У Вільні 10 снежня, у Дзень правоў чалавека, узнагародзілі пераможцаў Прэміі беларускай праваабарончай супольнасці, паведамляе БАЖ. Прэмія ўручаецца штогод за дасягненні ў галіне правоў чалавека.
Праваабаронца года
Сёлета ў гэтай намінацыі два пераможцы — Алег Агееў і Наталля Мацкевіч.
Алег Агееў — намеснік старшыні Беларускай асацыяцыі журналістаў. З 2015 году ён кіруе Прававым цэнтрам БАЖ, працуе ў сферы свабоды выказвання і свабоды СМІ. Як эксперт, лектар і трэнер удзельнічаў у шматлікіх адукацыйных праграмах па навучанні правам чалавека. Пасля ператрусу 16 лютага 2021 года спадар Агееў вымушаны быў пакінуць Беларусь і цяпер працягвае дзейнасць у БАЖ за мяжой.
Наталля Мацкевіч — адвакат. Выступала абаронцам у рэзанансных палітычных працэсах: абараняла кандыдатаў у прэзідэнты Віктара Бабарыку і Сяргея Ціханоўскага, анархіста Міколу Дзядка. Была абаронцам у шматлікіх іншых палітычна матываваных справах. Была пазбаўленая ліцэнзіі ў кастрычніку 2021 года, пасля 27 гадоў адвакацкай практыкі. Акрамя працы адвакатам, Наталля Мацкевіч шмат гадоў працуе ў адукацыі ў сферы правоў чалавека. З’яўляецца экспертам па нацыянальнай сістэме абароны правоў чалавека і механізмам абароны правоў чалавека ААН.
Журналіст года
Палітвязень Аляксандр Манцэвіч стаў пераможцам у гэтай намінацыі.
Аляксандр Манцэвіч — заснавальнік і галоўны рэдактар незалежнай грамадска-палітычнай «Рэгіянальнай газеты» ў горадзе Маладэчна.
У 2023 годзе яго арыштавалі і асудзілі на 4 гады пазбаўлення волі. Спадар Манцэвіч віны не прызаў і перад прысудам выступіў са смелым апошнім словам.
Праваабарончая кампанія/ініцыятыва года
У намінацыі перамагла служба эвакуацыі BYSOL.
Кірунак «Эвакуацыя» фонду BYSOL дапамагае з экстраным выездам з Беларусі тым, каму пагражае палітычна матываваная крымінальная адказнасць. Да іх звяртаюцца актывісты, дваравыя ініцыятывы, праваабаронцы, журналісты і іншыя.
За амаль тры гады існавання служба эвакуацыі BYSOL дапамагла велізарнай колькасці людзей пакінуць краіну і ўратаваць сваю свабоду.
1848 чалавек агулам атрымалі падтрымку службы: кансультацыю ці суправаджэнне выезда.
Праваабарончая салідарнасць года
Першым пераможцам у новай намінацыі Прэміі беларускай праваабарончай супольнасці стала Паліна Шарэнда-Панасюк.
Паліна Шарэнда-Панасюк — грамадская актывістка з Берасця. Была затрыманая 3 студзеня 2021 года, атрымала два гады калоніі.
У 2022 годзе ёй прысудзілі яшчэ адзін год калоніі па артыкуле 411 КК. Паліна стала першай жанчынай у Беларусі, асуджанай па гэтым артыкуле. А сёлета на актывістку завялі яшчэ адну крымінальную справу. Агулам яна атрымала тэрмін у 4 гады зняволення.
На Паліну Шарэнду-Панасюк моцна ціснуць у турме: рэгулярна змяшчаюць у штрафны ізалятар, не перадаюць ёй прадуктовыя перадачы ад сваякоў і бандэролі з лекамі.
«Праваабарончая салідарнасць» — новая намінацыя. На яе вылучаецца асоба, якая пацярпела ад рэпрэсіяў і ціску сёлета і/ці ў папярэднія гады за сваю дзейнасць па прасоўванні і/ці абароне правоў чалавека ў Беларусі.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»22
Каментары