Na Niamizie vyviešvali raściažku «…kab tavaryš Stalin dziakuj skazaŭ». Što adbyvałasia?
U Minsku zdymali čarhovy rasijski film pra vajnu. Siarod jaho stvaralnikaŭ — fanat vajny, rasijski akcior Uładzimir Maškoŭ.
U sacyjalnych sietkach źjavilisia fota i videa ź miesca zdymak — ludzi cikavilisia, što adbyvałasia ŭ Vierchnim horadzie, dzie pastavili savieckija dekaracyi (u tym liku i raściažku «Pracavać treba tak, kab tavaryš Stalin dziakuj skazaŭ»).
Nacyjanalnaje ahienctva pa turyźmie papiaredžvała, što 13 žniŭnia na Niamizie buduć prachodzić zdymki kinafilma «U śpisach nie značyŭsia», a dostup na terytoryju budzie abmiežavany.
Heta čarhovy rasijski film na temu Druhoj suśvietnaj vajny. U asnovie scenara — adnajmienny raman Barysa Vasiljeva, napisany ŭ 1974 hodzie. Hałoŭny hieroj historyi — lejtenant Mikałaj Płužnikaŭ, jaki traplaje ŭ Bresckuju krepaść pierad samym pačatkam vajny, 21 červienia. Mienavita tamu jahonaha imia niama ŭ śpisach čaści. Paśla ŭvarvańnia vorahaŭ Płužnikoŭ zmahajecca, a potym hieraična hinie.
U stvareńni filma prymaje ŭdzieł Teatr Aleha Tabakova. Mastacki kiraŭnik Uładzimir Maškoŭ raskazaŭ žurnalistam, što daŭno maryŭ zrabić kino z artystami teatra. Sam jon taksama vykanaje nievialikuju rolu ŭ filmie.
— Heta lejtenanckaja proza pra čałavieka, jaki tolki ŭvachodzić u śviet i za 300 dzion stanovicca boham vajny. Heta toj nieviadomy sałdat, jakomu staviać pomniki pa ŭsioj krainie. Hety čałaviek u śpisach nie značyŭsia: jaho niama, ale jon jość, i jon pieramoh. Taki tvor na kinaekranie nieabchodny, kab my viedali, adkul my. Asabliva dla maładoha pakaleńnia, — zajaviŭ rasijski akcior Maškoŭ u kamientary RIA «Naviny».
Darečy, sam Maškoŭ fanat vajny nie tolki na ekranie. Jon naviedvaŭ vajskovyja špitali i padtrymlivaŭ paranienych rasijskich sałdat. Raniej kazaŭ pra nieabchodnaść stvarać filmy pra «śpiecyjalnuju vajennuju apieracyju» (tak prapahanda nazyvaje vajnu). Uładzimir Maškoŭ navat admoviŭsia ad svajoj dački, jakaja žyvie ŭ ZŠA i asudžaje ŭvarvańnie Rasii va Ukrainu.
Biudžet poŭnamietražki «U śpisach nie značyŭsia» składaje 800 miljonaŭ rasijskich rubloŭ (kala 9 miljonaŭ dalaraŭ). Taksama stvaralniki zapytali padtrymku ad Fonda kino pamieram 500 miljonaŭ rasijskich rubloŭ.
Pradziusaram staŭ Cimur Vajnštejn. Hałoŭnuju rolu ŭ filmie vykonvaje Uładzisłaŭ Miler. Paśla Minska zdymki buduć praciahvacca ŭ Breście.
Premjera filma «U śpisach nie značyŭsia» zapłanavanaja na maj 2025 hoda.
«Niepadkupnym» biełaruskim dypłamatam u Małdovie akazaŭsia kadravy supracoŭnik KDB5
Kamientary
Bieraściejskaja krepaść ŭ 1941 pratrymałasia 8 dzion, jak i pad čas jejnaj abłohi ŭ vieraśni 1939 - spačatku Huderyjanam, a potym Kryvašeinym, jakomu nacysty ŭračysta pieradali akupavanaje Bieraście i sumnieŭny honar złamić polski supraciŭ arjerhardu Radzišeŭskaha, jakoha savieckija ludažery praz hod rastralali ŭ Katyni.
Tak, Haŭryłaŭ pratrymaŭsia bolš, ale hety adzinočny supraciŭ bolš darečna nazyvać partyzankaj pad čas, kali niemcy ŭžo całkam kantralavali krepaść, a jana nie aćciahvała nijakich dadatkovych vojskaŭ i ŭvohule nie zaminała im ruchacca dalej. A voś abaroncy Maryjupalu u 2020 ŭ poŭnym atačeńni paŭnavartasna baranili Azoŭstal zvyš za 2 z pałovaj miesiacy i aćciahvali na siabie vieličeznuju kolkaść rasiejskich ahresaraŭ - i hety biezprecedentny podźvih vidavočny biez dadatkovaj prapahandysckaj napampoŭki ŭsialakich liślivych vysokabiudžetnych prapahandystaŭ kštałtu Maškova.