Na Amazon vyjšli adrazu try sieryi druhoha siezona sieryjała pa tvorach Džona R. R. Tołkina, jakoha fanaty čakali dva hady. Pahladzieli ich, kab zrazumieć, ci ŭdałosia stvaralnikam vypravić pamyłki pieršaha siezona i jakimi novymi zahadkami intryhuje jahony praciah.
Aściarožna, jość spojlery!
Hetym razam stvaralniki «Piarścionkaŭ ułady» nie dapuścili hałoŭnaj pamyłki — vypuścili novy siezon amal praź miesiac paśla vychadu druhoha siezona «Doma Cmoka». U 2022 hodzie abodva sieryjały vyjšli ŭ adzin čas i naturalna kankuravali pamiž saboj za ŭvahu hledačoŭ. Paraŭnańnie było nie na karyść «Piarścionkaŭ ułady».
Niahledziačy na svoj niepamierna vielizarny biudžet, u «Piarścionkach ułady» nie było ni zachaplalnaha siužetu, ni hłybokich dyjałohaŭ, ni pierakanaŭčaj hulni akcioraŭ. Vizualny składnik, jaki taksama miescami možna była raskrytykavać za praźmiernuju hlancavać, i viadomy ŭsim čaroŭny śviet Tołkina ź ciažkaściu vyciahvali sieryjał.
Sioleta šoŭraniery vyrašyli ŭziać revanš — zbyć zahadkavaść, jakoj biez asablivaha pośpiechu dražnili hledača, dy skaracić nudnyja i raściahnutyja epizody, zrabiŭšy novy siezon bolš žyvym i nasyčanym.
U pieršym siezonie nam raskazali pra viartańnie ŭ śviet Sieradziemja zdavałasia b pieramožanaha Saŭrana, kolišniaj pravaj ruki ciomnaha vaładara Morhata, jaki kinuŭ vyklik inšym Vałar i samomu Iłuvataru, ale byŭ źniščany. Hledačy stali śviedkami pieratvareńnia paŭdniovych ziemlaŭ u biaspłodny Mordar, nasieleny orkami, i stvareńnia troch Vialikich piarścionkaŭ, jakija musiać spynić zaniapad elfijskich karaleŭstvaŭ.
Novy siezon viartaje nas u čas paśla paražeńnia Morhata, kali Saŭran (u hetym fłešbeku jaho rolu vykanaŭ Džek Łaŭden) abviaščaje siabie ŭ krepaści Farodvajt novym ciomnym vaładarom i abiacaje znoŭ pavieści ŭ boj i skaryć usio Sieradziemje.
Niečakana vyjaŭlajecca, što złobnyja i nikčemnyja orki nie vielmi chočuć hinuć za čužyja idei, a chočuć prosta žyć.
Pramova i karanacyja ciomnaha vaładara pieratvarajecca ŭ kryvavuju bojniu, raźviazanuju jahonaj pravaj rukoj Adaram (u druhim siezonie Džoziefa Moŭła ŭ hetaj roli zamianiŭ Sem Cheziełdajn, viadomy pa filmie «Krumkač»). Heta vam nie pierad pracoŭnymi MZKT ŭ žniŭni 2020 hoda vystupać, tut rabiaty surjoznyja.
Svabodnaja vola orkaŭ i ichniaja čałaviečnaść — novyja temy, jakija pryŭnios u historyju Sieradziemja sieryjał. Historyja padzieńnia Saŭrana vyhladaje vielmi efiektna i tłumačyć jahonuju varožaść da orkaŭ u Mordary.
Razuvasobleny Saŭran doŭhija hady źbiraje siły, kab vybracca z-pad ziamli i zdabyć sabie novaje abličča (Čarli Uikierz), pahłynajučy, padobna da Vienama z suśvietu Marvel, usio žyvoje na svaim šlachu. Paśla straty ŭsiaho i zdrady svaich pryśpiešnikaŭ, zdajecca, jon vahajecca, ci nie pačać usio nanova, pryniaŭšy bok dabra. Hibiel karabla, na jakim jon adpłyvaŭ ź Sieradziemja na Zachad, vidać, adhaniaje ad jaho hetyja dumki, a sustreča ŭ mory z Haładryjel (Morvied Kłark) viartaje da raniejšych płanaŭ.
Matyvacyja Saŭrana nasamreč tak i nie była raskrytaja — jon prahnie ŭłady biez daj pryčyny. Pad imiem čałavieka Chałbranda jon vydavaŭ siabie za karala Paŭdniovych ziemlaŭ i dapamoh najvialikšamu elfijskamu kavalu Kielebrymbaru (Čarlz Edvards) vyrabić elfijskija piarścionki, ale ŭ kancy minułaha siezona raskryŭ svaju sapraŭdnuju sutnaść.
