Калабаранты з Запарожскай вобласці выдаюць сустрэчу з прамаскоўскім беларускім актывістам Лушчом за афіцыйны візіт
Прэс-служба расійскай акупацыйнай адміністрацыі ўкраінскай Запарожскай вобласці выдае паездку ў Беларусь і сустрэчу з прарасійскім актывістам Сяргеем Лушчом за афіцыйны візіт. Такое паведамленне з'явілася ў тэлеграм-канале калабарантаў, піша Reform.news.
«У рамках пагаднення аб супрацоўніцтве, з 22 па 26 ліпеня адбудзецца рабочая паездка дэлегацыі ад Запарожскай вобласці з бізнэс-місіяй у Рэспубліку Беларусь. Мэтай візіту з'яўляецца ўмацаванне эканамічных адносін у сферы гандлю, інвестыцый», — гаворыцца ў паведамленні.
Насамрэч, гаворка ідзе пра пагадненне з грамадскім аб'яднаннем «Рух Саюз» і маргінальным прарасейскім актывістам Сяргеем Лушчом. Лушчу і кампаніі нават лукашэнкаўскія ўлады не дазволілі зарэгістраваць сваю партыю, і замест яе ён змог адкрыць аб'яднанне.
«Рух Саюз» удакладняе, што менавіта яны заключылі пагадненне з так званым «Дэпартаментам ўнутранай палітыкі адміністрацыі губернатара і ўрада Запарожскай вобласці».
У дэлегацыю ўвойдуць калабаранты Дзяніс Леўчанка — «дарадца, намеснік губернатара Запарожскай вобласці па ўнутранай палітыцы, каардынатар бізнэс-місіі» і Віталь Ярчук — «дарадца губернатара Запарожскай вобласці», а таксама прадстаўнікі ТАА «Світанак», ТАА «МДК» (Святлана Агафонава), ТАА «Мелітопальскі завод турбакампрэсараў» (Яўгена Вараб'ёва), ТАА «Ліцейная кампанія «Мелт», завода «Прамтара», завода «АЗМОЛ», завода «Бярдзянскія жняяркі».
«Візіт плануецца выкарыстоўваць у якасці пляцоўкі для дыялогу па ключавых рэгіянальных і глабальных пытаннях пашырэння гандлёвых сувязяў, выбудоўвання еўразійскіх вытворчых і транспартна-лагістычных ланцужкоў, выпрацоўкі шляхоў рэалізацыі сумесных інвестыцыйных і інфраструктурных праектаў, фарміравання кампетэнтнага кадравага рэзерву і навукова-тэхнічнага супрацоўніцтва», — паведамляе ГА «Рух Саюз».
Дэлегацыя хоча наведаць Беларускі дзяржаўны канцэрн па нафце і хіміі, Беларускую гандлёва-прамысловую палату, а таксама шэраг прамысловых прадпрыемстваў Мінска, Барысава, Бабруйска, Гомеля, Ліды.
Па выніках візіту адбудзецца абавязковая ў такіх выпадках прэс-канферэнцыя.
«Таня, мы з табой!» Улады запусцілі флэшмоб у падтрымку жанчыны ў чырвона-зялёным ВІДЭА17
Каментары