Sušanyja kiłbasy, miod, syr. Kolki kaštujuć fiermierskija pradukty
Usio bolš ludziej zadumvajecca nad tym, jakimi praduktami charčavacca, tamu papularnaść fiermierskich ekałahičnych praduktaŭ uzrastaje. Ale ž pryniata mierkavać, što takaja ježa nie dla masavaha spažyŭca — z-za cen. Ci tak heta? Pahladzieli, za kolki biełaruskija fiermiery realizujuć svaju pradukcyju, i paraŭnali hetyja ceny z tymi, što ŭ kramie.
Fota: instahram derevenskie_produkty_minsk
Dla paraŭnańnia my ŭziali nastupnyja pradukty: kurynyja jajki, małako, masła, tvaroh, śmiatanu, tušku kurycy, śvininu, miod, syr, jabłyki i kaŭbasu. Heta tyja pradukty, jakija čaściej za ŭsio pradajuć u zimovy siezon.
Jajki
U siarednim dziasiatak bujnych kurynych jajek kaštuje 5 rubloŭ. Pavodle našych nazirańniaŭ, tańniej za ŭsio hety pradukt pradajuć fiermiery na Homielščynie i ŭ Bresckim rajonie — pa 4,5 rubla za dziesiać štuk. U Minskim rajonie i vobłaści zvyčajna staić ceńnik 5 rubloŭ. Pad Brestam, Mahilovam i ŭ Vałožynskim rajonie kuplajuć i pa 6 rubloŭ.
Usie fiermierskija haspadarki zajaŭlajuć, što nie vykarystoŭvajuć dla svaich kurej nijakich charčovych dabavak i harmonaŭ.
Kuryca
Kurynyja tuški taksama nie nadta adroźnivajucca ŭ canie. Samy darahi kiłahram kurycy znajšoŭsia ŭ Minskim rajonie — 16 rubloŭ. U Minskaj i Bresckaj abłaściach pradajuć pa 13—15 rubloŭ za kiło, u Smalavickim rajonie za 13,5 rubla, a ŭ Bresckim — za 15,5. U siarednim treba raźličvać na 14 rubloŭ za kiłahram cełaj kurycy.
Małako
2 rubli za litr — takaja minimalnaja cana fiermierskaha małaka, stolki jano kaštuje ŭ Mahiloŭskaj vobłaści. Pad Homielem i Minskam — pa 3 rubli, u Vałožynskim rajonie pa 4 (tamu što ad ajšyrskich karoŭ), a rekord zafiksavany pad Brestam: 5 rubloŭ za litr. Tłustaść małaka nam nie viadomaja.
Masła karovina
Cana śmietankovaha masła pačynajecca ad 20 rubloŭ za kiłahram (znoŭ ža rekardsmienami stali mahiloŭskija fiermiery). U Bresckim rajonie masła pradajuć pa 7 rubloŭ za 300 hram (abo troški bolš jak 23 rubli za kiło), u Žodzinskim — za takuju ž vahu biaruć pa 9 rubloŭ (kiłahram, vychodzić, kaštuje 30 rubloŭ).
Daražej za ŭsio hety pradukt kaštuje na adnoj ź fiermaŭ Minskaj vobłaści — tam 500 hram masła pradajuć za 17 rubloŭ, abo pa 34 rubli za kiło.
Tvaroh
Nie ŭsie vytvorcy paznačajuć tłustaść hetaha praduktu, ale ž kali infarmacyja i jość, to havorka idzie pra 10—12%. Zvyčajna canu tvarahu ŭkazvajuć za paŭkiłahrama — i jana pačynajecca ad 5—5,5 rubla (pad Mahilovam i Minskam), 6 rubloŭ biaruć u Vałožynskim rajonie, pa 8 i 8,5 rubla na Homielščynie i Brestčynie adpaviedna.
Śmiatana
Śmiatanu zvyčajna fasujuć pa paŭlitra, infarmacyi pra jaje tłustaść nam taksama nie ŭdałosia znajści. Pad Mahilovam taki abjom praduktu kaštuje 4 rubli, a ŭ Minskim i Vałožynskim rajonach — udvaja bolš.
