Brytanija adpraŭlaje bajavyja karabli ŭ Bałtyjskaje mora

Vialikabrytanija, reahujučy na rost napružanaści na Blizkim Uschodzie, adpraviła svoj eśminiec u Piersidski zaliŭ. Akramia taho, z pačatku śniežnia marskaja eskadra pad kamandavańniem Vialikabrytanii pačnie patrulavać vody Ła-Manša, Paŭnočnaha i Bałtyjskaha moraŭ, achoŭvajučy padvodnyja kabieli, paviedamlaje Bi-bi-si.

Ministr abarony Vialikabrytanii Hrant Šeps u sieradu abviaściŭ, što ŭ Piersidski zaliŭ i prylehły rehijon idzie eśminiec karaleŭskaha fłotu HMS Diamond. Tam jon dałučycca da frehata HMS Lancaster i troch minnych tralščykaŭ.

Frehat HMS Lancaster i try minnyja tralščyki karaleŭskaha fłotu znachodziacca ŭ rehijonie Piersidskaha zaliva ź minułaha hoda.

«Heta krytyčna važna dla Vialikabrytanii, kab pavialičyć našu prysutnaść u rehijonie, kab abaranić našy intaresy va ŭsio bolš niestabilnym śviecie», — skazaŭ Hrant Šeps.

Pavodle jaho słoŭ, adpraŭka dadatkovaha karabla stanie sihnałam dla Irana i jaho satelitaŭ u rehijonie. Chusity ŭ Jemienie i «Chiezbała» ŭ Livanie z pačatkam vajny ŭ siektary Haza aktyvizavalisia i sprabujuć nanosić udary pa Izrailu.

ZŠA z pačatku vajny adpravili va ŭschodniuju častku Mižziemnaha mora dźvie avijanosnyja hrupy, a ŭ Čyrvonym mory trymajuć eśminiec, jaki ŭžo pierachoplivaŭ rakiety i drony, zapuščanyja chusitami pa Izrailu.

U siaredzinie listapada chusity zachapili ŭ Čyrvonym mory handlovaje sudna MV Galaxy Leader — na toj padstavie, što adnym z saŭładalnikaŭ firmy, jakaja vałodaje sudnam, źjaŭlajecca Izrailcianin.

U paviedamleńni Ministerstva abarony Vialikabrytanii ab adpraŭcy HMS Diamond havorycca, što karabiel dapamoža zabiaśpiečyć svabodu marapłaŭstva i marskoha handlu.

Praz praliŭ Bab-el-Mandeb — vuzki ŭvachod u Čyrvonaje mora. Štodnia praź jaho prachodzić kala piacidziesiaci handlovych sudoŭ, a praz Armuzski praliŭ — uvachod u Piersidski zaliŭ, klučavy maršrut ekspartu nafty — u dva razy bolš.

Što tyčycca eskadry, jakaja budzie achoŭvać padvodnyja kamunikacyi, to jana budzie składacca ź siami karabloŭ, zadača jakich — patrulavańnie vod Ła-Manša, a taksama Paŭnočnaha i Bałtyjskaha moraŭ.

Prajekt zadumany i budzie ažyćciaŭlacca Abjadnanym ekśpiedycyjnym korpusam (JEF) pad kamandavańniem Vialikabrytanii, u jaki taksama ŭvachodziać praktyčna ŭsie krainy Paŭnočnaj Jeŭropy: Danija, Šviecyja, Narviehija, Isłandyja, Finlandyja, Estonija, Łatvija i Litva.

Hrant Šeps nazvaŭ budučuju sumiesnuju marskuju apieracyju histaryčnaj padziejaj.

Ad kaho sumiesnaja eskadra budzie abaraniać padvodnyja kamunikacyi, brytanski ministr nie skazaŭ, ale i Vialikabrytanija, i inšyja krainy Paŭnočnaj Jeŭropy ŭ apošnija hady nie raz vykazvali zaniepakojenaść adnosna pierasoŭvańniaŭ rasijskich raźviedvalnych sudoŭ pablizu abjektaŭ infrastruktury krytyčnaj važnaści.

U kastryčniku hetaha hoda ŭ Bałtyjskim mory byli paškodžanyja padvodnyja hazapravod i kabiel pamiž Estonijaj i Finlandyjaj. U hetym vypadku pad padazreńnie trapiła kitajskaje sudna Polar Bear, jakoje mahło paškodzić truby jakaram.

Padača hazu pamiž Finlandyjaj i Estonijaj prypynienaja jak minimum da krasavika nastupnaha hoda, zajavili apieratary abiedźviuch krain.

• 16
• 0
• 1
• 0
• 2
• 0
• 1
• 0