Што вядома пра сітуацыю са Streamline?

Учора Альянс расследавальнікаў Беларусі паведаміў, што кампанія Навучальны цэнтр «Адукацыйныя тэхналогіі» падала на ліквідацыю. Па іх інфармацыі, два тыдні таму ДФР Джяржкантролю ладзіў праверку ў навучальным цэнтры, які ў краіне вядомы пад брэндам Streamline. 

Супрацоўнікам Streamline прыйшлося падпісаць паперы аб неразгалошванні. Як стала вядома «Нашай Ніве», яны самі былі ў шоку, калі пабачылі навіну, што кампанія падала на ліквідацыю.

Знаёмы з сітуацыяй кажа «Нашай Ніве», што пасля прыходу ДФР усе былі напалоханыя (асабліва калі не атрымалі ў звычайны дзень заробкі, бо рахункі кампаніі заблакаваны), але верылі, што кіраўніцтва змагло неяк дамовіцца і з цягам часу сітуацыя нармалізуецца.

Павялічыць

У каментарыях у акаўнце Streamline у інстаграме пачалі з’яўляцца напалоханыя кліенты, якія хвалююцца за заплачаныя грошы і не разумеюць, як іх вярнуць. Людзі пішуць, што некаторыя філіялы моўнай школы зачыніліся, а звязацца з афіцыйнымі прадстаўнікамі Streamline не атрымліваецца.

Тым вучням, у каго ўчора былі заняткі, паведамілі, што гэта — апошні занятак, бо з чацвярга ў Streamline адклікаюць ліцэнзію.

Новых слухачоў на курсы не набіраюць.

Streamline Language School — найбуйнейшая школа замежных моў у Беларусі, заснаваная ў 1998 годзе, курсы ў якой прайшлі больш за 100 000 чалавек.

Наколькі вядома, дырэктар Streamline Language School Эдуард Цалюк не затрыманы і знаходзіцца ў бяспецы.

Дарэчы, Streamline — не адзіная моўная школа, у якую наведваліся сілавікі цягам года. У ДФР узнікалі пытанні да розных навучальных цэнтраў. Кажуць, цікавасць сілавікоў выклікаюць у першую чаргу тыя моўныя школы, дзе вывучаюць нямецкую мову.

— Я мяркую, што такім чынам спрабуюць перашкаджаць беларусам (асабліва медыкам, якія цяпер сапраўды актыўна вывучаюць замежныя мовы і ў прыватнасці польскую з нямецкай) з’язджаць за мяжу. З англійскай змагацца асабліва сэнсу няма. Бо куды чалавек паедзе з адной англійскай? У ЗША ці Вялікабрытанію? Дык атрымай ты туды яшчэ візу. А вось Польшча ці Германія — даволі рэальны варыянт, — разважае суразмоўца «Нашай Нівы».

Апытанка

• 0
• 0
• 1
• 4
• 1
• 4
• 17
• 0