U siryjskaj pravincyi Tartus prychilniki zrynutaha prezidenta Siryi Bašara Asada zabili 14 siryjskich palicejskich. Ab sutyknieńniach paviedamiŭ pierachodny ŭrad, jaki ŭznačalvajuć paŭstancy ź isłamisckaj hrupoŭki «Chajat Tachryr aš-Šam». Ułady Siryi paźniej abviaścili ab praviadzieńni apieracyi dla vyciaśnieńnia z rehijonu «sił Asada», piša Radyjo Svaboda.
Kiraŭnik MUS u pierachodnym uradzie Machamied Abdel Rachman rastłumačyŭ, što hrupa pravaachoŭnikaŭ trapiła ŭ «zasadu», naładžanuju łajalnymi Asadu siłami. Pa jaho słovach, jašče prynamsi 10 supracoŭnikaŭ siryjskaj palicyi atrymali ranieńni.
Pavodle źviestak Siryjskaha centra manitorynhu za vykanańniem pravoŭ čałavieka (SOHR), jaki bazujecca ŭ Brytanii, u pierastrełcy zahinuli try ŭzbrojenyja čałavieki. U SOHR nie ŭdakładnili, ci źjaŭlajucca jany pradstaŭnikami ałavickaj mienšaści.
Časovy ŭrad Siryi paabiacaŭ pryniać žorstkija miery suprać lubych sił, jakija pasprabujuć «padarvać biaśpieku krainy abo pastaviać pad pahrozu žyćcia jaje hramadzian».
Sutyknieńnie z łajalnymi Asadu siłami adbyłosia na zachadzie Siryi blizu partovaha horada Tartus, bolšaść nasielnictva jakoha składajuć ałavity, jakija tradycyjna padtrymlivali dynastyju Asadaŭ.
U sieradu 25 śniežnia adrazu ŭ niekalkich haradach na zachadzie Siryi prajšli akcyi pratestu, udzielnikami jakich byli šyity i ałavity.
Nahodaj dla pratestu stała raspaŭsiudžanaje ŭ sacsietkach Videa z napadam na ałavickuju śviatyniu Al-Chusejna bin Chamdana Al-Chašybi ŭ Alepa.
Novyja ŭłady Siryi śćviardžajuć, što apublikavanaje ŭ sacsietkach videa było źniataje jašče ŭ kancy listapada. Adnak hetyja zapeŭnivańni nie dapamahli spynić chvalu abureńnia siarod ałavickaj mienšaści.
Demanstracyi prajšli ŭ Chomsie, dzie prynamsi adzin udzielnik akcyi pratestu byŭ zabity padčas sutyknieńnia pratestoŭcaŭ z palicyjaj. Taksama demanstracyi prajšli ŭ Tartusie, Łatakii i Kardachu — rodnym horadzie baćki Bašara Asada — Chafieza Asada.
Paśla razhonu masavych akcyj pratestu ŭ pravincyjach Łatakija i Choms była ŭviedzienaja kamiendanckaja hadzina na adnu noč — da 8 ranicy 26 śniežnia.
Pra patrabavańni pratestoŭcaŭ dakładnych źviestak niama. Jak paviedamlaje ahienctva Reuters, udzielniki akcyj pratestu, vierahodna, patrabujuć harantyj biaśpieki paśla padzieńnia režymu Bašara Asada.
Žychary rehijonaŭ, dzie prajšli akcyi pratestu, raspaviali ahienctvu, što akcyi pratestu byli vyklikanyja ciskam i vypadkami prymianieńnia hvałtu ŭ dačynieńni da ałavitaŭ paśla padzieńnia režymu Asada.
Ałavickaja mienšaść, intaresy jakoj pradstaŭlaŭ Asad, aścierahajecca pomsty z boku novych uładaŭ — za katavańni i pakarańni śmierciu, učynienyja režymam Asada.
Relihijnyja lidary ałavitaŭ zaklikali novyja ŭłady Siryi da «ahulnaj amnistyi» dla pradstaŭnikoŭ svajoj abščyny.
Kiraŭnictva isłamisckaha ruchu «Chajat Tachryr aš-Šam», jaki ŭznačaliŭ źviaržeńnie režymu Bašara Asada, užo nieadnarazova abiacała abaraniać pravy i svabody relihijnych i etničnych mienšaściaŭ.
Adnak pradstaŭniki relihijnych i etničnych mienšaściaŭ kažuć pra aściarohi za ŭłasnuju biaśpieku.
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary