«Kala 450 tysiač zamiežnikaŭ naviedała Biełaruś pa biaźvizie». Praŭda? Vyhladaje, što ŭ razy mienš
Prapahanda kazyraje ličbami naviedvańnia Biełarusi pa biaźvizie dla žycharoŭ troch susiednich krain ES. Pa apošnich danych, mahčymaściu naviedać Biełaruś bieź vizy skarystałasia kala 450 tysiač zamiežnikaŭ. «Naša Niva» raźbirałasia, ź jakimi metami jany jeduć u Biełaruś.
Ci možna hetych ludziej nazyvać turystami?
Biaźviz u ciapierašnim vyhladzie dla žycharoŭ Łatvii i Litvy isnuje z 15 krasavika 2022 hoda, a z 1 lipienia 2022 hoda da ich dadali hramadzian Polščy. Takija praviły ŭviali da 31 śniežnia 2023 hoda. Za minuły hod ad pačatku dziejańnia biaźvizu Biełaruś naviedała 386 145 zamiežnikaŭ, jašče kala 65 tysiač skarystalisia takoj mahčymaściu ŭ biahučym hodzie.
Ličby ŭražvajuć, ale, pa słovach pradstaŭnikoŭ turystyčnaj i sumiežnych śfier, jany nie adčuvajuć napłyvu turystaŭ ź ES, jak heta było da pandemii, kali ŭ Biełarusi taksama isnavaŭ biaźviz, choć i z bolš składanymi ŭmovami karystańnia.
Niama taho, što rańš było
Asnoŭnym bienieficyjaram biaźvizu byli Hrodna i rajon, pra heta havoryć nie tolki aficyjnaja statystyka, ale i miascovyja ekskursavody i restaratary. Jany z sumam zhadvajuć 2019 hod, kali pa horadzie chadzili natoŭpy zamiežnych turystaŭ, a na placoŭcy dla turystyčnych aŭtobusaŭ u vychadnyja dni nie chapała miesca dla ŭsich achvotnych.
Pa ich słovach, niahledziačy na toje, što naviedvalnikaŭ z Polščy i Litvy amal niama, zusim biez turystaŭ horad nie zastaŭsia. Asnoŭnuju častku ciapierašnich turystaŭ składajuć biełarusy ź inšych rehijonaŭ krainy i rasijanie, jakich za apošni hod stała zaŭvažna bolš.
Hidy adznačajuć, što situacyja z turystami z susiednich krain ES spačatku pahoršała praz kavidnyja miery, kali ŭ susiednich krainych byli ŭviedzienyja strohija abmiežavańni.
«My spadziavalisia, što pa zakančeńni pandemii patok turystaŭ adnovicca, ale za hety čas u Biełarusi adbyŭsia šerah padziej, jakija vielmi niehatyŭna adbilisia na imidžy krainy. Pajezdki ŭ Biełaruś z turystyčnymi metami pierastali być modnymi, miascovyja turapieratary nie harać žadańniem pracavać z sučasnaj Biełaruśsiu, dy i častka ludziej ličyć takija pajezdki niebiaśpiečnymi», — kaža surazmoŭca.
Ekskursavody adznačajuć, što zusim zamiežnyja turysty nie źnikli, ale ŭ paraŭnańni z 2018—2019 hadami heta adzinki ci redkija nievialičkija hrupy, jakija zamaŭlajuć ekskursiju pa horadzie.
Pra toje, što ŭžo daŭno niama taho, što rańš było, kažuć i ŭłaśniki kaviarniaŭ u centry. Pa nazirańniach niekatorych ź ich, kolkaść naviedvalnikaŭ z susiednich krain ES u paraŭnańni z 2019 hodam pamienšała ŭ 10 razoŭ.
«Raniej lik išoŭ na dziasiatki zamiežnikaŭ, u pikavyja dni heta mahło być 50—60 čałaviek, ciapier dobra, kali takich budzie 5—6», — kaža surazmoŭca.