Syr
Pakazać raźbiežku cen my vyrašyli na prykładzie macareły, tamu što hety syr fiermiery hatujuć čaściej za inšyja. U siarednim cana za kiłahram ustanoŭlena ŭ rajonie 30—32 rubloŭ, ale jość i značnaja raźbiežka: pad Minskam tolki 250-hramovy kavałak macareły kaštuje 13,8 rubla, to-bok za kiłahram atrymlivajecca ažno 55 rubloŭ!
Hrudzinka śvinaja
Ceny na miasnuju pradukcyju taksama vielmi adroźnivajucca ŭ fiermierskich haspadarkach roznych rehijonaŭ krainy. Śvinaja hrudzinka žycharam Minskaha rajona abydziecca ad 15 da 17 rubloŭ, u Turavie kiłahram hetaha praduktu kaštuje 16,77 rubla, u Minskaj vobłaści — 20, u Lidskim rajonie — 22, a ŭ Bresckim — 25 rubloŭ.
Kaŭbasa damašniaja
Ceńniki na kaŭbasu ŭłasnaha pryhatavańnia adčuvalna adroźnivajucca. Pavodle adzinaha recepta kaŭbasu, badaj, robiać tolki na zavodach, tamu ŭ fiermieraŭ u zaležnaści ad składu i sposabu pryhatavańnia možna znajści ceny na luby hust.
Sušanuju śvinuju kaŭbasu možna kupić ad 16 da 35 rubloŭ, syravendžanaja ŭ siarednim abydziecca ŭ 26 rubloŭ.
Miod
Hrecki miod — samy raspaŭsiudžany pradukt u svajoj hrupie. Jaho pradajuć u roznych abjomach, ale ž pryviadziom ceny za litr (heta kala 1,4 kh, kali vieryć vytvorcam). Samaja častaja cana — 18 rubloŭ, stolki, naprykład, kaštuje miod u Vałožynskim i Kamianieckim rajonach. U Minskaj vobłaści desiert abydziecca ŭ 22 rubli za litr.
Jabłyki
Siarod zimy hetaja sadavina znajšłasia tolki ŭ adnoj haspadarcy Pinskaha rajona. Cana — 3 rubli za kiłahram.
A kolki ŭsio heta kaštuje ŭ kramie?
Dla paraŭnańnia my padličyli siaredniuju vartaść kožnaha z apisanych nami praduktaŭ (zychodzili z danych tych haspadarak, dzie nam daviałosia daviedacca ceńniki). U druhuju hrupu źmiaścili pradukty anałahičnaj masy i abjomu, jakija pradajucca ŭ kramach sietki «Jeŭraopt».
Za prykład my brali tavary biez uliku akcyj, małočnyja pradukty abirali pavodle pryncypu najbolšaj tłustaści, a jabłyki — najtańniejšyja z tych, jakija vyraśli ŭ Biełarusi.
Što atrymałasia, hladzicie ŭ tablicy.
| Pradukt | Cana ŭ fiermieraŭ | Cana ŭ kramie |
| Jajki (10 št.) | 5 | 2,73 |
| Kuryca (1 kh) | 14 | 5,78 |
| Małako (1 ł) | 3,4 | 2,8 |
| Masła (1 kh) | 26,75 | 20,4 |
| Śmiatana (0,5 kh) | 7,6 | 3,7 |
| Tvaroh (0,5 kh) | 6,8 | 4,35 |
| Syr macareła (1 kh) | 37,3 | 23,3 |
| Hrudzinka śvinaja (1 kh) | 19,3 | 14,9 |
| Kaŭbasa syravendžanaja (1 kh) | 30,5 | 21 |
| Miod hrecki (1 ł abo 1400 h) | 14,5 | 24,9 |
| Jabłyki (1 kh) | 3 | 2,19 |
| Usiaho | 168,15 | 126,05 |
Jak bačym, bolš za ŭsio voka kole roźnica cen na kurycu, syr i kaŭbasu, a miod u drobnych pradprymalnikaŭ abydziecca značna tańniej, čym u sietkavaj kramie.
Kali brać siarednija, a nie minimalnyja ceńniki na fiermierskuju pradukcyju, to jany buduć istotna adroźnivacca ad samych nizkich cen u kramie. Ale ž kali znajści aptymalnyja varyjanty, to možna vydatkavać amal jak u kramie, ale ž pry hetym nabyć ekałahičnyja pradukty.
Kamientary
dastatkova na ahurkovych karalej pahladzieć - 'vo hety vo ahurčyk dla siabie, a vo hety vo na prodaž'