ZŠA vymusili Kitaj zakryć svaje bujnyja porty dla rasijskaha «cieniavoha fłotu»
Shandong Port Group — adzin z najbujniejšych marskich łahistyčnych apierataraŭ Kitaja i hałoŭny kitajski zakupnik rasijskaj nafty — zabaraniŭ zachod u svaje porty ŭsich tankieraŭ, jakija trapili pad sankcyi ZŠA.
Naftavyja hulcy ŭ Kitai apynulisia pad ciskam novych amierykanskich sankcyj. Jak paviedamlaje ahienctva Reuters, Shandong Port Group zabaraniŭ zachod usich padsankcyjnych tankieraŭ.
Shandong Port Group kantraluje ŭsie asnoŭnyja porty na ŭschodnim uźbiarežžy Kitaja, uklučajučy Cyndaa, Žyčžaa i Jańtaj. Bolšaja častka naftapierapracoŭčych zavodaŭ u hetych partach — najbujniejšyja kitajskija imparciory nafty z krain, jakija znachodziacca pad sankcyjami ZŠA.
Pavodle Reuters, u 2024 hodzie kitajskaja pravincyja Šańdun praz apieratara Shandong Port Group impartavała kala 1,74 miljona barelaŭ nafty ŭ dzień, što skłała 17% ad ahulnaha abjomu impartu nafty ŭ Kitaj. Bolšuju častku pastavak składali partyi nafty z Rasii, Irana i Vieniesueły.
Rašeńnie Shandong Port Group, vyklikanaja novymi sankcyjami ZŠA suprać «cieniavoha fłota» Rasii, moža spravakavać istotny rost vydatkaŭ na łahistyku dla naftavych pierapracoŭščykaŭ pravincyi Šańdun, pakolki im daviadziecca karystacca niepadsankcyjnymi tankierami, što pavialičyć košt transparciroŭki nafty jak dla samoha Kitaja, tak i dla jaje padsankcyjnych klijentaŭ, asabliva Rasii.
U ciapierašni čas kala 670 «cieniavych tankieraŭ» (pad čužymi ściahami ci bieź dziaržaŭnaha strachavańnia) zajmajucca nielehalnaj pieravozkaj nafty ź Irana, Rasii i Vieniesueły. Ź ich 250—300 sudnaŭ pieravoziać rasijskuju naftu, dachody z prodažaŭ jakoj iduć na finansavańnie vajny va Ukrainie i padtrymańnie rasijskaj ekanomiki va ŭmovach supraćstajańnia z Zachadam, adznačaje Reuters.
Asnoŭnyja apieratary suśvietnaha «cieniavoha fłotu» — iranskaja kampanija NITC i rasijskaja «Saŭkamfłot» — taksama padpali pad novyja sankcyi ZŠA.
Pierad hetym u sakaviku minułaha hoda ŭdar pa «cieniavym fłocie» Rasii pad upłyvam amierykanskich sankcyj naniesła i Indyja. Tady pryvatny indyjski NPZ Reliance Industries — apieratar najbujniejšaha ŭ śviecie kompleksu pierapracoŭki nafty — admoviŭsia prymać syravinu, jakuju dastaŭlajuć tankiery rasijskaha «Saŭkamfłotu».
Na pačatak 2024 hoda bolš za pałova ekspartu syroj nafty z Rasii ažyćciaŭlałasia praz «cieniavy fłot», u toj čas jak u studzieni 2023 hoda hety pakazčyk, pa źviestkach mižnarodnych analitykaŭ, składaŭ kala 35%.
Stała viadoma, chto žanich byłoj deputatki Maryi Vasilevič26
Kamientary