Elfy Lindana, jakija daviedalisia pra sapraŭdnuju sutnaść Chałbranda, paŭstali pierad nievyrašalnaj dylemaj — skarystacca piarścionkami, kab spynić zaniapad svaich ziemlaŭ, abo nie ryzykavać trapić pad upłyŭ Saŭrana i nazaŭždy spłyć u rajski Valinar.
Kanflikt vyrašaje najmudrejšy z elfijskich vaładaroŭ — Kirdan Karabieł (Ben Denijełs, jaki niadaŭna vykanaŭ rolu hienierała-hieja ŭ sieryjale «Fundacyja» pavodle Azimava). Jak i ŭ litaraturnym kanonie, Kirdan adziny elf, jaki nosić baradu, ale zhalaje jaje ŭ znak abnaŭleńnia, kali razumieje, jakuju siłu dajuć Piarścionki. U adzin momant jany vylečvajuć elfijskija lasy ad chvaroby, a Kirdanu, Haładryjel i karalu Hil-haładu (Bendžamin Uokier) dajuć zvyšnaturalnyja zdolnaści bačyć toje, što było, i toje, što tolki maje adbycca.
Saŭran sutykajecca ŭ Mordary sa svaim zabojcam Adaram, «baćkam orkaŭ», jaki nie paznaje jaho ŭ novym abliččy. Ale zamiest taho, kab zabić jaho adrazu, jon vykarystoŭvaje jahony ŭpłyŭ, kab nasłać čornyja połčyščy na Erehijan, dzie, jak jamu ŭdajecca pierakanać Adara, nienavisny Saŭran ustupiŭ u zmovu ź nienavisnymi elfami.
Treba adznačyć, što ŭ sieryjale nam niaśmieła sprabujuć pakazać orkaŭ pad inšym rakursam — jak narod dziki i złobny, ale jaki choča žyć u miry ź inšym śvietam pa svaich paradkach. Ale inšy śviet admaŭlaje im u isnavańni. «Žyćci orkaŭ važnyja» — tak i kryčać niekatoryja sceny ŭ novym siezonie.
Naprykład, kali nam pakazvajuć siamju orkaŭ z pačvarnaj mamaj, jakaja trymaje svajho «aniołačka» na rukach. Nu jak tut nie rasčulicca? Fanaty nie rasčulilisia, a naadvarot pryjšli ŭ šalenstva ad takoha ździeku z suśvietu Tołkina.
Sam Saŭran pad vyhladam Chałbranda sapraŭdy źjaŭlajecca ŭ Erehijanie i tam uvodzić u zman Kielebrymbara, jaki dahetul nie viedaje pra jahonuju sapraŭdnuju sutnaść. Słavalubnamu majstru-kavalu jon raskryvajecca jak Anatar, vaładar daroŭ, i prapanuje tamu vykavać piarścionki dla hnomaŭ i ludziej, kab abaranić ich ad Ciemry.
Zusim nievypadkova Ciemra nakryvaje karaleŭstva hnomaŭ Kchazad-Dum, prymušajučy ich parvać sa svaim izalacyjanizmam i źviarnucca da elfaŭ pa dapamohu. Za svoj cudoŭny mitrył hnomy atrymajuć svaje siem piarścionkaŭ, jakija musiać źniać Ciemru z padziemnaha karaleŭstva.
Elfijskaja linija ŭsio jašče vyhladaje pafasna hratesknaj. Navat pry ŭsioj inakšaści elfaŭ ciažka pavieryć u tyja paetyčnyja słovy, jakija źlatajuć ź ichnich vusnaŭ, i ŭ składanyja adnosiny pamiž elfami vielmi roznaha sacyjalnaha statusu. Nie vierycca i ŭ hulniu akcioraŭ — biezemacyjny tvar Haładryjel i kryŭlańni Hil-hałada. Tolki Kirdan Karabieł staŭ sapraŭdnaj addušynaj u dušnaj historyi elfaŭ.
Nie mienš pafasnaj akazałasia linija numienorcaŭ. Niejkaje padabienstva prydvornych intryh vakoł aślepłaj Miryel (Sincija Adaj-Robinsan), dačkoj spačyła karala, jakuju ŭsie vinavaciać u hibieli vojnaŭ i ŭ znosinach z elfami, pryvodzić da ŭzvyšeńnia Farazona (Trystan Hraviel), niahledziačy na supraciŭ Elendzila (Łojd Oŭen). Źjaŭleńnie vialikaha arła pierakonvaje numienorcaŭ u vybranaści novaha vaładara.
Sapraŭdnym zadavalnieńniem akazałasia nazirać za žyćciovymi pierypietyjami hnomaŭ: za kryŭdami i ŭpirystaściu karala Duryna III (Piter Małan) i jahonaha syna, za sprečkami i zastolnymi razmovami małodšaha Duryna (Oŭajn Artur) sa svajoj charyzmatyčnaj žonkaj Dysaj, za jaje śpievami na tajemnaj movie kchuzduł, da jakich zastajucca hłuchimi kamiani hary.
