З аўкцыёну амаль за мільён даляраў прадаюць калісьці знакаміты завод
На аўкцыённай пляцоўцы Беларускай універсальнай таварнай біржы выстаўленыя некалькі лотаў, што адносяцца да вядомага ў мінулым беларускага завода. Гаворка ідзе пра віцебскую фабрыку КІМ. Спачатку гэта азначала «Камуністычны інтэрнацыянал моладзі», а ў часы незалежнасці абрэвіятуру сталі расшыфроўваць як «Класіка індустрыі моды», піша Blizko.by.
Комплекс будынкаў знаходзіцца ў Віцебску па вуліцы Максіма Горкага, 42.
На таргі выстаўленыя наступныя будынкі, ніводзін з якіх не выкарыстоўваецца:
- Галоўны корпус з прыбудовай (трохпавярховы будынак 1949 года пабудовы агульнай плошчай 10.700 кв. м);
- Фарбавальны корпус (1952) і два складскія памяшканні (1981);
- Прыбудова да фарбавальнага цэха (пяціпавярховы будынак 1949 года);
- Будынак кандыцыянераў (1977);
- Трансфарматарная падстанцыя з абсталяваннем (1932);
- Каналізацыйная, водаправодная сетка, права на добраўпарадкаванне тэрыторыі.
Пачатковая цана галоўнага корпуса — 1 056 459 рублёў, фарбавальнага корпуса — 671 987 рублёў, прыбудовы да фарбавальнага корпуса — 174 981 рубель, будынка кандыцыянераў — 606 542 рублі, трансфарматарнай падстанцыі — 131 349 рублёў.
З улікам кроку таргоў і неабходнасці кампенсаваць выдаткі на правядзенне таргоў пакупнік павінен будзе заплаціць за галоўны корпус мінімум 1 110 912 рублёў, або 345 550 даляраў па актуальным курсе Нацбанка.
А кошт усіх пяці асноўных лотаў з кампенсацыяй выдаткаў складзе 2 777 298 рублёў, або 863 883 даляраў ЗША.
Фабрыка КІМ пачала працу яшчэ ў 1931 годзе як панчошна-шкарпэтачная фабрыка. Пасля асвоіла выпуск трыкатажных вырабаў, спартыўных касцюмаў, жаночай бялізны і іншых тавараў. Завод быў вялікім, будаваў інтэрнаты для сваіх супрацоўнікаў, а дом культуры камбіната (1988) цяпер вядомы як канцэртная зала «Віцебск» — гэта адна з асноўных канцэртных пляцовак міжнароднага фестывалю мастацтваў «Славянскі базар».
З канца 1990-х камбінат перажываў моцны заняпад, спробы рэарганізацыі не надта дапамаглі, і ў 2019 годзе фабрыка была ліквідавана з-за банкруцтва.
Таргі пройдуць 15 кастрычніка 2024 года.
Хакеіст Баскаў, ваенкам Крываносаў, медык Румо. Лукашэнка назваў сваіх давераных асобаў3
Каментары