Расійскія махляры дураць галовы беларусам, паклікаўшы на падмогу Азаронка
У стужцы беларускіх карыстальнікаў фэйсбука стала масава з'яўляцца рэклама ўдзелу ў фінансавых схемах, якія нібыта дазваляюць зарабляць казачныя сумы. Пры гэтым, як заўважыла выданне Media IQ, у такіх схемах ашуканцы сталі выкарыстоўваць імя і фота беларускага прапагандыста Рыгора Азаронка, расійскага прапагандыста Уладзіміра Салаўёва, а таксама лагатыпы беларускіх дзяржаўных СМІ «Беларусь 24» і «БелТА».
Media IQ высветліў, што рэкламныя пасты з відэа, якія расказваюць пра «гісторыі поспеху» і заклікаюць далучацца да «інвестыцыйных праграм», запушчаныя з узламаных акаўнтаў у фэйсбуку — як асабістых старонак, так і паблікаў кампаній, прычым з розных краін, у тым ліку арабскіх. У відэа выкарыстоўваюцца таксама брэнды беларускіх кампаній — «Беларуськалій», «Газпрам Трансгаз Беларусь».
Мяркуючы па агучцы і тытрах, відэа створаныя не беларусамі — верагодна, да гэтага датычныя расейцы. Прынамсі, пра гэта можа сведчыць характэрная гаворка герояў відэа, а таксама абазначэнне краіны як «Белоруссия».
Спасылкі ў пастах вядуць на сайты з доўгімі нечытэльнымі адрасамі. Пры пераходзе на такія сайты карыстальнік бачыць поле для напісання нумара тэлефона і іншых асабістых даных.
Цікава, што гэта адбываецца толькі тады, калі IP-адрас карыстальніка — беларускі. Пры пераходзе на сайт з тэрыторыі Еўропы па той жа самай спасылцы адлюстроўваецца іншы кантэнт — нейтральныя артыкулы па фінансавай тэматыцы.
Што тычыцца выкарыстання імёнаў Азаронка і Салаўёва, то гэта робяць таксама дзеля падахвочванні карыстальніка перайсці па спасылцы, якая можа быць фішынгавай. Для гэтага публікуюць карцінкі з інтрыгоўным загалоўкам і лагатыпам дзяржаўнага інфармацыйнага агенцтва БелТА.
У некаторых выпадках ствараюць нават клон старонкі з фэйкавай публікацыяй БелТА, у якой Азаронак нібыта расказвае Салаўёву пра свой удзел у фінансавай пірамідзе «Газпрам-Інвест».
Больш за тое, ашуканцы стварылі відэа, у якім сабралі ў адным флаконе і праўладных прапагандыстаў, і «экстрэмістаў»: на фэйкавым акаўнце БелТА вядучая «Маланка Медыя» Каця Пытлева нібыта зачытвае навіну пра Азаронка, які выступаў у перадачы Салаўёва. Пры гэтым «гаворыць» і сам Азаронак — верагодна, голас быў падроблены з дапамогай штучнага інтэлекту.
Дарэчы, выкарыстоўваючы лагатып «Маланкі», ашуканцы распаўсюджваюць «экстрэмізм» — медыя было аб'яўлена ў Беларусі «экстрэмісцкім фарміраваннем».
За 12 гадзін з моманту публікацыі відэа яно набрала звыш 12 тысяч праглядаў, пры гэтым толькі дзве рэакцыі — «смайлікі». Рэклама з падобнымі спасылкамі з'яўляецца ў стужцы фэйсбука толькі ў тым выпадку, калі карыстальнік заходзіць у сацсетку з мабільнай прылады пад беларускім IP-адрасам.
На каго можа быць разлічаная такая рэклама? Падобна, што толькі на аўдыторыю дзяржаўных медыя, на тых, для каго Азаронак і ўлада ў цэлым з'яўляюцца аўтарытэтамі.
Мінскаму бізнэсмену Саўрыцкаму і ягонай сям'і пагражае па 12 гадоў за «распальванне варожасці»1
Каментары