Pracavała na telekanałach Miedźviedčuka. Chto takaja Nadzieja Sas — novaja prapahandystka STB
Na telekanale jana źjaviłasia paśla pačatku vajny va Ukrainie. Nadzieja Sas viadzie palityčnaje tok-šou «Sas upaŭnavažany zajavić», u jakoje zaprašaje biełaruskich i rasijskich prapahandystaŭ. Sama dziaŭčyna źjechała z Kijeva za 10 dzion da pačatku vajny.
Televiadučaj 28 hadoŭ. Rodam jana z Ukrainy, horada Dniepradziaržynska (ciapier Kamienskaje) Dnieprapiatroŭskaj vobłaści.
U 2016-m Nadzieja Sas skončyła Instytut mižnarodnych adnosin Kijeŭskaha nacyjanalnaha ŭniviersiteta imia Tarasa Šaŭčenki, atrymała śpiecyjalnaść mahistra mižnarodnaha prava, pierakładčycy z anhlijskaj movy.
U tym ža hodzie prachodziła stažyroŭku ŭ ofisie vice-prezidenta Jeŭraparłamienta Ryšarda Čarnieckaha.
Paśla vypusku Nadzieja Sas pačała pracavać na prarasijskich telekanałach, jakija naležali pułu Viktara Miedźviedčuka.
Viaščańnie telekanałaŭ NewsOne, ZIK, «112 Ukraina», na jakich pracavała Nadzieja Sas, było spyniena na pačatku 2021-ha. Prezident Ukrainy Uładzimir Zialenski padpisaŭ ukaz ab uviadzieńni sankcyj u dačynieńni da fizičnych i jurydyčnych asob telekanałaŭ.
U Ofisie prezidenta Ukrainy sankcyi patłumačyli nieabchodnaściu supraćdziejańnia «zamiežnaj prapahandzie». Jak paćvierdzicca ŭ lutym 2022 hoda, kum Pucina Miedźviadčuk byŭ častkaj płana Uładzimira Pucina pa zachopie i rasčlanieńni Ukrainy.
U Biełaruś Nadzieja Sas razam ź siamjoj pierajechała 13 lutaha, za dziesiać dzion da pačatku vajny.
«Svaboda słova va Ukrainie jašče da 24 lutaha stała vielmi ŭmoŭnaj, — tłumačyła pryčynu pierajezdu ŭ Biełaruś Sas łukašenkaŭskamu vydańniu «Biełaruś siehodnia». — Jak žurnalist, ja praktyčna całkam straciła prava na prafiesiju, bo viaščańnie telekanałaŭ, na jakich ja pracavała (NewsOne i ZIK), było zabaroniena pa rašeńni represiŭnaha orhana dziejnaj ułady — Rady nacyjanalnaj biaśpieki i abarony Ukrainy.
Sa studzienia 2021-ha ŭłada razharnuła palavańnie na tych, chto im ža dapamoh u 2019-m, a nie na Parašenku, čyjoj pasadki čakali miljony ŭkraincaŭ. Tamu my pryniali rašeńnie pakinuć Ukrainu».
Vykazvałasia Nadzieja Sas i pra vajnu.
«Ciapier usio, što adbyvajecca va Ukrainie, — heta bol. Bol, jaki staŭ vynikam vialikaj pamyłki dziejnaj ułady, jaje dyletanctva, niazdolnaści iści na kampramis i niežadańnia ŭśviedamlać nastupstvy svaich dziejańniaŭ. Naša kraina mahła b stać zusim inšaj», — kazała jana ŭ intervju.
Sas zvolnili z telekanała NewsOne jašče ŭ 2017 hodzie «za parušeńnie prafiesijnych standartaŭ». Tady televiadučaja vykazałasia pra Piatra Parašenku.
«Kali b jon padzialiŭsia ŭsim svaim dabrom, jakoje ŭ jaho ŭ afšorach i jakoje jon atrymaŭ ad Lipieckaj fabryki, heta było b lepš dla ŭsich ukraincaŭ», — kazała jana.
U Biełaruś Nadzieja Sas pryjechała razam z dvuma dziećmi (synam i dačkoj) i mužam Aleham Vałošynym, ź jakim jana pabrałasia šlubam u 2016-m.
Jašče niadaŭna sacsietki Nadziei Sas byli adkrytymi, ciapier televiadučaja zakryła svaju staronku ŭ fejsbuku i instahramie.
