Zvyšintensiŭnyja treniroŭki mohuć fatalna naškodzić zdaroŭju

Kali vy prychilnik intensiŭnych siłavych trenirovak abo vaša praca źviazanaja ź ciažkimi praciahłymi fizičnymi nahruzkami, asabliva ŭ śpiakotnych abo vilhotnych umovach, u vas moža raźvicca sindrom, viadomy jak rabdamijoliz. Pry im razburajucca kletki myšačnaj tkanki, i rečyvy, jakija jany ŭtrymlivajuć, traplajuć u kroŭ. Heta moža pryvieści da paškodžańnia nyrak, parušeńnia sardečnaha rytmu, sutarhaŭ, a ŭ krajnich vypadkach — da śmierci.

Śpiecyjalisty adznačajuć, što najbolšaja ryzyka raźvićcia rabdamijolizu — u maładych mužčyn, a taksama ludzi ź sierpavidna-kletačnaj aniemijaj i spadčynnymi zachvorvańniami kryvi.

Daktary i daśledčyki padkreślivajuć, što zvyčajnyja fizičnyja praktykavańni nie stvarajuć dla ludziej ryzyki raźvićcia rabdamijolizu.

U hrupie ryzyki znachodziacca tyja, chto zajmajecca sportam i pravodzić intensiŭnyja praciahłyja treniroŭki, takija, jak HIIT (treniroŭki vysokaj intensiŭnaści z karotkimi intervałami adpačynku) abo CrossFit (sistema, jakaja spałučaje siłavyja praktykavańni, kardyjanahruzki i himnastyku). Karaciej, havorka pra treniroŭki ź pierahruzkami.

Paškodžańnie muskulnaj tkanki moža taksama adbycca ŭ vyniku apieracyj ci niaščasnych vypadkaŭ, złoŭžyvańnia ałkaholem abo lohkimi narkotykami, lačeńnia niekatorymi recepturnymi preparatami, zachvorvańnia niekatorymi infiekcyjami (u tym liku COVID-19) ci ŭździejańnia niekatorych atrutaŭ. 

Rabdamijoliz sustrakajecca redka, ale jość śviedčańni taho, što vypadki zachvorvańnia pačaščajucca. Daśledavańnie, praviedzienaje ŭ ZŠA ŭ 2021 hodzie, pakazała, što z 2000 pa 2019 hod kolkaść špitalizacyj z rabdamijolizam pavialičyłasia ŭ 10 razoŭ.

Asnoŭnymi simptomami, jakija mohuć śviedčyć pra raźvićcio rabdamijolizu, źjaŭlajucca ciomna-čyrvonaja ci karyčnievaja mača, acioki abo mocny bol u myšcach, jaki nie prachodzić niekalki dzion, navat kali vy dajacie muskułam adpačynak.

Śpiecyjalisty źviartajuć uvahu na toje, što ludzi niedaaceńvajuć niebiaśpieku pry najaŭnaści lohkich simptomaŭ zachvorvańnia i nie zaŭsiody svoječasova źviartajucca da doktara.

Prafiłaktyka i lačeńnie rabdamijolizu

Śpiecyjalisty kažuć pra nieabchodnaść šyrokaha infarmavańnia pra niebiaśpieku hetaha sindromu i šlachach jaho praduchileńnia. Daktary rajać sačyć za padtrymkaj vodnaha bałansu i źviartać uvahu na koler mačy. U ludziej, jakija pjuć dastatkova vady, jana śvietła-žoŭtaha abo śvietłaha koleru.

Padčas trenirovak nieabchodna sačyć za častaściu sardečnych skaračeńniaŭ. Lepš pačynać z umieranych trenirovak, pry jakich častata pulsa składaje kala 60% ad maksimalna mahčymaj, i pastupova pavialičvać intensiŭnaść. Pry hetym treba być asabliva ŭvažlivymi da svaich adčuvańniaŭ, kali intensiŭnaść pieravyšaje 85% maksimalnaj častaty sardečnych skaračeńniaŭ.

Pavialičyć

U vypadku ŭźniknieńnia tryvožnych simptomaŭ nieabchodna źviarnucca da doktara.

Rabdamijoliz možna vyjavić z dapamohaj analizaŭ kryvi i mačy. U kryvi budzie pavyšany ŭzrovień kreacinkinazy, abo KFK (kreacinfosfakinazy) — fiermientu, jaki traplaje ŭ kryvaciok pry paškodžańni myšcaŭ, a taksama kaliju i fosfaru. Rabdamijoliz taksama možna dyjahnastavać praz analiz mačy na najaŭnaść mijahłabinu, inšaha białku, jaki vyłučajecca pry razbureńni myšcaŭ.

Taksama mohuć uźnikać prablemy z uzroŭniem kalcyju i pavyšany pakazčyk mačavoj kisłaty. U niekatorych vypadkach mohuć naziracca časovyja parušeńni funkcyi piečani.

Lačeńnie zvyčajna ŭklučaje ŭnutryviennaje ŭviadzieńnie vadkaści i elektralitaŭ. U ciažkich vypadkach, kali paškodžvajucca nyrki, moža spatrebicca dyjaliz.

Takim čynam, kab minimizavać ryzyku raźvićcia rabdamijolizu, važna aściarožna pavialičvać fizičnuju nahruzku, sačyć za vodnym bałansam i słuchać svajo cieła. Pry lubych padazronych simptomach, takich jak ciomnaja mača abo praciahły bol u myšcach, varta źviarnucca da doktara. Rabdamijoliz — niebiaśpiečny stan, ale pry svoječasovym vyjaŭleńni i lačeńni jahonyja nastupstvy možna minimizavać.

• 3
• 1
• 0
• 1
• 3
• 0
• 0
• 0