Sotni ludziej pa ŭsioj krainie tak i nie dačakalisia zamoŭlenych pomnikaŭ. Dyrektar firmy abjaŭleny ŭ mižnarodny vyšuk 

Pa danych śledstva, mužčyna adkryŭ firmu, jakaja zajmałasia vyrabam pomnikaŭ i nadmahillaŭ, a taksama dobraŭparadkavańniem miescaŭ pachavańnia pa ŭsioj krainie. Kab napracavać klijenckuju bazu, śpiarša arhanizacyja vykonvała zamovy, adnak u kancy 2022 hoda mužčyna vyrašyŭ ažyćciavić złačynnuju schiemu i zarabić na hory ludziej, piša SK. 

Ustanoŭlena, što svoj biznes fihurant pačaŭ u 2017 hodzie, i na toj momant kampanija mieła nazvu TAA «Rytuał Hranit», adnak u 2022 hodzie z pryčyny finansavych ciažkaściaŭ mužčyna pravioŭ rearhanizacyju i zarehistravaŭ novuju — TAA «Studyja hranitu RG», ad imia jakoj i ažyćciaŭlaŭ svaju dziejnaść.

Mužčyna, uśviedamlajučy, što ŭsie jaho afiery chutka raskryjucca, pačaŭ chvalavacca pra «asabistuju biaśpieku» i, kab paźbiehnuć kryminalnaha pieraśledu, uciok u Polšču. Tam Rudenka praciahvaŭ afarmlać zamovy, jakija vykonvać nie źbiraŭsia. U jakaści abaviazkovaj umovy byŭ avans da 70%.

U hety čas vytvorčaja dziejnaść pradpryjemstva ŭžo była spyniena: rabotniki, jakija zajmalisia vyrabam pomnikaŭ, zvolnieny, zakup materyjałaŭ i zusim nie ažyćciaŭlaŭsia.

Paśla atrymańnia hrošy pieravodzilisia na zamiežny rachunak i tracilisia na asabistyja patreby abvinavačvanaha, a dla paciarpiełych prydumlalisia roznyja viersii: zahružanaść vytvorčaści, vialikija abjomy zakazaŭ, fors-mažornyja abstaviny.

Na Rudenku zaviali kryminalnuju spravu pa č. 4 art. 209 (machlarstva, učynienaje ŭ asabliva bujnym pamiery) Kryminalnaha kodeksa Respubliki Biełaruś.

Ciapier ustanoŭlena bolš za 200 paciarpiełych pa ŭsioj krainie, a suma ŭronu pieravysiła miljon rubloŭ.

Śledčyja vyśvietlili, što vyrab pomnikaŭ — nie adzinaje, na čym niezakonna zarablaŭ Rudenka. Mužčyna pa ŭsioj krainie stvaryŭ arhanizacyi pa vydačy mikrapazyk, ad imia jakich zaklučalisia damovy. Ludziam davałasia pazyka na «vyhadnych» umovach. Jak paźniej vyśvietliłasia, u damovie «drobnym» šryftam ukazvałasia, što ŭ vypadku nievykanańnia dahavornych abaviazacielstvaŭ klijenta čakajuć vysokija pracenty, pienia i štrafy. Paciarpiełym davodziłasia viartać sumu amal u 10 razoŭ bolšuju za atrymanyja hrošy.

Padčas rasśledavańniaŭ atrymana infarmacyja, što damovy na vydaču mikrapazyk na «vyhadnych» umovach zaklučyła bolš za 2000 čałaviek.

Ale i hetaha biznesmienu akazałasia niedastatkova. Mužčyna ŭ zmovie sa svajoj žonkaj ciaham hoda ŭchilaŭsia ad vypłaty padatkaŭ. U vyniku, pavodle SK, jany nie zapłacili ŭ biudžet amal 2 miljony rubloŭ.

Ciapier na majomaść biznesmiena nakładzieny aryšt. Siarod aryštavanaj majomaści: 12 novych aŭtamabilaŭ, 3 kvatery, 2 zaharadnyja damy, a taksama vytvorčyja budynki i zbudavańni.

Rudenku zavočna vystaŭlena abvinavačańnie. Jon abjaŭleny ŭ mižnarodny vyšuk. Nie vyklučajecca praviadzieńnie pracedury śpiecyjalnaj vytvorčaści pry rasśledavańni kryminalnaj spravy.

• 0
• 0
• 0
• 1
• 1
• 1
• 6
• 0