Jak atrymlivajuć pavyšeńni na ANT? Raskazvajem na prykładzie karjery prapahandysta Zankoviča
Prapahanda pazicyjanuje Anatola Zankoviča jak adnaho z najlepšych na siońnia biełaruskich kinadakumientalistaŭ. Heta ŭ jaho siužecie pakazali kadry ź Vieramiejčykam, jakoha Vjetnam vydaŭ KDB. Praŭda, televizijniki źviartajuć uvahu, što nasamreč Zankoviča na ANT panizili: 2020 hod jon sustrakaŭ na pasadzie dyrektara dyrekcyi infarmacyjnaha viaščańnia, a ciapier znoŭ viarnuŭsia ŭ lik šarahovych supracoŭnikaŭ. I kali viedać, jak jon trapiŭ na kirujučuju pasadu raniej, to mnohaje stanovicca na svaje miescy.
Jak nam raspaviali byłyja supracoŭniki ANT, u kresły načalnikaŭ na kanale čaściakom traplajuć dziakujučy danosam na kaleh.
Vychadziec ź Vilejki Anatol Zankovič pačynaŭ zarablać hrošy na žyćcio zusim nie ŭ žurnalistycy: pracavaŭ na pradpryjemstvie «Buddetali». Jon pryjšoŭ na telebačańnie ŭ 2012 hodzie šarahovym karespandentam, pačaŭ sa stažyroŭki. Kalehi raskazvajuć, što davałasia jamu heta ramiastvo niaprosta: zvyčajnyja stendapy jon moh časam pierazapisvać pa 30 razoŭ, u toj čas kali inšyja davali rady za niekalki dublaŭ.
«Pa mierkach redakcyi jon byŭ siarednim žurnalistam, tamu mnohija ździvilisia, kali mienavita jaho pryznačyli kiraŭnikom navin, bo vakoł było šmat ludziej, kruciejšych u prafiesijnym płanie».
Ciopłaje miesca kiraŭnika dyrekcyi infarmacyjnaha viaščańnia vyzvaliłasia paśla taho, jak jaho pakinuŭ Rusłan Paddubski. Toj adpraviŭsia ŭłasnym karespandentam ANT u Jeŭropu i ŭznačalvaŭ tam jeŭrapiejskaje biuro. Zamianić jaho źbiralisia Andrej Mochar, Alaksandr Złobin i inšyja, ale načalnikam pastavili Zankoviča (jaki, darečy, adrazu trapiŭ u lik vorahaŭ tych, kaho abyšoŭ).
«Akazałasia, što ŭsie tam adzin na adnaho prosta danosy pišuć. I tyja, chto išoŭ na pavyšeńnie — heta jakraz ludzi, jakija aktyŭna pisali danosy», — raskazała krynica, znajomaja ź situacyjaj.
Pry hetym Zankovič nie spyniŭsia danosić na kaleh, atrymaŭšy kirujučuju pasadu. Adzin z eks-karespandentaŭ ANT raskazaŭ, što paśla vybaraŭ-2020 na stale ŭ Zankoviča vypadkova pabačyli ceły stos paskvilaŭ na adras tahačasnaha načalnika kanała Marata Markava, u jakich jon abražaŭ i źlivaŭ kaleh.
«Tam byŭ taki styl, jak u «Žoŭtych źlivach» pišuć. My byli šakavanyja, bo Tola zaŭsiody byŭ takim prostym chłopcam, svaim nibyta z usimi. Adzinaje, u jaho zaŭsiody kańjak stajaŭ u kabiniecie. A tak u jaho ž i žonka dobraja, troje dziaciej… Jon padavaŭsia biaskryŭdnym i niazłosnym, a tut vyśvietliłasia, što ŭsich svaich zdaje».
Pa źviestkach «Biełpoła», za 2020 hod Zankovič zarabiŭ $24 421 (da vyliku padatkaŭ). Ale tady dla supracoŭnikaŭ hałoŭnaj matyvacyjaj zastavacca byli nie hrošy, a novyja kvatery.
