Čamu ŭ Pinsku tak šmat źmiej na nabiarežnaj i adkul źjavilisia hadziuki na hradkach
Na nabiarežnaj u Pinsku, dzie kožny hod zaŭvažajuć vužoŭ, hetym razam ich kolkaść prykmietna pavialičyłasia, što źviazana z pavodkami i paciapleńniem klimatu. Źmiei stali lahčej pieranosić zimoŭku ŭ Biełarusi, praz što ich kolkaść uzrasła. Pra heta raskazaŭ zahadčyk łabaratoryi Paleskaha ahrarna-ekałahičnaha instytuta NAN Biełarusi Viktar Dziamiančyk u efiry telekanała STB, piša «Lusterka».
«U Pinsku nabiarežnaja zaŭsiody vabiła ziemnavodnych, tam jość korm dla vužoŭ. Dla ich heta litaralna stałoŭka, žyvaja biaspłatnaja stałoŭka, bo, pa-pieršaje, jana vyhravajecca, tam šmat ščylin, tam zaŭsiody šmat časnočnic. Kali zusim ściamnieje, tam i šeryja žaby pakazvajucca», — rastłumačyŭ navukoviec štohadovaje źjaŭleńnie vužoŭ na nabiarežnaj.
Pavodle miascovych žycharoŭ, źmiei poŭzajuć tolki na nabiarežnaj, u damach ich pakul nie bačyli. Sioleta siarod vužoŭ byli zaŭvažanyja i hadziuki, adnak, pavodle źviestak telekanała, hetych atrutnych źmiej usio čaściej možna sustreć u aharodach miascovych žycharoŭ. U Biełarusi kožny hod aficyjna rehistrujecca kala 50 vypadkaŭ ukusu hadziuki, a pavodle nieaficyjnaj statystyki, takich vypadkaŭ našmat bolš.
«Ujavicie, vialikaja vioska Stachava, dzie ŭ žyćci hadziuki nie bačyli, — i adznačajecca fakt, što prosta na aharodzie žančynu ŭkusiła hadziuka. A čamu tak atrymlivajecca? Jany pačynajuć šukać bolš vilhotnyja miescy. A dzie siarod leta ci ŭ pačatku leta takija pastajanna vilhotnyja miescy padtrymlivajucca? Tam, dzie palivajuć ludzi», — raskazaŭ Dziamiančyk.
Navukoviec papiaredziŭ, što chutka ŭ biełaruskich haradach možna budzie čaściej sustreć roznych pradstaŭnikoŭ dzikaj pryrody praź źmienu klimatu.
«Ciabie b baćka praklaŭ»: u Barysavie šyrycca sapraŭdnaja pryčyna maŭčańnia Hienadzia Skitava, centralnaj fihury «małočnaj spravy»3
Kamientary