26 śniežnia ŭ Minskim haradskim sudzie byŭ ahučany vierdykt u dyčynieńni da pradprymalnika, videaapieratara-fryłansiera Ivana Muraŭjova. Sudździa Alena Šylko pryhavaryła jaho da 2,5 hoda pazbaŭleńnia voli ŭ kałonii ahulnaha režymu. Roŭna stolki, kolki pierad hetym i zapatrabavała pradstaŭnica prakuratury, piša BAŽ.
Siarod inšaha, sud pastanaviŭ paśviedčańnie siabra BAŽ Ivana Muraŭjova viarnuć u arhanizacyju «Biełaruskaja asacyjacyja žurnalistaŭ» (techničny miechanizm «viartańnia» pry hetym zastaŭsia adkrytym). Naohuł nie vyklučana, što «členstva» prosta pierabłytali z praŭładnym Biełaruskim sajuzam žurnalistaŭ.
Praces nad Ivanam Muraŭjovym pačaŭsia 22 śniežnia. Pasiadžeńnie adrazu ž zrabili zakrytym — pradstaŭnica abvinavačańnia arhumientavała heta tym, što buduć razhladacca «ekstremisckija materyjały», luby raspaŭsiud jakich supiarečyć abnoŭlenamu zakanadaŭstvu.
Takim čynam, ź pierapynkam na abied sudździa Alena Šylko paśpieła nie tolki całkam vyvučyć akaličnaści spravy, a i pravieści sprečki bakoŭ. Faktyčna chapiła adnaho pracoŭnaha dnia, kab «razabracca» va ŭsioj situacyi, zastałosia tolki pryznačyć datu prysudu.
Ahučvańnie kančatkovaha vyraku 26 śniežnia zaniało niekalki chvilin. Pracazdolnaści sudździ, u aktyvie jakoj užo cełaja kalekcyja palityčnych pracesaŭ, zastajecca tolki pazajzdrościć: litaralna pierad hetym jana paśpieła pakarać 11 hadami kałonii ŭzmocnienaha režymu eks-śledčaha Jaŭhiena Juškieviča — usio za toj ža «ekstremizm». Apalny siłavik abjektyŭna «zaćmiŭ» spravu kalehi-«ekstremista», bo na rezanansny prysud sabralisia praktyčna ŭsie topavyja prapahandysty.
Jak udakładnili słužbie manitorynhu BAŽ znajomyja Ivana Muraŭjova, nasamreč chutkaciečnaść pracesu ŭ peŭnym sensie łahičnaja: sprava fihuranta zaniała ŭsiaho dva tamy z adnym «złačynnym» epizodam. Majucca na ŭvazie jaho videazdymki dla rasśledavańnia žurnalista Stasia Ivaškieviča, jakoje vyjšła na telekanale «Biełsat». Siužet pad nazvaj «Siabroŭka Lilii Łukašenka i aliharchi stali bienieficyjarami spravy artapiedaŭ» źjaviŭsia sioleta ŭ lipieni.
A ŭžo 29 žniŭnia ŭ «Kaljannuju №1» pa Ivana Muraŭjova pryjšli siłaviki z orderami na pieratrus — «pa miescach pracy i pražyvańnia». Heta značyć, da «śpiecapieracyi» rychtavalisia zahadzia, až da vonkavaha sačeńnia. Prynamsi, pieršapačatkova vystaŭleny artykuł zastaŭsia da samoha prysudu — č. 3 art. 361-1 Kryminalnaha kodeksa («uvachodžańnie asoby ŭ skład ekstremisckaha farmiravańnia ŭ metach učynieńnia złačynstva ekstremisckaj nakiravanaści (udzieł u ekstremisckim farmiravańni)».
Pavodle naziralnikaŭ, sprava Ivana Muraŭjova identyčnaja toj, jakuju nie tak daŭno razhladaŭ Minski haradski sud u dačynieńni da inšaha videapieratara — Alesia Lubienčuka. Na momant zatrymańnia jon užo nie zajmaŭsia žurnalistykaj, ale da taho ŭ jakaści fryłansiera supracoŭničaŭ z «Biełsatam». Tolki ŭ jaho fihuravali dva epizody, tamu i atrymaŭ pakarańnie na paŭhoda bolšaje — 3 hady źniavoleńnia. Zrešty, sumna žartujuć rodnyja asudžanych, va ŭmovach pravavoha «luftu» jašče adnosna «miakki» prysud, bo maksimalnaja sankcyja praduhledžvaje da 6 hadoŭ turmy.
Pravaabarončaja supolnaść pryznała Ivana Muraŭjova palityčnym viaźniem.
Sam Ivan Muraŭjoŭ raniej pryznavaŭsia, što napisańniem tekstaŭ, a taksama fota— i videazdymkami zajmaŭsia vyklučna dla dušy. «Kaljannaja №1», jakoj jon vałodaje, — kultavaje miesca ŭ asiarodku minčukoŭ, tamu miedyjnaja śfiera ŭ jakaści zarobku nie razhladałasia apryjory. Adnak dla «ŭnutranaha drajvu» patrabavałasia vyjście lišku enerhii, jakim stała mienavita žurnalisckaja praca.
«Ciabie b baćka praklaŭ»: u Barysavie šyrycca sapraŭdnaja pryčyna maŭčańnia Hienadzia Skitava, centralnaj fihury «małočnaj spravy»3
Kamientary