Uvohule Dysa, piersanaž jakoj spačatku parvaŭ internet, bo jaje rolu vykonvaje čarnaskuraja aktrysa Safija Namviete, akazałasia najlepšaj znachodkaj sieryjała — mienavita takoj usie fanaty i ŭjaŭlali sabie hnomich, a koler skury, jak akazałasia, nie maje asablivaj roli.
Čaradziej (Nieznajomca, rolu jakoha vykanaŭ Denieł Uejman, usio jašče nie nazvali Handalfam), jaki razam z paŭroślikami vypraviŭsia na ŭschod u minułym siezonie, užo dajšoŭ da pustynnaj krainy Run. Tut jamu pryjdziecca avałodać svaimi zdolnaściami i znoŭ abaranić machnanohich spadarožnic ad pamahatych zahadkavaha Ciomnaha čaradzieja (Kijaran Chajnds, viadomy pa roli Mansa-Nalotčyka ŭ sieryjale «Hulnia tronaŭ»). Run heta absalutna novaja miascovaść sa svaimi łandšaftami, atmaśfieraj i tajamnicami.
Viadomaja fanatam pa kartach Sieradziemja kraina Run raniej nikoli nie źjaŭlałasia na ekranach i pra jaje amal ničoha nie viadoma — idealnaje miesca dla ekśpierymientaŭ šoŭranieraŭ, za jakija im nie prylacić ad fanataŭ. Z marudnych badziańniaŭ pa lasach i dalinach historyja paŭroślikaŭ pieratvaryłasia ŭ adnu z najcikaviejšych linij, nasyčanych pryhodami. Ale jana ŭsio jašče vyhladaje nieabaviazkovaj i adarvanaj ad ahulnaj historyi.
U sapraŭdnuju siužetnuju śmietnicu, jakoj adviedziena najmienš času, pieratvarylisia historyi ciemnaskuraha elfa Arandzira (Ismael Krus Kardova) i numienorca Isildura (Maksim Bołdry), jakija ciapier splalisia ŭ adnu. U pieršym siezonie nam raspaviadali pra kachańnie Arandzira i lekarki Bronvin, jaŭna natchnionaj tołkinaŭskaj lehiendaj pra Bierena i Lucijen.
Ale aktrysa Nazanin Banijadzi vyrašyła spynić svaju akciorskuju karjeru, kab pryśviacić siabie baraćbie za pravy svaich ziemlakoŭ ź Irana.
Šoŭraniery nie znajšli ničoha lepšaha, jak prosta pachavać Bronvin, niahiehła patłumačyŭšy jaje śmierć. Niama cieła — niama spravy. Isildur, Arandzir i pryžyty im bajstruk Tea (Tajra Machafidzin) zajmajucca małacikavaj mituśnioj ź miascovymi bandytami, pakul za kadram nie źjaŭlajucca enty — žyvyja drevy, jakich nam abiacali pakazać u hetym siezonie.
Pačatak novaha siezona vyhladaje lepš, čym uvieś papiaredni. Stvaralniki sieryjała, viadoma, pastaralisia paźbiehnuć zaciahnutaści i nasyčać kožnuju sieryju padziejami paśla doŭhaj zaviazki. Ale ź inšymi chibami tak i nie razabralisia.
Nieviadoma čamu, ci praz paskareńnie siužetu, ci praz adsutnaść pramoha paraŭnańnia z «Domam Cmoka», ci praz toje, što my prosta źmirylisia, što «Piarścionki ŭłady» buduć voś takimi i ničoha inšaha ad ich užo nie čakajem, ale ŭsio ž novy siezon bolš nie vyklikaje byłoj niepryjaznaści. Vidać, iznoŭ pracuje mahija čaroŭnaha Sieradziemja i čaradziejnych Piarścionkaŭ.
Iena Mak-Kielena paklikali syhrać Handalfa ŭ novuju ekranizacyju Vaładara Piarścionkaŭ
Druhi siezon «Doma Cmoka» padmanuŭ čakańni
Kaliziej, kroŭ i popieł Viezuvija. Jakim atrymaŭsia novy sieryjał pra Rymskuju impieryju z Entani Chopkinsam
Polskaja studyja prystupaje da stvareńnia novaj častki «Viedźmara»
Vučyłasia na nastaŭnicu biełaruskaj movy, stroiła pałkoŭnikaŭ. Šeść faktaŭ pra Volhu Čamadanavu, jakaja idzie na vybary13
Kamientary
Pry akazii mahli b patłumačyć biełaruskim čytačam, što takoje blackwashing.