«Prymicie rašeńnie, chto ja dla vas». Kalinoviec amal hod nie moža lehalizavacca ŭ Litvie

Ranak 18 śniežnia Alaksandr sustreŭ pad voknami budynka Departamienta mihracyi ŭ Vilni. U rukach mužčyny — płakat sa ściahami i nadpisam: kalinoviec źviartaje ŭvahu, što jon vorah biełaruskaha i rasijskaha režymaŭ, ale nie viedaje, chto jon dla Litvy, i 11 miesiacaŭ čakaje adkaz na hetaje pytańnie.

Kalinoviec raskazvaje, što vybraŭ hety dzień dla pikieta nie prosta tak:

«18 śniežnia 2020-ha ja vymušana źjechaŭ ź Biełarusi, taksama 18 śniežnia — Mižnarodny dzień mihranta.

Ale hałoŭnaja pryčyna — siońnia 11 miesiacaŭ, jak ja padaŭsia na ŭciakactva. Pry hetym u mianie jość invalidnaść druhoj hrupy, ale, niahledziačy na heta, ja pieršyja paŭhoda čakańnia nie mieŭ mahčymaści lekavacca. Taksama ŭ toj čas nie moh aficyjna pracavać, dahetul nie mahu pierazdać na pravy, bo maje biełaruskija pravy kiroŭcy skončylisia. Ja dahetul u padviešanym stanie i nie viedaju, ci mnie treba vučyć litoŭskuju movu, bo nie viedaju, ci zmahu zastacca ŭ Litvie.

Liču, 11 miesiacaŭ — dastatkovy termin dla taho, kab pryniać rašeńnie. Ja nie chavajusia, pra mianie jość šmat fota– i videamateryjałaŭ, u mianie jość kryminałki ŭ Biełarusi — siem paćvierdžanych artykułaŭ i try niepaćvierdžanyja, i ja paviedamiŭ pra heta Departamientu mihracyi. Što im jašče pieraškadžaje pryniać rašeńnie? Nie kažu, kab mnie dali lehalizacyju, ale prašu: prymicie rašeńnie, chto ja dla vas — nacyjanalnaja pahroza ci palityčny ŭciakač».

Alaksandr kaža, što ŭ takoj situacyi apynuŭsia nie tolki jon. Naprykład, jość vypadak, kali biełaruska dva hady čakaje rašeńnia pa svajoj lehalizacyi. Tamu vieteran žadaje svaim pikietam pryciahnuć uvahu da hetaj prablemy, kab razhlad kiejsaŭ biełarusaŭ nie zaciahvaŭsia.

Pavialičyć

Kłačko padaŭsia na ŭciakactva 18 studzienia 2024-ha, mienš čym praź miesiac paśla pryjezdu z Ukrainy. U biełarusa było dva sumoŭi ŭ Departamiencie mihracyi, jany doŭžylisia pa niekalki hadzin: adno prajšło prykładna ŭ kancy studzienia, druhoje — u lutym. Pytalisia, kaža Alaksandr, pra ŭsio: svajaki ŭ Biełarusi, čyj Krym, fakty ź bijahrafii i pohlady mužčyny.

Biełarus kaža pra detali svajoj mihracyjnaj spravy: 

«Nie vychvalajusia tym, što vajavaŭ. U papierach paznačyŭ, što vajavaŭ na baku Ukrainy, ale padavaŭsia na ŭciakactva pa palityčnych matyvach — pa tych, zhodna ź jakimi atrymaŭ pieraśled u 2020-m i padčas majoj dziejnaści ŭ emihracyi. Taksama paviedamiŭ, što maju invalidnaść druhoj hrupy, jakuju mnie dała Ukraina paśla kamisavańnia z USU, pradastaviŭ dakumient.

Ja mocny, vytrymaju, moža, i ź pieršaj hrupaj daŭ by rady. Ale navat toje, što ŭ mianie admirali nyrki, nie prymusiła razhladać maju spravu ŭ bolš terminovym paradku, i heta mnie vielmi nie padabajecca».

Alaksandr uspaminaje, što pieryjadyčna pisaŭ zapyty ŭ Departamient mihracyi datyčna svajoj spravy. U pačatku jon jašče atrymlivaŭ adkazy, ale niedzie ŭ červieni-lipieni i hetaha nie stała. U vieraśni mužčyna chacieŭ pajechać u Hiermaniju pa spravach Kaardynacyjnaj rady (jon čalec rady), ale atrymaŭ adkaz, što pakidać miežy Litvy jamu nielha. 

Niadaŭna były kalinoviec napisaŭ novy zvarot čynoŭnikam pa mihracyi, dzie padrabiazna raskazaŭ pra svaju spravu, pradublavaŭ jaho pa pošcie. I praz try dni atrymaŭ adkaz — u Departamienta mihracyi vialikaja zahružanaść, ale da kanca 2024-ha jany abiacajuć razhledzieć jaho spravu.

Alaksandr hetamu nie vieryć:

«Liču, što pryčyny dla zatrymki inšyja, ale mnie ich nie nazyvajuć. Viedaju ludziej, jakija padavali papiery našmat paźniej i atrymali ŭciakactva, i jany nie majuć invalidnaści. Niekalki tydniaŭ tamu ja znoŭ napisaŭ tudy zvarot i navat nie atrymaŭ adkazu, što zvarot tudy trapiŭ.

Kali heta ŭsio nie pracuje, vyrašyŭ — davajcie vykarystajem srodki, dazvolenyja litoŭskim zakanadaŭstvam, kab paŭpłyvać na chutkaść pryniaćcia rašeńnia. Taki srodak — adzinočny pikiet».

Kłačko zaŭvažaje, što prosić nie taho, kab jamu abaviazkova dazvolili zastacca ŭ Litvie. Dla jaho hałoŭnaje — atrymać choć niejkaje rašeńnie, kab płanavać dalejšyja dziejańni i mieć mahčymaść intehravacca ŭ peŭnaj krainie, bo ciapier u Litvie jon takoj mahčymaści nie maje.

Alaksandr zhadvaje jašče adzin vypadak, dzie kalinoviec zastaŭsia biez dakumientaŭ:

«Viedaju biełaruskaha dobraachvotnika, jaki padaŭsia na ŭciakactva, ale zdaryŭsia drenny vypadak i našaha ź im pabracima znajšli z nažom u hrudziach. Hetaha dobraachvotnika padazravali ŭ zabojstvie. Abvinavačvańnie ŭžo źniataje, ale jon užo dva hady čakaje lehalizacyi».

• 7
• 1
• 3
• 1
• 2
• 14
• 11
• 2