Płatforma Fibery abmiažoŭvaje dostup da servisu ź Biełarusi i Rasii
Stvoranaja biełarusami płatforma dla kiravańnia pracoŭnymi pracesami Fibery spyniaje dostup da servisu ŭ Biełarusi i Rasii z 12 vieraśnia. Heta abumoŭlena sankcyjami ZŠA, piša Devby.io.
Fibery stała rassyłać klijentam papiaredžańni ab tym, što servis stanie niedastupnym dla klijentaŭ u Biełarusi i Rasii z 12 vieraśnia.
«Sankcyi ZŠA ŭ dziejańni», — prakamientavaŭ u fejsbuku pryniataje rašeńnie zasnavalnik i CEO Fibery Michaił Dubakoŭ.
Pad hetym dopisam Dubakova razharełasia dyskusija: častka karystalnikaŭ zapeŭnivaje, što abmiežavańni ZŠA tolki dla rasijan i nie pavinny zakranuć Biełaruś. Ale kamanda Fibery pierapravieryła i paćvierdziła: zabarona niepaźbiežnaja, pakolki kampanija ciapier bazujecca ŭ Štatach.
«Hałoŭnaja jurydyčnaja asoba Fibery — u ZŠA, — źviarnuŭ uvahu Michaił Dubakoŭ. — Zakryjuć dostup, vierahodna, usio: Miro, Notion, Coda i inšyja kampanii, čyj servis možna pryviazać da typu softu ŭ sankcyjnych śpisie, naprykład, CRM abo ERP.
U Biełarusi i Rasii ŭ nas byli dziasiatki klijentaŭ. Ale dostup budzie zakryty dla krain, a nie dla hramadzian, z terytoryi inšych krain usio budzie pracavać».
Raniej u siaredzinie žniŭnia pra abmiežavańni z 12 vieraśnia abviaściła Miro. Paźniej vyśvietliłasia, što kampanija zakryje tolki płatnyja akaŭnty ŭ Rasii i Biełarusi, biaspłatnyja ž absłuhoŭvać praciahnuć. U Fibery ž usie akaŭnty płatnyja.
Kamientary