Staršynia Homielskaha abłvykankama Ivan Krupko padčas kulturna-spartyŭnaha fiestyvalu «Vytoki» paviedamiŭ pra płany pabudavać ladovuju arenu ŭ Mazyry, pieradaje BiełTA.
Pry naviedvańni razam z prezidentam NAK Viktaram Łukašenkam i staršynioj FPB Michaiłam Ordam adnoj ź ladovych aren u Žłobinie, dzie prachodzić fiestyval, staršynia Homielskaha abłvykankama Ivan Krupko paviedamiŭ:
«Ciapier budujem arenu ŭ Śvietłahorsku, nastupny na čarzie — Mazyr, ź jakim susiedničajuć Naroŭla, Kalinkavičy. Jość upeŭnienaść, što achvotnych zajmacca sportam dosyć šmat».
Hetym płanam užo bolš za 10 hadoŭ. Jašče ŭ 2009 hodzie staršynia kamiteta pa budaŭnictvie i architektury Homielskaha abłvykankama Uładzimir Harbačoŭ paviedamlaŭ, što da 2012 hoda ŭ vobłaści pabudujuć 7 ladovych aren: u Kalinkavičach, Rečycy, Śvietłahorsku, Mazyry, Rahačovie i jašče dźvie ŭ Homieli. Umiaščalnaść novych aren musiła składać u siarednim ad 500 da 1000 čałaviek. Stanam na 2023 hod u Homielskaj vobłaści ladovyja areny dziejničajuć tolki ŭ Homieli i ŭ Žłobinie, praŭda, u abodvuch vypadkach adrazu pa dźvie.
U ramkach realizacyi prahramy «Prypiackaje Paleśsie» ŭ Mazyry navat pačali budaŭnictva manstruoznaha ladovaha pałaca pa vulicy Ryžkova, nad adnym sa šmatlikich mazyrskich jaroŭ. Płanavałasia, što jaho ŭźviaduć na praciahu 2011— 2013 hadoŭ. Aryjencirovačny košt pałaca składaŭ 40 młrd rubloŭ. Mierkavałasia, što arenu možna budzie vykarystoŭvać nie tolki dla zaniatkaŭ pa chakiei, fihurnym katańni i inšych zimovych vidach sportu, ale i dla praviadzieńnia masavych kulturnych mierapryjemstvaŭ.
Ale ŭžo ŭ kancy 2012 hoda miascovyja vydańni zaŭvažali, što raboty spynilisia i na budaŭničuju placoŭku možna spakojna zajści. Vierahodna, na spynieńnie budaŭnictva paŭpłyvali nastupstvy ekanamičnaha kryzisu 2011 hoda. Pałac pieratvaryŭsia ŭ čarhovy daŭhabud.
U 2019 hodzie tahačasny ministr sportu Siarhiej Kavalčuk, jaki pravioŭ u horadzie vyjazny pryjom hramadzian i naviedaŭ jahonyja spartyŭnyja abjekty, adznačaŭ:
«Horad Mazyr — vialiki, ale ni ladovaj areny, ni krytaha manieža dla zaniatkaŭ uzimku futbołam niama. Napeŭna, heta prablema takich rajonnych centraŭ, jak Mazyr, z takoj kolkaściu nasielnictva».
U tym ža hodzie aktyvizavalisia budaŭničyja raboty na abjekcie, a ŭžo ŭ 2020 hodzie novaja «Paleśsie-Arena» była aficyjna adkrytaja dla naviedvalnikaŭ. Tut raźmiaściłasia spartyŭnaja zała dla praviadzieńnia hulniaŭ pa valejbole, mini-futbole i baskietbole, a taksama azdaraŭlenčy kompleks z basiejnam, džakuzi i saŭnaj.
A voś zimovym vidam sportu ŭ novaj arenie miesca nie znajšłosia.
Bum budaŭnictva ladovych pałacaŭ u Biełarusi prypaŭ na 2000-ja i źviazvajecca z tym, što Alaksandr Łukašenka jašče ŭ 1990-ja hady zachapiŭsia chakiejem i staŭ, pavodle mierkavańnia dziaržaŭnaj prapahandy, kapitanam «najmacniejšaj amatarskaj kamandy śvietu». Druhaja chvala vypała zbolšaha na dolu Minska, jaki ŭ 2014 hodzie prymaŭ čempijanat śvietu pa chakiei z šajbaj. Siońnia ŭ Biełarusi naličvajecca ŭžo bolš za 40 ladovych pałacaŭ.
Čytajcie taksama:
U Astraŭcy adkryli novuju ladovuju arenu
Hatel na Majakoŭskaha, były Dom druku. Jaki los čakaje viadomyja staličnyja daŭhabudy
Akaŭnt Kabančuka ŭzłamali — ale ci biełaruskija śpiecsłužby?11
Kamientary