«Zankovič ad ANT atrymaŭ kvateru, Tur atrymaŭ. Jany ŭsie pradalisia za kvatery, heta 100 pracentaŭ», — kamientuje eks-supracoŭnik ANT.
Sam Zankovič, a paśla i Markaŭ, jašče ŭ červieni 2020-ha ŭsim najlepšym supracoŭnikam abiacali ŭłasnaje žytło (u Redakcyi «Našaj Nivy» jość skrynšoty abiacańniaŭ premijavańnia). Paśla zabastoŭki na telebačańni prapanovy ahučvalisia znoŭ. Niekatorym prapanoŭvali palapšeńnie žyllovych umovaŭ naŭzamien taho, što jany zastanucca na kanale, nie buduć zvalniacca i pierastanuć stvarać prablemy.
Kalehi raskazvajuć, što ŭ časy pracy karespandentam Zankovič amal nie zajmaŭsia palityčnym paradkam dnia, ale ciapier vystupaje ŭ jakaści ekśpierta-kamientatara i palityčnaha ahladalnika amal na lubyja temy: ad vyhod supracoŭnictva Biełarusi z Kitajem da vybaraŭ u Polščy. Nu i, kaniečnie, vypuskaje svaje rasśledavańni.
Jaho prajekty dva razy zabirali dziaržaŭnuju ŭznaharodu «Televiaršynia», a sam jon atrymaŭ miedal Francyska Skaryny z ruk Łukašenki.
Apošnija filmy, źniatyja pad kiraŭnictvam Zankoviča — heta, naprykład, «Haspar na suviaź nie vyjšaŭ», dzie raskazvajecca pra dyviersiju ŭ Mačuliščach i terakty, jakija na terytoryi Biełarusi nibyta płanavali ŭkrainskija śpiecsłužby. Ci «Biesy. Jak chočuć zachapić Biełaruś», hałoŭnym zdabytkam jakoha stała demanstracyja eks-kalinoŭca Vasila Vieramiejčyka, zatrymanaha ŭ V́jetnamie i dastaŭlenaha ŭ Biełaruś. Usie jany hałoŭnym čynam — pra źniešnich vorahaŭ, jakija tak i chočuć zrabić našaj krainie drenna, ale siłaviki pilna achoŭvajuć narodny pakoj.
Vorahi zamiežža navat zamachnulisia na śviatoje — biełaruskuju budučyniu — jaje dziaciej. Kadry ź filma ANT «Dzieci na prycele», dzie 19-hadovy Daniił Harasim, asudžany da 10 hod źniavoleńnia za toje, što fatahrafavaŭ vajskovyja abjekty ŭ Asipovičach, z kletki kamunikuje z zapłakanymi baćkami, sapraŭdy raźbivaje serca.
Praŭda, ciapierašnim dyrektaram dyrekcyi infarmacyjnaj tranślacyi taki staŭ Andrej Mochar, jaki zmoh abyści Zankoviča, jak pra toje maryŭ.
«Mochar, vidać, svaimi intryhami zmoh pierajhrać Zankoviča. Apošniaha panizili, ale tak usio abstavili: «Tolik, budzieš kinošnikam, voś tabie ŭznaharody. Jak by: trymaj značok, duračok. Ale na spravie heta panižeńnie», — ličać byłyja supracoŭniki ANT.
«Na biełaruskim telebačańni nadyšoŭ čas najhoršych z najhoršych, i Anatol jakraz upisvajecca ŭ hetuju karcinu», — dadaje jašče adzin z televizijnikaŭ.
Prapahandyst ANT raskazaŭ, jak jeździŭ u Litvu zdymać siužet
Jak prapahandyst Ihar Tur staŭ lubimčykam Łukašenki i kolki zarabiŭ u 2020-m
Chto taki Andrej Alaksandraŭ — prapahandyst ANT, jaki stažyravaŭsia ŭ «Žoŭtych źlivach» i jeździć na zatrymańni
Jak Azaronak staŭ takim? Novyja fakty ź bijahrafii samaha addanaha Łukašenku prapahandysta
Kamientary