Jeŭropa rychtujecca da niezvyčajna ciopłaha vieraśnia paśla letniaj śpioki
U Minsku ŭ pieršyja dni vieraśnia budzie da +28°S.
Jeŭropu čakaje niezvyčajna ciopły pačatak vieraśnia paśla leta z anamalnaj śpiakotaj i zasuchaj na paŭdniovym uschodzie kantynienta — śpioka prahnazujecca i ŭ Biełarusi. Pra heta havorycca ŭ publikacyi Bloomberg, što spasyłajecca na šerah prahnozaŭ.
U pryvatnaści, prahnoz Atmospheric G2 pakazvaje, što ŭ pačatku miesiaca na macieryku čakajecca tempieratura na 5-8 hradusaŭ vyšej za 30-hadovaje siaredniaje značeńnie.
Mietearołah z kampanii Maxar Technologies adznačyŭ, što asabliva ciopła budzie na poŭdni Hiermanii, Bałkanach, va Ukrainie, Biełarusi i krainach Bałtyi.
Žurnalisty adznačyli, što hłabalnaje paciapleńnie padaŭžaje letniuju śpioku ŭ Jeŭropie na vierasień i navat kastryčnik, što pavialičvaje pahrozu ekstremalnych źjaŭ nadvorja, takich jak pavodki, mocnyja štarmy i lasnyja pažary.
Bolš miakkija ŭmovy taksama mohuć zatrymać pačatak aciaplalnaha siezona, jak u 2023 hodzie.
Pa słovach mietearołaha AccuWeather Džejsana Nikałsa, u niekatorych rehijonach, uklučajučy bolšuju častku Ispanii, Bałkany i Uschodniuju Jeŭropu, zasucha zachavajecca i ŭ vieraśni.
Na druhuju pałovu miesiaca prahnoz niavyznačany, pakolki jon budzie zaležać ad upłyvu ciopłaha Atłantyčnaha akijana i źjavy Ła-Nińja. Atłantyčnyja tempieratury byli blizkija da rekordna vysokim na praciahu niekalkich miesiacaŭ, i histaryčna heta sahravała Jeŭropu ŭ vieraśni.
Nadvorje ŭ Minsku na nastupnyja dni pavodle yr.no
«Budzie zdymać maštabnyja prajekty z saboj u hałoŭnaj roli». Što dumajuć pra novaha ministra kultury Čarnieckaha jaho kalehi?7
Kamientary
Rabicie vysnovy! Vosień nadyjdzie imklivaja, chałodnaja, z ekstrymam u nadvorji j daždžami, a zima budzie lutaja.