Miarkujučy pa fotazdymkach, jakija tam byli, siamja, kali jašče žyła va Ukrainie, čaściakom jeździła ŭ Jeŭropu.
Jaje muž — Aleh Vałošyn — były pres-sakratar i dyrektar Departamienta infarmacyi Ministerstva zamiežnych spraŭ Ukrainy, deputat Viarchoŭnaj Rady IX sklikańnia ŭ składzie frakcyi prarasijskaj partyi «Apazicyjnaja płatforma — Za žyćcio» (u červieni hetaha hoda dziejnaść partyi rašeńniem suda była zabaroniena, bo jana taksama vyjaviłasia častkaj vajennaha scenara Rasii).
Sioleta ŭ sakaviku Dziaržaŭnaje biuro rasśledavańniaŭ Ukrainy praviało pieratrusy ŭ niekatorych deputataŭ APZŽ. Jak paviedamlałasia raniej, u Aleha Vałošyna była znojdziena zbroja.
Śledčyja dziejańni pravodziłasia ŭ ramkach dasudovaha rasśledavańnia, jakoje było raspačata pa fakcie «niepravamiernych dziejańniaŭ słužbovych asob pravaachoŭnych orhanaŭ, jakija sadziejničali peŭnym asobam, u pryvatnaści narodnym deputatam, u niezakonnym pierasiačeńni dziaržmiažy».
Kryminalnaja vytvorčaść adkrytaja pa č.3 art. 365 KK Ukrainy (pieravyšeńnie ŭłady abo słužbovych paŭnamoctvaŭ rabotnikam pravaachoŭnaha orhana, jakoje pryviało da ciažkich nastupstvaŭ).
Viadoma, što sama Sas była členam APZŽ, bałatavałasia ad jaje ŭ deputaty Dnieprapiatroŭskaj abłasnoj rady.
Pra što raskazvaje Nadzieja Sas na telekanale STB?
Jana viadzie palityčnaje tok-šou «Sas upaŭnavažany zajavić», u jakoje zaprašaje vyklučna praŭładnych biełaruskich i rasijskich ekśpiertaŭ. Naprykład, u jaje ŭ studyi byli Aleh Hajdukievič, Alaksandr Špakoŭski, Aleh Biełakonieŭ, Alaksiej Aŭdonin, Alaksiej Dziermant.
Voś ź jakimi nazvami vychodzili prahramy: «Što pahražaje Biełarusi i ŭ čym sens palityki sučasnaj Jeŭropy?», «Kryzis u Jeŭropie i nastupstvy sankcyj dla abodvuch bakoŭ», «Zachad suprać Uschodu! Chto budzie kiravać śvietam u budučyni?».
Voś što Nadzieja Sas sama havoryć u vypuskach.
«Da niadaŭnich časoŭ takija dziaržavy, jak Polšča i krainy Bałtyi, usprymalisia maryjanietkami ŭ rukach Zachadu. Ci nie składvajecca ŭ vas uražańnie, što zaraz jany źjaŭlajucca asnoŭnymi zastrelščykami eskałacyi? — pytałasia Nadzieja Sas u ekśpiertaŭ.
«Siońnia amierykanskija naftahazavyja kampanii ŭ siarednim zarablajuć na adnym tankiery-hazavozie kala 130 miljonaŭ dalaraŭ. Mienavita 130-150 miljonaŭ dołaraŭ — heta i jość košt tankiera. Heta značyć, za adzin pachod jany zabiaśpiečvajuć sabie takija finansavyja mahčymaści. Uźnikaje pytańnie. Dobra, Pucin drenny, čamu tady ZŠA nie iduć nasustrač ES, toje, što adbyvajecca zaraz ź jeŭravalutaj, padšturchoŭvaje na dumku, što ZŠA zacikaŭleny ŭ krachu ekanamičnym ES», — kazała jana z ekrana.
Čytajcie taksama:
«Hałoŭnaje, jak skazaŭ kiraŭnik dziaržavy, — «raździavacca i rabić». Chto taki Mikita Palakievič — novy tvar ANT
«Heta ž prosta jeraś!» Prapahandysty sabralisia na STV abhavaryć fejki, i pakaciłasia
«Dzikaje palavańnie» Kiryła Kazakova. Što za prapahandyst raskrytykavaŭ kaleh? VIDEA
Stała viadoma pra zatrymańnie 77-hadovaha Vasila Hustyra, adnaho z najlepšych ahraryjaŭ Biełarusi2
Kamientary