaŭ prosta z dachu svajoj mašyny.
«Šasi 0000001» taksama stała bazaj dla techničnych ekśpierymientaŭ i niezvyčajnaha abstalavańnia. Naprykład, kiroŭca nadziavaŭ niezvyčajny hadzińnik, jaki spracoŭvaŭ i vyklučaŭ ruchavik u vypadku, kali jamu stanaviłasia kiepska ci jon zasynaŭ.
Što tyčycca čysta techničnych asablivaściaŭ, to hruzavik abstalavali ekanamičnym 400-silnym ruchavikom, jaki dazvalaŭ razhaniacca da 110 km/h i raschodvać nie bolš za 30 litraŭ paliva na 100 kiłamietraŭ, a taksama šaściu akumulatarami, jakija zabiaśpiečvali aŭtanomnuju pracu da dvuch dzion.
Pa čutkach, MAZam «Łaskavaha maja» zachaplałasia Ała Puhačova. Prymadona nibyta pryjazdžała da Vysockaha i ŭhavaryła taho na «Šasi 0000002», ale ŭ vyniku jano tak i nie było stvorana.
Jak byŭ stračany ŭnikalny hruzavik?
Krynicy dajuć roznuju infarmacyju, kolki «Łaskavy maj» prakarystaŭsia hruzavikom. Adny pišuć pra 10 hadoŭ i 680 tysiač kiłamietraŭ, prajezdžanych na im hurtom, druhija — pra čatyry hady i amal miljon kiłamietraŭ pa darohach byłoha SSSR.
Mašyna vytrymała ŭsie nahruzki, zrabiŭšy dobruju rekłamu Minskamu aŭtazavodu, i viarnułasia na radzimu. Kažuć, takaja była ŭmova Michaiła Vysockaha. «Šasi 0000001» niekalki hadoŭ stajała na stajancy zavoda, paśla jaje prosta parezali i zdali na mietałałom, jak i šmatlikija inšyja ŭnikalnyja raspracoŭki MAZa.
Siabroŭstva pradziusiera «Łaskavaha maja» i hienieralnaha kanstruktara, hieroja Biełarusi praciahvałasia da samaj śmierci Michaiła Vysockaha ŭ 2013 hodzie. Hurt za hety čas daŭ bolš za 50 kancertaŭ dla supracoŭnikaŭ zavoda, a Razin nieadnarazova pryjazdžaŭ na radzimu Vysockaha na Kapylščynu.
Pašpart Novaj Biełarusi pačnuć vydavać z 26 studzienia. Što viadoma i jak atrymać?90
Kamientary