Niedachop turystaŭ adčuvajuć na sabie jak nievialikija kaviarni, tak i vialikija kafe i restarany. Niekatoryja ź ich da pandemii mieli damovy z zamiežnymi turahienctvami na kompleksnyja abiedy, jakija ŭvachodzili ŭ canu turpucioŭki.
Inšyja haradžanie adznačajuć, što bačać u horadzie aŭto na litoŭskich i polskich numarach, ale jeduć u Biełaruś jany čaściej za ŭsio nie ŭ turystyčnych metach, a ŭ ekanamičnych, radziej, kab naviedać svajakoŭ.
Pa ich nazirańniach, najbolšaja kancentracyja litoŭskich mašyn nazirajecca na AZS, la šapikaŭ z cyharetami, u kramach i aptekach na vyjeździe z horada na litoŭskim kirunku.
Pradaŭcy cyharet kažuć, što z uviadzieńniem biaźvizu ŭ ich paboleła pastajannych klijentaŭ siarod litoŭskich i polskich kantrabandystaŭ, jakija rehularna pryjazdžajuć i kuplajuć cyharety błokami i navat karabami.
Toj fakt, što biaźvizavyja pajezdki ŭ Biełaruś z ekanamičnych intaresaŭ karystajucca popytam u žycharoŭ Litvy, padćviardžaje i litoŭski bok.
Pradstaŭniki litoŭskaha Mytnaha departamienta ŭ kamientarach Delfi.lt paviedamili, što płyń mašyn ź Litvy ŭ Biełaruś vyrasła ŭ 5 razoŭ, kali Biełaruś uviała biaźviz dla hramadzian ES.
Žychary Litvy, pa słovach pradstaŭnicy departamienta, čaściej za ŭsio jeduć u Biełaruś pa tannaje paliva i cyharety.
«My pytajem u žycharoŭ, ź jakoj metaj jany jeździli ŭ susiedniuju krainu, jany zvyčajna nam tak adkazvajuć. U redkich vypadkach naviedvajuć svajakoŭ, zvyčajna jeduć zakupicca palivam i cyharetami», — skazała Delfi pradstaŭnica litoŭskaj mytni.
Vyhada jość, bo ŭ Polščy, Łatvii i Litvie paliva kaštuje kala 1,5—1,7 jeŭra za litr, u toj čas jak u Biełarusi kala 0,80—0,85 jeŭra. Roźnica ŭ cenach na cyharety jašče bolš zaŭvažnaja. Pačak cyharet u hetych jeŭrapiejskich krainach kaštuje ad 3,5 da 5—6 jeŭra.
Chto čaściej za ŭsio jedzie ŭ Biełaruś?
Zhodna z aficyjnymi danymi, čaściej za ŭsio da nas jeduć ź Litvy — amal 300 tysiač čałaviek. Na druhim miescy žychary Łatvii — amal 130 tysiač čałaviek. Mienš za ŭsio biaźvizam cikaviacca palaki: mienš za 30 tysiač vizitaŭ za vosiem miesiacaŭ.
Bolš nizkuju cikavaść da pajezdak u Biełaruś z boku palakaŭ možna patłumačyć tym, što na biahučy momant na biełaruska-polskaj miažy pracuje tolki adzin punkt propusku dla lehkavoha transpartu «Brest — Tarespal», ale i da taho punkty propusku byli vielmi pierahružanyja, i čas čakańnia ŭ čarzie nie apraŭdvajecca koštam vyviezienaha paliva i cyharet.
Ale treba razumieć, što ličba 300 tysiač nie aznačaje, što kožny dziaviaty žychar Litvy, uklučna ź dziećmi i invalidami, pabyvaŭ u Biełarusi. Prosta ličby, jakimi apierujuć łukašenkaŭcy, aznačajuć nie «kolkaść unikalnych naviednikaŭ», a «kolkaść pierasiačeńniaŭ miažy». Dobraja častka hetych vizitaŭ budzie prypadać na dolu niekalkich tysiač žycharoŭ pamiežža, jakija kruciacca ŭ Biełaruś štodzień — tudy z pustym bakam, a nazad z poŭnym i z cyharetami, jakija paśla iduć u cieniavy abarot.
Kamientary
Žuje Letva ! )