Biełaruś naroščvaje zdabyču nafty i vykarystoŭvaje novuju technałohiju. Što za jana?
Pa infarmacyi dziaržaŭnych miedyja, «Biełarusnafta» pieršaj u SND vykarystała technałohiju Zipper Frac (ZF) dla zdabyčy nafty. «Naša Niva» pacikaviłasia, što heta za technałohija i ci sapraŭdy jana pieradavaja?
Sioleta płanujuć ustalavać novy rekord
Pa słovach namieśnika hienieralnaha dyrektara pa vytvorčaści Dzianisa Varabjova, «Biełarusnafta» pastajanna pracuje nad pavieličeńniem abjomaŭ zdabyčy nafty ŭ krainie.
Zajava vyklikaje šmat pytańniaŭ, bo rekordnym pa abjomach zdabyčy byŭ daloki 1997 hod, kali ŭdałosia padniać na pavierchniu 1,82 młn ton vuhlevadarodaŭ. Paśla tempy zdabyčy štohod pastupova źnižalisia. Biełaruś u siarednim zdabyvała pa 1,64 młn ton nafty štohod, tamu pavieličeńnie abjomaŭ zdabyčy — heta tolki trend apošnich niekalkich hadoŭ, kali pa vynikach 2020 hoda zdabyli 1,7 młn ton. Letaś było zdabyta ŭžo 1,8 młn ton. Na 2023 hod zapłanavana zdabyča minimum 1,85 młn ton nafty.
Absalutny rekord pa zdabyčy nafty na biełaruskaj terytoryi pastaŭleny ŭ 1975 hodzie, kali na pavierchniu ŭdałosia padniać až 7,96 młn ton čornaha zołata.
Bolš za pałovu biełaruskaj nafty zdabyvajuć u Rečyckim rajonie. U płanie na 2023 hod — atrymać tam 1,1 młn ton. Tam ža i pačali prymianiać technałohiju ZF, jakaja vykarystoŭvajecca dla ciažkazdabyŭnych vykapniaŭ.
Pa słovach Varabjova, raspracoŭka ciažkazdabyŭnych kalektaraŭ — heta pierśpiektyŭny kirunak.
Navukoviec Siarhiej Biesarab adznačaje, što kala 90% zapasaŭ biełaruskaj nafty akurat adnosicca da katehoryi ciažkazdabyŭnych vykapniaŭ. Tamu nie dziŭna, čamu taki kirunak ličycca pierśpiektyŭnym.
«Hidrarazryŭ płasta — heta technałohija, jakaja, naprykład, vykarystoŭvajecca dla intensifikacyi zdabyčy nafty. Dla hetaha ŭ nietry pad ciskam zapampoŭvajuć śpiecyjalnyja vadkaści, jakija ŭtvarajuć u płaście mnostva treščyn», — tłumačyć Biesarab.
Navukoviec pryvodzić prykład z hazasilikatnym błokam.
«Umoŭna, kali b my praśvidravali adtulinu ŭ hazasilikatnym błoku i zapampavali b tudy z dapamohaj kampresara niejkuju hustuju vadkaść — jana razryvała b toj błok znutry.
U vypadku naftazdabyčy pa treščynach hety vykapień lepš vychodzić u stvoł śvidraviny. Jak kažuć naftaviki — pavyšajecca addača śvidraviny, jaje debit. Papieramiennaje čarhavańnie razryvaŭ dazvalaje davoli surjozna ekanomić čas», — śćviardžaje navukoviec.
Što tyčycca mienavita mietadu ZF, to tut zamiest adnoj śvidraviny, u jakoj pa čarzie ŭtvarajucca treščyny, robiacca dźvie paralelnyja śvidraviny, u jakich treščyny stvarajucca papieramienna.
«I sam hidrarazryŭ, i jaho ZF-varyjacyja vykarystoŭvajecca dla starych, zakinutych śvidravin ci śvidravin, tradycyjnaja zdabyča ŭ jakich niemetazhodnaja z ekanamičnych pryčyn. Sama technałohija nie jość niejkaj unikalnaj chimičnaj ci technałahičnaj raspracoŭkaj.
Heta prosta inšy sposab vykarystańnia śvidravin. Miechanizm pracy, abstalavańnie i chimičny skład vadkaści, jakuju zapampoŭvajuć, zastajucca absalutna adnolkavymi. Prosta pačali rabić nie adnu śvidravinu, a dźvie pobač. A haryzantalnyja treščyny / hidrarazryvy prabivajucca ŭ kožnaj pa čarzie. Schiematyčna heta padobna da leśvicy», — tłumačyć navukoviec.
Pa słovach Biesaraba, sam mietad hidrarazryvu vykarystoŭvajecca ŭ tych miescach, dzie zdabyvać naftu inšym čynam składana. Tam sprabujuć narabić bolš treščyn u parodach, kab vycisnuć hetuju naftu. U vyniku ZF-technałohija pavialičvaje intensiŭnaść pracy buravikoŭ, aptymizuje ich vysiłki.
«U ZŠA, naprykład, dla takich miescaŭ vykarystoŭvajuć užo madyfikavanuju viersiju technałohii ZF, tak zvany mietad MZF. Naprykład, tak zdabyvajuć naftu ŭ Techasie».
Siarhiej Biesarab adznačaje, što biełaruskaja nafta składanaja dla zdabyčy, ale jana bolš jakasnaja za rasijskuju, tamu i bolš darahaja.
«Jakasnaja — heta značyć utrymlivaje bolš lohkich vuhlevadarodaŭ, jakija iduć dla atrymańnia paliva, mienš ciažkich frakcyj, jakija možna vykarystać tolki dla atrymańnia bitumu. Dy i kolkaść złučeńniaŭ siery — važny pakazčyk jakaści nafty — u biełaruskim čornym zołacie taksama nievialiki. Pa jakasnych pakazčykach jana bolš padobnaja da narviežskaj», — tłumačyć navukoviec.
Raniej kala 90% biełaruskaj nafty išło na ekspart u Hiermaniju, na miascovyja NPZ jana nie pastupała, pakul nie źjavilisia sankcyi.
Adnak što z ekspartam nafty siońnia — nieviadoma, bo Biełstat pierastaŭ publikavać hetuju statystyku jašče ŭ 2021 hodzie.
Čytajcie taksama:
Čynoŭnik prahavaryŭsia, jak pamirajuć zavody pry Łukašenku
Płanavyja pravierki arhanizacyj. Da kaho zavitajuć z pravierkaj užo ŭ kastryčniku
Kamientary